Mege Gaya 7
7
Seediq Gneegan
(Lnt 34:11-16)
1“Utux Tmninun, Utux Baro su ka dmnudul isu mremux dxeral ngngalun su ma, lmiwaq egu qnlhangan peeyah berah su: Kiya ka 7 qnlhangan mgkala isu mbeyax, seediq Xet, Girgas, Amori, Kenaan, Perijiy, Xiwiy ma Yebus. 2Utux Tmninun we, sbege na yamu ka dheya ma, mphuqil dheya ciida we, asi namu ka phqilun kana ka dheya. Iya bale ppsdehu dheya ma, iya bale glaani ka ddheya 3Iya pkpayi ma pkbaki dheya, kiya de iya angal weewa riso daha ma iya bqani weewa daha ka riso namu uri. 4Ado ptlaxun daha peeyah kenan ka laqi namu ma pthmkuun daha utuutux icil. Kiya de mpquri dheya mbrebur seang na ka Utux Tmninun de maha tnnais ba phuqil isu. 5Maanu so kiya de keso nii ka dyamu: Hrahi ka spuhan daha. Sgliqi ka tikung daha. Btuli ka tikung Aserah ma, psqama ka tikung gnqeran daha.
6Ado isu we nseediq mrtaso Utux Tmninun, Utux Baro su ka isu. Utux Tmninun, Utux Baro su we gmnao isu peeyah kana seediq bobo dxeral ma, ngalan namu na seediq na. 7Gmnaalu sunan ma gmnao yamu ka Utux Tmninun we, uxe ka mgkala knhbragan seediq klegan ka yamu. Bale ba we tgtikuh ba seediq meniq kana klegan seediq ka yamu. 8Ado gmaalu yamu ka Utux Tmninun ma, ado asi ka muyu sndhegan na pusu rdrudan namu. Kiya de Utux Tmninun we sooda na paru beyax baga dmnudul yamu mlatac ma, dmoi baga yamu peeyah qnlhangan Paroh qbsuran paru Micrayim pntqliyan namu. 9So kiya de maha su klaun, Utux Tmninun, Utux Baro su we, heya ka Utux Baro ma, Utux Baro stmaan bale ka heya. Psdehu ba gmaalu betaq 10'00 knxalan dseediq gmaalu heya ma, muyu ba gaya pndakar na. 10Dseediq qmnriqu heya we, cyukun na berah na ma phqilun na ka dheya. Kana qmnriqu heya we, asi na ka cyukun berah na ma, uxe plgila. 11Maanu so kiya de, tgleus bale muyu gaya pndakar, kari pndakar ma, gaya bneku rneengo mu saya ka isu ma, pyugi bale ka kiya.”
Mpbleyaq ka Muyu Gaya Pndakar
(Meg 28:1-14)
12“Nasi namu mbahang gaya bneku ma tgleus bale muyu de, Utux Tmninun, Utux Baro su we mpuyu sndhegan na pusu rdrudan su mpsdehu sunan ma mpgaalu sunan. 13Mpgaalu sunan ka heya ma, mprana kneegu seediq mpbleyaq sunan meniq dxeral sndhegan na pusu rudan bnege na sunan. Kiya uri we mbege mptnlaqi heyi su, gnhiyan dxeral su, pheru pnhgalang su, sino bgurah ma abura bgurah. Kiya uri we wawa dapa ma wawa miric. 14Mpgkala kana seediq bobo dxeral ka qnbleyaq su. Mpkuuka ka rseno uka laqi ma mqedil ini tlaqi. Tnbugan su we maha uka ka ini twawa. 15Utux Tmninun we pqduriq kana mnarux peeyah sunan ka heya. Kana klegan klaun su mnarux Micrayim we uxe meeyah heyi su. Maha krinah meniq kana seediq qmnriqu sunan. 16Asi namu ka phqilun ka kana seediq bnege na yamu ka Utux Tmninun, Utux Baro su. Iya bale glaani meniq doriq namu ka dheya. Iya bale thmuku utux daha, ado mpdurang isu ka nii.
17Nasi smiling ka lhebun su: ‘Dseediq qnlhangan nii we mgkala yami knhbragan seediq daha, huwa mu kesun lmiwaq ka dheya di ho?’ 18Iya kcugi ka dheya. Lnglungi bale ka ndaan Utux Tmninun, Utux Baro su pnooda na Paroh ma kana dxeral Micrayim. 19Kana qntaan su doriq ka paru pnseengan, paru pnskraya, snklwiun noda, paru beyax ka baga ma hiqur baga pnhkero we, ndaan Utux Tmninun, Utux Baro dmnudul mlatac yamu ciida. Utux Tmninun, Utux Baro su we maha so kiya pquri dseediq kcugun su uri. 20Kiya uri we Utux Tmninun, Utux Baro su we mpskagul mnarux punu phuqil dheya ma, betaq mhuqil kana ka dseediq tnugleing qnduriq na. 21Iya pnqhenga miicu quri dheya. Ado Utux Tmninun, Utux Baro su we Utux Baro paru bale kcugun meniq ckceka namu ka heya. 22Utux Tmninun, Utux Baro su we pqdriqun na peeyah berah su ka qnlhangan nii. Uxe namu nseeung nhari phuqil ka dheya. Mhuwa de egu ka ccamac pneeyah bbuyu meyah smeeliq yamu. 23Utux Tmninun, Utux Baro su we sbege na sunan ka dheya. Mprrudu dheya ma betaq wada phqilun kana ka dheya. 24Bege na baga namu ka dqbsuran paru daha ma, mpserus su ngayan daha peeyah bobo dxeral. Mpkuuka ani kingal seediq mptduwa mheyu berah su, betaq wada phqilun kana ka dheya. 25Doi puniq psqmai ka tikung gnqeran dtuutux daha. Iya krwahi ka king, ging gaga bobo tikung. Iya kmmhemuc mangal nanak, kiya de maha su mremux dnurang daha. Ado qnrquun ba Utux Tmninun, Utux Baro su ka nii. 26Iya pstmai sapah su ka qyqeya psaneq. Nasi so kiya de, maha su nak so kiya phqilun ka isu. Asi namu ka psaneq bale ma qmnriqu kiya. Ado asi ka phqilun ka nii.”
Currently Selected:
Mege Gaya 7: Stgdaya
Highlight
Copy
Compare
Share
Want to have your highlights saved across all your devices? Sign up or sign in
The Bible Society in Taiwan, 2020
© 台灣聖經公會版權所有，2020
