Mege Gaya 28
28
Mpbleyaq ka Muyu Gaya Pndakar
(Lew 26:3-13. Meg 7:12-24)
1“Nasi su thei mbahang kari Utux Tmninun, Utux Baro su, tleus muyu kana gaya pndakar na, kiya ka rnengo mu isu saya de, phrnasun namu na kana icil qnlhangan. 2Nasi su Thei mbahang kari Utux Tmninun, Utux Baro su, kana snbleqan nii we meyah heyi su kana ma, psnegul sunan: 3Maangal su snbleqan meniq alang, maangal su snbleqan meniq qnpahan uri. 4Maangal snbleqan kana ka pnttingan su, gnhei dxeral su, tnbugan su, dapa ma, miric su. 5Maangal smbleqan ka bruru ma gmteruc nemu mugi su uri. 6Mosa su nganguc we maangal su smbleqan. Mremux su we maangal su smbleqan uri.
7Utux Tmninun we mptutuy mccebu pais su ma, uxe baka meniq berah su. Dheya we mpooda 1 elu meyah cmebu isu. Kiya de mpqduriq moda 7 elu berah su ka dheya. 8Mpbleyaq sunan ka Utux Tmninun, Utux Baro su quri repun su ma, kana noda baga su. Utux Tmninun, Utux Baro su we mpbleyaq sunan meniq dxeral bnege na sunan. 9Nasi su thei gaya pndakar Utux Tmninun, Utux Baro su, muyu elu na de, heya we mpuyu sndhegan na sunan mmaha seediq mrtaso nheya ka isu. 10Qmita ga su meniq ngayan Utux Tmninun ka seediq bobo dxeral de, mpkiicu isu ka dheya. 11Meniq su dxeral pnstangan na pusu rdrudan bnege na sunan ka Utux Tmninun we, maha msngari bale ka pnttingan su, pnttingan tnbugan ma, gnhiyan dxeral su. 12Utux Tmninun we, mpraguh knmalu pneeyah karac baro, mpooda pndungus mpquyux dxeral su. Mpbleyaq kana noda baga su ka heya. Tduwa su kbrexun dqnlhangan ka pila su ma, uxe su mmaha kmbarux ka isu. 13Nasi su thei mbahang gaya pndakar Utux Tmninun, Utux Baro su, kiya ka rnengo mu sunan saya, tleus su muyu de, maha su meniq berah uxe su meeniq bukuy, meeniq su baro uxe su meeniq toma ka isu. 14Iya psridil ma iya tbrinah kana kari rnengo mu isu saya. Kiya uri we iya snegul utux icil ma, thmuku heya.”
Cniyuk Tbrinah Kari Pndakar
(Lew 26:14-46)
15“Netun su ini qbahang kari Utux Tmninun, Utux Baro su, ini su tleus muyu kana gaya pndakar ma kari pndakar na. Kiya ka rnengo mu isu saya. Kana sniyus we meeyah heyi su ma, mpsnegul sunan: 16Maangal su snyusan meniq su alang su. Maangal su snyusan meniq qnpahan su. 17Bruru su ma ppsaun gmteruc su we, maangal snyusan uri. 18Pntingan su, gnhei dxeral, dapa ma miric su we syusan kana. 19Mosa su nganguc we maangal snyusan, mremux su we maangal snyusan uri. 20Ririh gaga su qmeepah naqah, maalix sunan ka Utux Tmninun. Kana noda baga su we, meeyah isu ka sniyus, mprrudu ma, mpkdira. Betaq su mpkuuka ma uxe su beyo mphuqil. 21Utux Tmninun we, mpsnolun su na mnarux punu. Betaq su mhuqil peeyah dxeral ssaun namu mangal hiya. 22Utux Tmninun we pdaun namu na mnarux berah, mnarux kntlexan, mluqah, mttilux, snipaq hlmadac, bgihur mtilux ma mnarux msburo ka isu. Kana nii we mpsdurak sunan, betaq su mhuqil. 23Mpgxiluy limuk ka karac su baro ma, mntena xiluy knkrean ka dxeral su. 24Knpryuxun bengux Utux Tmninun ka quyux ma, ma meeyah bobo heyi su ka bengux dxeral, betaq su mpkuuka.
25Utux Tmninun we, uxe namu na pbaka meniq berah pais su. Mpooda su 1 elu mosa mccebu pais su ma, mooda su 7 elu qduriq. Ririh isu mpkiicu kana ka seediq bobo dxeral. 26Heyi hnhqilan su we maha ngalun uqun qqbheni skiya karac ma, cmcamac gaga mkkeesa dxeral. Uka ka seediq mliwaq. 27Pdaun su na baso Micrayim, beeba, luqah ma, mgheguh ka Utux Tmninun ma, uka bale ka kkmalu na. 28Pdaun su na mrunge, mbudu ma, pslhebun cmebu isu ka Utux Tmninun. 29Mpiigin su ceka naali, mntena so seediq pkepak migin ckceka mnkuung. Uxe msleelu bale ka elu ddaun su. Maangal su tnsyaxan seediq klaali ma gglekan, uka ka seediq meeyah dmoi baga sunan. 30Mqedil sntrengan su we, maha theyaq seediq icil mtaqi. Sapah snmalu su we, uxe su meeniq ckceka hiya. Qnpahan pnhmaan su lipas we, uxe su meekan gnhei na. 31Byakun berah su ka dapa su we, uxe su uqun ka heyi na. Glekun berah su ka dapa roba su we, uka su ssaun mesa. Wada desun pais su ka miric su we, uka ka seediq mdayo sunan. 32Wada sbege qnlhangan icil ka weewa su. Mptara klaali ka doriq su betaq mbudu. Baga su we uka bale beyax uri. 33Gnhiyan dxeral su ma nangal peeyah bnqresan su we, dseediq uxe su nklaan ka meeyah qmhedu mekan. Tsyaxun su daha klaali ma pexun su daha. 34Qmita su so nii de mpkuni su. 35Mpcebu sunan ka Utux Tmninun. Kiya de mpluqah peeyah bteriq ma papak, peeyah qapal papak su betaq tunux su, uka bale ka kkmalu na.
36Utux Tmninun we maadis isu ma, qbsuran paru qmnlahang sunan mmaha qnlhangan icil uxe nklaan pusu rudan su. Mpthmuku su utux icil hiya, kiya ka qhuni ma btunux. 37Mpliwaq isu meniq ckceka dseediq bobo dxeral ka Utux Tmninun. Kiya de mpkiicu ka seediq ma, mphulis sunan ma, ngalun daha phlisan ka kiya. 38Ani egu ka rehak tnukuy su qnpahan we, mpuuka ba ka kntean su. Ado wada uqun utun kana. 39Ani su qmeepah qnpahan lipas we, uka ka mahun su sino. Uka snkuwan su uri. Ado uqun kuyi ka heyi na. 40Ani stenge curung ka dxeral su we, uxe su mpdehuk mangal abura rricuh su heyi. Ado wada mtuting kana ka heyi na. 41Lqlaqi su uxe mpnisu, ado maha qrapun ka dheya. 42Kana qhuni su, gnhiyan dxeral su we, uuqun utun kana. 43Seediq tnooda su we, maha mgkala sunan. Mprabang knparu ka knparu daha. 44Pkbarux isu ka dheya ma uxe su mpdehuk pkbarux dheya ka isu. Heya ka ngalun tunux, isu we ngalun ngungu. 45Kana sniyus nii we meeyah isu kana. Mpsdurak sunan ma mpskela isu, betaq wada su na phqilun. Ado ini su thei kari Utux Tmninun, Utux Baro su. Ini su puyu gaya pndakar ma kari pndakar na. 46Snyusan nii we maha ngalun pnskraya ma pntqlahang quri isu ma lqlaqi ltlutuc su ani betaq knuwan! 47Ado mbleyaq su ciida we, ini su qqaras meepah Utux Tmninun, Utux Baro su ka lhebun su. 48Kiya de mpkuure, mphqeni, mpbberas ma, meeniq su ini knttuku meepah su pais su. Smkagul Utux Tmninun, meeyah cmebu sunan ka kiya. Psaun na nduyung su ka xiluy kudo, betaq su mhuqil. 49Utux Tmninun ge, maadis 1 qnlhangan peeyah theya riyung ma, peeyah puting dxeral. Mntena so qdiro meeyah gmatuk sunan. Kari dseediq qnlhangan nii we uxe su nklaan. 50Mpahung riyung ka dqeras seediq qlhangan nii. Ini bege dqeras rdrudan ma, ini gaalu rsriso uri. 51Dheya we mpeekan pntingan tnbugan ma, gnhean dxeral su, betaq su pkuuka. Uuqun, sino bgurah ma abura, wawa dapa, miric su we, uxe na krngiun sunan, betaq su mhuqil. 52Tlbuun su na daha cmebu, betaq wada mhurah kana ka paru ba qnalang alang. Dheya we mpqburang sunan meniq dxeral bnege Utux Tmninun, Utux Baro su. 53Pqraqil tmlibu isu ka pais su. Mpeekan su heyi laqi su. Kiya ka lqlaqi bnege na sunan ka Utux Tmninun, Utux Baro su. 54Ckceka su we, ani kesun seediq mnmalu bale we, maha tmraqil mtswai na nanak ma mqedil sgaalu na. Kiya ma kana lqlaqi mnsngari uri. 55Uxe na bege ani biciq ka heyi pnuqan na lqlaqi na. Ado uka ani maanu ka heya, meniq gisu tlbuwan pais ma niqan mqraqil ckceka alang ka dheya uri. 56Ani mgseesu malu ba ka mqedil we, ani so uxe mpqleqah dxeral papak qnbleyaq na ka mqedil we, mptraqil rseno sgaalu na ma, lqlaqi na. 57Ado uka ani maanu ka heya, meniq gisu tlbuwan pais ma niqan mqraqil ckceka alang ka dheya uri. Kiya de asi ka mgleing mekan tnbrean laqi ma lqlaqi pnttingan na.
58Kana kari pnatis gaya patis nii we, pkiicu psparu ngayan Utux Tmninun, Utux Baro su so kcugun ka kiya. Nasi su ini thei, 59mpeeyah paru pnqraqil ka Utux Tmninun. Kiya ka paru snliqan betaq ani knuwan ma, paru kknarux bsiyaq ba ini kmalu meeyah isu ma lqlaqi msnlutuc su. 60Meeyah sunan ma smdaling sunan ka mnarux kcugun su ma kana mnarux Micrayim. 61Kana lmlamu mnarux ini ptsani patis gaya nii we, Utux Tmninun ge, psaun na heyi su, betaq su mpkuuka. 62Ani su mntena so pngerah kneegu. Ririh ini su qbahang kari Utux Tmninun, Utux Baro su de, maha uka ba ka mntngari na. 63Wada hmuwa mesa gmaalu yamu ma prana yamu plaale ka Utux Tmninun we, maha so kiya pphuqil yamu ka Utux Tmninun duri. Maha na pkngalun peeyah dxeral ssaun namu mangal ka dyamu. 64Utux Tmninun we mpkrehak namu na ckceka kana klegan seediq. Peeyah dxeral hini ma betaq dxeral hiya. Meniq namu hiya we, mpthmuku namu utux uxe namu nklaan ma uxe nklaan pusu rudan namu uri. Kiya ka qhuni ma btunux. 65Uxe namu mptbleyaq meniq ckceka kana klegan seediq. Uka sngayan ka qqahun qapal papak namu uri. Utux Tmninun we, pkcugun na ka lhebun su, mpkbudu ka doriq ma, mpkuuwic ka lhebun su meniq su hiya. 66Kana kndesan su we stngayan kniicu. Ani gbiyan ma keeman we, pkiicu su. Knudus su we uka ka mpqlahang na. 67Ririh kniicu lhebun su, qnita doriq su, maha su rmengo mgrebu: ‘Nuuqu keeman ka saya!’ Keeman de mprengo: ‘Nuuqu mgrebu ka saya!’ 68Utux Tmninun we, mdoi asu mpbrinah Micrayim sunan. Mpkkesa elu uxe namu qtaun mnesa ku. Meniq namu hiya we, maha sbaruy mptnqliyan dpais namu ka yamu ma, betaq uka ka seediq mbaruy yamu.”
Currently Selected:
Mege Gaya 28: Stgdaya
Highlight
Copy
Compare
Share
Want to have your highlights saved across all your devices? Sign up or sign in
The Bible Society in Taiwan, 2020
© 台灣聖經公會版權所有，2020
