Mege Gaya 29
29
Msdehu Meniq Moab Dungal
1Bobo sndehu seediq Israel meniq dgiyaq Xoreb ka Utux Tmninun ma, kari nii de rnengo na Moseh, sndehu na seediq Israel meniq Moab hiya. 2Psseli mlawa kana seediq Israel ka Moseh ma rmengo dheya: “Wada namu qtaan ka kana bobo dxeral Micrayim noda Utux Tmninun, pntuura na berah Paroh ma qbsuran mdudul na hiya. 3Kiya ka ntaan su bale doriq ka paru pnspengan ma pnskraya ma, paru sklwiun kiya. 4Kiya de betaq ali saya, Utux Tmninun we ini namu na pgklai lhebun namu na. Ani namu qtaan doriq, ani namu bnhangan birac. 540 knkawas dmnudul ku yamu meniq tadus brenux. Lukus pnlkusan namu we ini ba kslele. Ini kslele ka ramil papak namu uri. 6Ini namu ekan pang, ini namu imah sino ma sino mbeyax uri. Kiya de klaun namu ‘Yaku we, Utux Tmninun, Utux Baro namu’. 7Meyah namu hini ciida, mneyah mccebu ita ka Sixon qbsuran paru Xesbon ma Og qbsuran paru Basan. Mnccebu ta dheya ma, wada ta ini baka ka dheya. 8Wada ta ngalun ka dxeral daha ma, wada ta saasu mege pnswayan rudan Reuben, Gad ma, dmeka Menaseh. 9Maanu so kiya de ndwai ba moda ka kari sndhegan nii ma pyugi ka kiya. Kiya de maha msleelu bale ka kana noda namu.
10Ali saya mheyu namu berah Utux Tmninun, Utux Baro namu, kiya ka txtaxa mdudul, pusu pnswayan rudan, ddrudan, dpnungalan kari, kana drseno seediq Israel, 11dmqedil namu, dseediq tnooda ckceka namu ma, dseediq dmayo yamu mceyax qhuni ma mpbubul qsiya. 12Kiya ka mpremux namu pnsdehu Utux Tmninun, Utux Baro su pnheyu na yamu saya. 13So kiya de, ali saya mpheyu isu ma seediq na. Heya we Utux Baro su, pnuyu na sntangan na sunan. Kiya uri we pnuyu na sndhegan Abraham, Yijxaq ma, Yakobu pusu rudan namu. 14Uxe wano yamu nanak ka ssdehu mu sndhegan nii. 15Kiya ka saya, gisu mtheyaq ita mheyu ka Utux Tmninun, Utux Baro ta. Kiya we kana dseediq uka hini uri.
16Klaun namu bale ka nniqan ta dxeral Micrayim ma ndaan ta qnqlhangan icil, mnoda ta hmrinas ckceka daha. 17Dungal we ntaan namu ka qyqeya psaneq tikung snlmean qhuni, btunux, ging ma, king. 18Maanu so kiya ckceka namu, ani rseno, mqedil, sapah truma ma pnswayan rudan we iya ksridil Utux Tmninun, Utux Baro namu mmaha thmuku utuutux qnqlhangan icil. So kcungun mpheru gamil robo mngihur ma speriq pgcahu ka ckceka namu. 19Seediq so nii ge, nasi ani mbahang kari cmiyus nii, nii ku sbleqan mesa lhebun na dungal, betaq rmengo: ‘Ani ku muyu mnkere lhebun mu moda we, uxe ku mhuwa.’ So kiya de ani niqan qsiya, ani uka qsiya maha mpkuuka kana da. 20Uxe srwaun Utux Tmninun ka heya. Sqama seang ma snhuur Utux Tmninun we mpquri heya meyah ka qrengul. Kana sniyus patis nii we maha heyi na kana. Ngayan na we sresun Utux Tmninun peeyah karac baro. 21Utux Tmninun we, mpooda gaya pnatis patis ma, kana sniyus ckceka pnsdhegan psaanak peeyah pnswayan rudan Israel ka seediq nii ma, maangal hhqilan ka heya. 22Mqita pnqraqil dxeral nii ma, pnknrexan bnege Utux Tmninun ka lqlaqi namu, kiya ka lqlaqi laqi mplutuc pnhyegan namu ma, dseediq icil pneeyah theya. 23Kana dxeral nii we psqmaun bengux mhada ma timu. Uka ttkuyan ma ini heru ka rehak, uka ani 1 speriq ma mntena alang Sedom, Amorah, Admah ma, Ceboyim wada sgliqan pneyah sqama seang Utux Tmninun. 24Mprengo kana ka seediq qnlhangan: ‘Hmuwa melux wada mchaya dxeral nii ka Utux Tmninun ho? Ma wada so nii sqama seang na ho?’ 25Mprengo ka seediq: ‘Noda so nii we, ririh dseediq dxeral nii ka wada malix sndhegan pnheyu daha Utux Tmninun, Utux Baro daha, kiya ka dmnudul dheya peeyah dxeral Micrayim. 26Mnosa qmeepah utuutux icil ma tmbqelic thmuku utux uxe daha nklaan. Noda nii we ini srwai Utux Tmninun. 27Maanu so kiya de wada msqama mseang dxeral nii ka Utux Tmninun. Wada na pyahun dxeral nii ka kana sniyus pnatis patis nii. 28Peyah tnpreqan ma sqama seang ka Utux Tmninun, ckceka paru seang wada na kgusun gmabil ma qmada dxeral icil ka dheya, mntena so saya.’
29Lneing noda we nuUtux Tmninun, Utux Baro ta. Kiya de noda pntuura na we, nita ma lqlaqi laqi ta kiya. Tai so mpuyu ta kana kari gaya nii.”
Currently Selected:
Mege Gaya 29: Stgdaya
Highlight
Copy
Compare
Share
Want to have your highlights saved across all your devices? Sign up or sign in
The Bible Society in Taiwan, 2020
© 台灣聖經公會版權所有，2020
