Mege Gaya 27
27
Gaya Pnatis Bobo Btunux
1Rmengo seediq Israel ka Moseh ma drudan: “Ndwai moda ka kana gaya pndakar rrengo miyan yamu ali saya. 2Ali mtaril namu yayung Yarden, mremux namu dxeral bnege Utux Tmninun, Utux Baro su ciida, pteetu ka duma btunux paru ma rcuhi qbulic btunux. 3Wada su mtaril yayung, mremux su dxeral psbyeqan nunuh ma walu de, pntena so sntangan Utux Tmninun, Utux Baro pusu rdrudan su, Ptasi bobo btunux ka kana kari gaya nii. 4Mntaril namu yayung Yarden de, mpuyu namu rnengo mu, mpteetu namu btunux nii ma rcuhun namu qbulic btunux meniq dgiyaq Eybal hiya. 5Meniq su hiya we, mpsalu su 1 spuhan btunux Utux Tmninun, Utux Baro su. Kiya we iya doi xiluy bobo btunux kiya. 6Asi namu ka mangal btunux ini gqeri smalu namu spuhan. Psaun bobo spuhan nii bbege namu snapuh psqmaun Utux Tmninun, Utux Baro su. 7Mbege namu snapuh ptbale dungal ma, mpqaras namu mekan hiya meniq berah Utux Tmninun, Utux Baro su. 8Ptrani matis btunux hiya ka kana kari gaya nii.”
9Kiya de rmengo kana seediq Israel ka Moseh ma dseediq msapuh Lewiy: “Seediq Israel! Tgseesu mbahang! Wada namu na ngalun seediq nuUtux Tmninun, Utux Baro su ali saya ka yamu. 10Thei mbahang kari Utux Tmninun, Utux Baro su. Pyugi ka gaya ma kari pndakar na. Kiya ka rnengo mu isu saya.”
Syusun ka Tbrinah
11Ali ciida, rmengo seediq ka Moseh: 12“Mntaril namu yayung Yarden de, mpheyu namu dgiyaq Gerijim hiya ma, mpsbleyaq namu seediq ka pnswayan rudan dseediq Simeon, Lewiy, Yehudah, Yisaskar, Yosehu ma, Binyamin. 13Mpheyu dgiyaq Eybal hiya ma, mprengo sniyus ka dseediq pnswayan rudan Reuben, Gad, Aser, Jebulun, Dan ma, Naptaliy. 14Pkparu mlawa rmengo seediq Israel ka dseediq Lewiy:
15‘Kana snmalu tikung psbasi Utux Tmninun, ani gnequr, nuduh xiluy. Kiya ka snmalu seediq mpsalu, uxe uri we lneing daha smmalu. Seediq nii we asi ka syusun!’ Cmiyuk rmengo ka seediq: ‘Ameng!’
16‘Ini psparu tama bubu we, asi ka syusun! Cmiyuk rmengo ka seediq: Ameng!’
17‘Ptheruy ayus dxeral we, asi ka syusun! Cmiyuk rmengo ka seediq: Ameng!’
18‘Ppgedang elu mbudu seediq we, asi ka syusun!’ Cmiyuk rmengo ka seediq: ‘Ameng!’
19‘Qmnuuqu psgao msderux dseediq tnooda, lqlaqi uka tama bubu ma, mqedil mqrinuc we, asi ka syusun! Cmiyuk rmengo ka seediq: Ameng!’
20‘Mtheyaq mtaqi ririh bubu we, asi ka syusun! Cmiyuk rmengo ka seediq: Ameng!’
21‘Mmhemuc msuupu mtaqi camac we, asi ka syusun! Cmiyuk rmengo ka seediq: Ameng!’
22‘Msuupu mtaqi daha laqi mqedil mtswai na nanak ka 1 tama ini pntena bubu ma, 1 bubu ini pntena tama we, asi ka syusun! Cmiyuk rmengo ka seediq: Ameng!’
23‘Msuupu mtaqi daha bubu mqedil su we, asi ka syusun! Cmiyuk rmengo ka seediq: Ameng!’
24‘Gmruus phuqil seediq ssiyo su we, asi ka syusun! Cmiyuk rmengo ka seediq: Ameng!’
25‘Mangal pnslabu ma mosa mmhemuc psdara uka qnquwan we, asi ka syusun! Cmiyuk rmengo ka seediq: Ameng!’
26‘Ini ptkere muyu kari gaya nii we, asi ka syusun! Cmiyuk rmengo ka seediq: Ameng!’”
Currently Selected:
Mege Gaya 27: Stgdaya
Highlight
Copy
Compare
Share
Want to have your highlights saved across all your devices? Sign up or sign in
The Bible Society in Taiwan, 2020
© 台灣聖經公會版權所有，2020
