Mege Gaya 9
9
Tbrinah ka Seediq
1“Dseediq Israel, qbahang! Mpntaril su yayung Yarden ka ali saya. Mpremux su mangal qnlhangan mgkala knparu isu. Lualang hiya we paru riyung, mntena karac knuglahang ka pnharac qnalang alang daha. 2Dseediq daha hiya we seediq Anaq. Prparu hnyegan daha ma mbeyax heyi daha. Nii we asi su ka klaun. Mnbahang su uri: ‘Ima ka mptduwa mheyu berah seediq Anaq ho?’ 3Klai ba ali saya. Utux Tmninun, Utux Baro su we mptaril meniq berah su. Mntena so puniq srana meekan mphuqil dheya. Kiya uri we meeniq berah su, uxe na baka ka dheya ma, kiya ka tduwa su lwaqun ma phuqil nhari ka dheya. Mntena so rnengo na isu ka Utux Tmninun.
4Bobo wada lmiwaq dheya meniq berah su ka Utux Tmninun, Utux Baro su de, iya rengo so nii ka lhebun su: ‘Ririh knsderux mu dmnudul yaku mangal dxeral nii ka Utux Tmninun.’ Bale ba we, ririh qnquwan noda daha ka wada lwaqan Utux Tmninun peeyah berah su ka dqnlhangan nii. 5Mtduwa su mremux mangal dxeral daha we, uxe knsderux su ma, uxe ini kbiki lhebun su. Mpbale ba we qnquwan noda dqnlhangan nii ka wada lwaqun Utux Tmninun, Utux Baro su peeyah berah su. Mpuyu kari sntangan na pusu rdrudan su Abraham, Yijxaq ma, Yakobu ka Utux Tmninun.”
Wawa Dapa King
(Lnt 32:1-35)
6“Asi su ka klaun, Utux Tmninun, Utux Baro su we uxe knsderux su bnege malu dxeral nii. Isu we dseediq mkere nduyung. 7Klai bale ma iya chngii. Mneniq su tadus brenux ciida we wada su hmuwa mesa pkseang Utux Tmninun, Utux Baro su laali ciida. Pneeyah ali mlatac namu dxeral Micrayim betaq namu dxeral hini we, knteetu namu tbrinah Utux Tmninun. 8Wada namu pkseang Utux Tmninun meniq namu dgiyaq Xoreb ciida. Mnseang yamu ka Utux Tmninun ma wada phuqil yamu uri. 9Mnosa ku dgiyaq, mnangal ku 2 qrtinuh btunux, kiya ka qrtinuh btunux gaga ptasan sndhegan na yamu ka Utux Tmninun. 10Utux Tmninun we sbege na kenan ka 2 qrtinuh btunux, kiya ka pnatis tluding baga Utux Tmninun. Gaga spatis hiya we kiya ka kana kari rnengo na yamu peeyah ckceka rana puniq ali pnsliyan Utux Tmninun dgiyaq ciida. 11Bobo 40 ali 40 rabi de, Utux Tmninun we sbege na kenan ka 2 qrtinuh btunux pnatis pnsdhegan. 12Rmnengo kenan ka Utux Tmninun: ‘Tutuy, heruc peeyah hini nhari! Ado seediq dnudul su peeyah Micrayim we wada mnaqah da. Ma ini beyo mridil peeyah elu rnengo mu ma, smmalu tikung daha nanak ka dheya.’
13Rmengo kenan ka Utux Tmninun: ‘Qnita mu ka seediq nii, qtai! Seediq mkere nduyung ka dheya. 14Iya ku hteri da. Mphuqil ku dheya ka yaku ma, sresun mu ngayan daha peeyah bobo dxeral. Prnaun misu mgkala knparu ma mnbeyax dheya ka qlhangan su.’ 15Kiya de mbrinah hmeruc ku peeyah dgiyaq. Niqan rana puniq sqama ka bobo dgiyaq. Dooyun mu baga mu ka 2 qrtinuh btunux pnatis pnsdhegan. 16Qtaan mu, tai! Wada namu ptuuqu Utux Tmninun, Utux Baro namu smmalu 1 wawa dapa namu nanak ma, tnnais bale wada mkciicil peeyah elu rnengo Utux Tmninun. 17Mnangal ku 2 qrtinuh btunux, wada mu sqada peeyah baga mu betaq tmnemu meniq berah namu. 18Ado kana qnquwan noda namu, wada namu moda qnnaqah oda meniq doriq Utux Tmninun ma pkseang heya. Kiya de mntena ku so cuuxal, tgtemaq ku berah Utux Tmninun 40 ali 40 rabi, ini ku ekan uqun ma ini ku imah qsiya. 19Miicu ku riyung. Ado sqama seang na mquri yamu ka Utux Tmninun ma, kmphuqil yamu. Kiya de we, wada ku na hiya srwaun ka dnurun mu texal kiya. 20Mseang ma kmphuqil quri Aharon ka Utux Tmninun uri. Dmurun ku Aharon ciida ka yaku uri. 21Wawa dapa pqnuuqu noda yamu snmalu namu we desun mu ma, psqmaun mu puniq. Ptnmeun mu nemu rmteruc mntena bengux dxeral. Wada mu srehak qsiya yayung pneeyah dgiyaq.
22Wada namu pkseang Utux Tmninun dungal meniq namu Taberah, Masah ma, Qibrot Hataawah ciida. 23Smkagul yamu mlatac peeyah Qades Barnea ka Utux Tmninun we rmnengo: ‘Sai mangal ka dxeral bbege mu yamu.’ Ciida, wada namu tbrinah, ini thei ma, ini namu qbahang kari Utux Tmninun, Utux Baro namu. 24Peeyah ku mkela yamu we knteetu namu tbrinah Utux Tmninun.
25Ado rmnengo kmphuqil yamu ka Utux Tmninun de, 40 ali 40 rabi ku asi tgtemaq berah Utux Tmninun, mntena so cuuxal. 26Dmurun ku Utux Tmninun: ‘Utux Tmninun Bukung! Ani ba rabang, iya phqili ka dseediq su ma nnisu. Dheya we pnosa su paru ba beyax dmoi baga dheya ma, dnudul su paru ba beyax baga su pnlatac dheya peeyah Micrayim. 27Ani ba rabang, lnglungi ka tnqliyan su Abraham, Yijxaq ma, Yakobu. Iya qtai ka knkere lhebun, tnbrnahan ma, qnquwan noda dseediq nii. 28So uxe mpkeso rmengo ka dseediq Micrayim pnlatac su menan: Utux Tmninun we ini na dheki premux dxeral sntangan na seediq nii ma, tmraqil dheya de, kiya ka dmnudul dheya phqilun na tadus brenux hiya ka dheya. 29Bale ba we, nseediq su ka dheya ma nnisu. Kiya ka sdoi su paru ba beyax ma hnkero hiqur baga su dmnudul platac dheya.’”
Currently Selected:
Mege Gaya 9: Stgdaya
Highlight
Copy
Compare
Share
Want to have your highlights saved across all your devices? Sign up or sign in
The Bible Society in Taiwan, 2020
© 台灣聖經公會版權所有，2020
