Mege Gaya 16
16
Gaya Smseman Hrnasan
(Lnt 12:1-20. Lew 23:5-8. Spe 28:16-25)
1“Asi su ka smseman idas Abidu. Mpquri su Utux Tmninun, Utux Baro su smmesung Hrnasan. Ado meniq idas Abidu ciida, dmnudul isu mlatac peeyah Micrayim ka Utux Tmninun, Utux Baro su. 2Asi su ka meniq hiya, kiya ka nniqan gnao na pheyu ngayan na ka Utux Tmninun. Mpeeyah dapa ma miric bbege namu Utux Tmninun, Utux Baro su ka snapuh smseman Hrnasan. 3Snapuh nii we, iya bale ptheyaq tgeda mekan. Ado mntgaaguh su mlatac pneeyah dxeral Micrayim. Asi su ka mekan pang ini psai tgeda mk7 ali, kiya ka pang mqraqil. So maha su lnglungun kana kndesan su ka ali mnlatac su peeyah dxeral Micrayim ciida. 4Meniq kana dxeral su we, asi ka mk7 ali ini bale qtai ka tgeda. Heyi snapuh su tgkingal ali keeman ciida we, asi ka ini su rngii betaq mgrebu so kusun. 5Ini su tduwa mege snapuh smseman Hrnasan meniq lualang bnege Utux Tmninun, Utux Baro su. 6Wano bale hiya. Kiya ka nniqan pnheyu ngayan gnao Utux Tmninun, Utux Baro su. Bege snapuh su smseman Hrnasan priyax hido keeman ciida. Kiya ka mnlatac su peeyah Micrayim ciida. 7Asi su ka muduh ma mekan heyi spuhan nniqan gneegan Utux Tmninun, Utux Baro su hiya. Mgrebu so kusun de, osa mbrinah kobu namu da. 8Mk6 ali uqi pang ini psai tgeda. Tg7 ali de iya qeepah ma, psseli thmuku Utux Tmninun, Utux Baro su.”
Gaya Smseman Ktean
(Lnt 34:22. Lew 23:15-21. Spe 28:26-31)
9“Spegi mn7 ka 7 ali: Peeyah su dmoi kawil qburung prading su qmburung ciida. Kana ba we mn7 ka 7 ali. 10Asi su ka smesung ali 77 mquri Utux Baro. Puyu so snbleqan Utux Tmninun, Utux Baro su mege snapuh pneeyah lhebun. 11Asi namu ka meniq alang kana ka isu, lqlaqi su, tnqliyan ma, dseediq Lewiy, dseediq tnooda, laqi uka tama bubu ma mqedil mqrinuc gaga meniq lualang su. Meniq nniqan pnheyu ngayan gnao Utux Tmninun, Utux Baro su hiya ma, mpqqaras namu berah Utux Tmninun, Utux Baro su. 12Lnglungi bale tnqliyan su meniq Micrayim, kiya uri we asi su ka tleus muyu kari pndakar nii uri.”
Gaya Smseman Pkobu
(Lew 23:33-43. Spe 29:12-39)
13“Bobo mnhedu su mangal uqun ma qmepu sino de oda mk7 ali smseman Pkobu. 14Suupu mqaras smseman nii ka isu, lqlaqi su, tnqliyan ma, dseediq Lewiy gaga lualang su, dseediq tnooda, lqlaqi uka tama ma bubu ma, mqedil mqrinuc. 15Meniq su nniqan gnao Utux Tmninun, mpquri su Utux Tmninun, Utux Baro su smesung mk7 ali. Ado Utux Tmninun, Utux Baro su we smbleyaq kana nangal su ma kana qneepah baga su ka heya. Kiya ka mqaras su riyung.
16Kana rrseno tnsapah su ge, asi ka smmesung smseman uka tgeda, smseman ktean ma, smseman pkobu. Mn3 ka 1 knkawas mosa tqita heya meniq thmkuwan gnao Utux Tmninun, Utux Baro su hiya. Iya chungi madis bbege namu Utux Tmninun. 17Txtaxa seediq we pdai beyax namu, pooda gnhuwe bnege Utux Tmninun, Utux Baro su mege snapuh.”
Mpsderux Mpsgao
18“Meniq su lualang bnege Utux Tmninun, Utux Baro su, txtaxa pnswayan pusu rudan we, pheyu qbsuran mpsgao ma mpdudul. 19Iya bale qmnuuqu psgao msderux. Iya qita dqeras seediq ma, iya angal lnabu. Ado pkbudu doriq seediq knkela ka lnabu. Kiya uri we pkridil kari seediq msderux uri. 20Ini psaanak! Sdurak ini psaanak, kiya ka pkuudus sunan ma, maangal dxeral bnege Utux Tmninun, Utux Baro su.”
Bsaniq Thmkuwan Utux Baro
21“Smalu su spuhan Utux Tmninun, Utux Baro su we, iya phmai qhuni ssiyo spuhan ssmalu su Aserah. 22Dungal we iya pheyu eruc btunux hnyegan, trqilun Utux Tmninun, Utux Baro su ka nii.”
Currently Selected:
Mege Gaya 16: Stgdaya
Highlight
Copy
Compare
Share
Want to have your highlights saved across all your devices? Sign up or sign in
The Bible Society in Taiwan, 2020
© 台灣聖經公會版權所有，2020
