Yexejqel 17
17
Pnungalan Kari Qdiro ma Tlulu
1So nii kari na kenan ka Utux Tmninun, 2“Laqi seediq! Rbaqi paangal kari rmengo ka sapah Israel. Pngali kari, 3rmengo, so nii kari na ka Utux Tmninun Bukung, niqan 1 paru qdiro, paru ba palic, bbaro palic ma lmlamu lnngayan ubal palic na. Skiya meyah Lebanon ma maangal ludux qulic bale. 4Gmeerung ludux rabu cida ma hqulun na dxeral sbbrigan ma, pniqun na ckceka alang sbbrigan. 5Dungal we maangal rehak dxeral hiya ma, spntena na so mhuma qhuni lebi hmaun na ssiyo qsiya malu ba dxeral. 6Mdakil ba ka nii ma mrana mkgarang. Mquri qdiro ka wahir na ma, mquri toma qdiro geqi ka gamil na. So nii mdakil ba ka wahir na ma qhuni lipas.
7Niqan dungal paru ba ka palic na ma, egu ba ubal na ka 1 qdiro paru. Qtai! Gghuriq qsiya heya ka lipas nii we peeyah gaga na niqan hiya, pqriun na palic qdiro nii ka gamil na ma pkragun na heya ka wahir na. 8Qhuni nii we phmaan egu ba qsiya malu dxeral. So maha mscida riyung, kiya de asi so dehuk ma malu ba qhuni lipas. 9Rengo ka isu, so nii kari na ka Utux Tmninun Bukung, mpkdakil ka lipas nii ho? Uxe gbilun qdiro ka gamil na ma, qhdeun na maangal kana ka heyi na de, maha mpkdengu kana ka waso rabu hneru peni? Ani ini daani paru beyax ma, hbaro seediq ka gmabil gamil na nii. 10Qtai! Ani pnhuma ka qhuni lipas we, maha mpkdakil peni? Yupan bgihur pneyah nklaan hido de, uxe mpkdengu peni? Yaa uxe mpkdengu pnhuma na hiya ho?”
Pgkela Pnungalan Kari
11Meyah kenan ka kari Utux Tmninun, rmengo, 12“Rngagi ka sapah mptbrinah. Maanu ka nnii we ini namu klai peni? Kesa rmengo ka isu. Qtai! Mneyah Yerusalem ka qbsuran paru Babirun ma, qmerac qbsuran paru ma dqbsuran. Dheya nii we wada na desun Babirun. 13Kiya de gmao 1 gaga lqlaqi mslutuc sapah qbsuran paru smdehu bale kari ma, psdhugun na qqeepah dheya. Dungal we wada na qrapun maadis ka dseediq niqan ngayan. 14Kiya de ptlbuun na ka qlhangan nii ma, uxe na ttutuy ma ppuyu daha sndhegan kari pkuudus. 15Kiya de tbrinah qbsuran paru Babirun ka heya. Heya we smkagul seediq mquri Micrayim kkberih na dapa dmay ma hbaro supi. So nii we mpdehuk ka heya ho? Mpkuudus so nii noda na ka heya ho? Smgaliq sndhegan kari ka heya we mtduwa rmaro ppkdira ho?” 16Rmengo ka Utux Tmninun Bukung: “Mpsdehu ku knuudus mu uka psteqan, mphuqil Babirun ka heya. Kiya ka gaga niqan qbsuran paru Babirun hiya. Ado pnheyu qbsuran paru heya ka qbsuran paru Babirun. Kiya we ini sparu pnsdehu qbsuran paru ma, tbrinah qbsuran paru ma pnsdehu na ka heya. 17Mccebu ma ani mharac qbrangan, kmari beling qmphuqil hbaro seediq ciida, ani yaa niqan mbeyax supi ma hbaro supi ka Paroh we, uxe mdayo heya meeniq mccebu hiya. 18Smbiciq kari sndehu ma, smgaliq pnsdhegan ka heya. Qtai! Ani wada ini cebu, ida wada mooda kana noda nii ka heya. So kiya de uxe mpqduriq ka heya.” 19Maanu so kiya de, so nii kari na ka Utux Tmninun Bukung: “Mpsdehu ku knuudus mu uka psteqan. Wada smbiciq kari sndehu mu ka heya, smgaliq pnsdhegan mu de, ida asi ka mosa bobo tunux na ka qnquwan noda nii. 20Mqada ku tlenga heyi na ma, pdgyalun mu tnraki mu ka heya. Desun mu Babirun ka heya ma, pkdraun mu hiya ka tnbrnahan na kenan. 21Kana supi qnduriq we maha mtakur toma hlmadac. Msngari na we maha trehak ssiyo kana. Kiya de maha namu klaun, rmnengo kari nii we, kiya ka yaku, Utux Tmninun.”
Sntangan Quri Nexal ka Utux Baro
22So nii kari na ka Utux Tmninun Bukung: “Maangal ku ludux cida qulic bale ma phmaun mu. Kteun mu ka rabu ba tasil na peeyah hiya, phmaun mu bbaro ba bobo dgiyaq. 23Phmaun mu bbaro ba dgiyaq Israel ka nii. Kiya de tmasil mccida mghei ma malu ba qulic bale. Ani maanu qbheni ka meeniq toma na hiya, knkingal klegan qbheni ka tmrudu cida na hiya. 24So kiya de mpkela ka kana qhuni breenux, yaku, Utux Tmninun ka slbeun qhuni bbaro, qndisan mu ka qhuni llebu. Dngeun mu ka qhuni muudus, pkdusun mu ka qhuni mdengu. Yaku, Utux Tmninun ka rmnengo kari nii ma, ida mpttuku na uri.”
Currently Selected:
Yexejqel 17: Stgdaya
Highlight
Copy
Compare
Share
Want to have your highlights saved across all your devices? Sign up or sign in
The Bible Society in Taiwan, 2020
© 台灣聖經公會版權所有，2020
