Mege Gaya 8
8
Maangal Dxeral Malu
1“Rengo mu yamu ali saya ka kana gaya pndakar we tgleus bale muyu. So namu maha mpkuudus ma mprana kneegu namu ma, mpteme namu mangal dxeral sntangan Utux Tmninun pusu rdrudan namu. 2Psbgrnahi ba lmngelung ka 40 knkawas nii, Utux Tmninun, Utux Baro su we dmnudul isu meniq mkleelu su tadus brenux ciida. Nii ge gisu pqraqil isu ma smeung isu. So na maha klaun lmngelung hmuwa mesa ka lhebun su ma, ya bale ba mpsruwa muyu gaya pndakar na. 3Pqraqil ma pkuure isu ka heya ma, speekan na isu ka mana uxe su nklaan ma ini klai rdrudan su uri. So su maha klaun, uxe wano pang ka skuudus seediq. Wano ba smtama kana kari pneeyah quwaq Utux Tmninun. 440 knkawas nii we, ini bale qsgaliq ka lukus pnlkusan su. Ini bale kbeeba ka papak su uri. 5Klai bale lhebun su. Gisu tmgesa sunan ka Utux Tmninun, Utux Baro su. Mntena so seediq tmgesa lqlaqi na. 6Isu we tgleus bale muyu gaya pndakar Utux Tmninun, Utux Baro su. Nduwa muyu elu na ma miicu heya.
7Utux Tmninun, Utux Baro su we mpdudul sunan mremux dxeral malu. Dxeral kiya we, niqan pusu qsiya ma ebun qsiya pneeyah ayu ma hmneru peeyah ckceka dgiyaq. 8Dxeral kiya we niqan mugi biciq, mugi paru, qhuni lipas, qhuni nunuh ma, qutirodux. Dxeral kiya we niqan abura curung ma beyuq walu. 9Dxeral kiya we niqan ani maanu. Meniq su hiya we maha niqan uuqun su, mttuku riyung. Mbtunux dxeral hiya we xiluy. Niqan kkriyan xiluy limuk ka bobo dgiyaq. 10Mpktengi su ma, mptndahu su Utux Tmninun, Utux Baro su. Ado wada na sbege sunan ka dxeral kiya.”
Iya chngii ka Utux Tmninun
11“Qlahang bale ka isu. Iya bale chngii ka Utux Tmninun, Utux Baro su ma, betaq su ini puyu gaya pndakar, gaya bneku ma, kari pndakar na. Kiya ka rnengo mu isu ali saya. 12Wada su mttengi, smalu su sapah malu ma, meniq su ckceka hiya. 13Mrana ka dapa ma miric su ma, mrana ka ging ma king su. Wada mrana kana ka dnoi su de, 14psparu ka lhebun su. Cmhungi su Utux Tmninun, Utux Baro su. Heya we dmnudul isu mlatac dxeral Micrayim sapah pntqliyan su. 15Dmnudul sunan moda su tadus brenux paru ma so kcugun. Niqan quyu puniq, dosan ma, dxeral mddengu uka ba qsiya. Heya uri we ririh isu pyahan na qsiya peeyah ckceka btunux mkere. 16Kiya uri we speekan su na mana uxe nklaan rdrudan su meniq tadus brenux ka heya. Eyux pqraqil, smeung sunan betaq nhdean de maha su mbleyaq. 17Rmengo ka lhebun su: ‘Beyax mu ka pila dnoi mu. Nangal su peeyah beyax baga mu.’ 18Klai bale ka Utux Tmninun, Utux Baro su. Ado beyax ngngalun su pila qnbleyaq we bnege na. Gisu pskere sndehu na quri pusu rdrudan su, mntena so ali saya. 19Nasi su cmhungi Utux Tmninun, Utux Baro su, smnegul su utux icil, qmeepah ma thmuku su heya de, mpdakar ku yamu saya, mphuqil namu ka yamu. 20Wada hmuwa mesa phuqil knkingal qnhlangan meniq berah namu ka Utux Tmninun we, maha namu so kiya mhuqil uri. Ado ini namu qbahang kari Utux Tmninun, Utux Baro namu.”
Currently Selected:
Mege Gaya 8: Stgdaya
Highlight
Copy
Compare
Share
Want to have your highlights saved across all your devices? Sign up or sign in
The Bible Society in Taiwan, 2020
© 台灣聖經公會版權所有，2020
