Mege Gaya 15
15
Gaya Knkawas Sngayan
1“Qnhdean tnugpitu knkawas we asi namu ka ppsruwa. 2So nii ka ddaun namu ppsruwa: Kana pnkusa mntswai namu we asi ka srwaun namu. Iya psai ka knbrexan seediq ssiyo ma mntswai su. Ado tena wada gmarang rmengo ka Utux Tmninun. 3Ani su nak pgsaun ka dseediq icil. Kiya we ani manu pnkusa mntswai su we, asi su ka srwaun kana. 4Bale ba we, uxe mpniqan qrinuc ka ckceka namu. Ado meniq namu dxeral bnege Utux Tmninun, Utux Baro we, mpbleyaq riyung isu ka Utux Tmninun. 5Asi su ka tgleus mbahang kari pneeyah Utux Tmninun, Utux Baro su, muyu ba kana pnosa na kari sunan saya. 6Ado Utux Tmninun, Utux Baro su we mpooda sntangan na pbleyaq sunan. Kiya uri we ani su nak pkbarux pila hbaro seediq icil ma, uxe maha migin kbrexan ka isu. Mpqlahang su egu qnhlangan, dheya we uxe mpqlahang sunan.
7Meniq namu dxeral ma lualang bnege Utux Tmninun, Utux Baro, nasi niqan 1 ka seediq qrinuc mtswai su de, asi su ka ini krkere ka lhebun su, betaq su tgkemu baga ini dayo qrinuc mtswai su. 8Asi su ka hmkero baga dmayo mtswai su. Pdai so ini na knttuku pkbarux heya ma pttuku heya. 9Qlahang bale! Iya bale peeyah naqah lhebun, rmengo: ‘Daling ka tg7 knkawas da’, kiya de qmnriqu ka doriq su qmita qrinuc mtswai ma, ini su biqi ani manu ka heya. Nasi ririh isu mosa dmurun Utux Tmninun ka heya de, niqan qnquwan noda ka isu da. 10Qrasi mege ka lnglungan su. Mege su ciida we iya pniqi knraguh ka lhebun su. Ado ririh noda nii de, Utux Tmninun, Utux Baro su we mpbleyaq kana qneepah su ma noda baga su ka heya. 11Ado uxe mpkuuka ka seediq qrinuc bobo dxeral. Kiya ka mprengo ku sunan: ‘Asi su ka hmkero baga su klaai dmayo mtswai su gaga mqraqil tqrinuc bobo dxeral.’”
Gaya Tnqliyan
(Lnt 21:1-11)
12“Ckceka mtswai su, nasi niqan ka rseno ma mqedil seediq Hiburu wada sbaruy sunan, kiya de betaq mnhedu qmeepah 6 knkawas sunan de, tg7 knkawas de ptraguh posa peeyah isu da. 13Ptraguh su pposa heya mlatac ciida we, iya pbrasi posa. 14Asi su ka mangal duma miric, uqun ma, sino mqaras mege heya. Utux Tmninun, Utux Baro su we mpsbleyaq sunan ka heya. 15Asi su ka lnglungun tnqliyan su meniq dxeral Micrayim. Utux Tmninun, Utux Baro su ka dmnoi baga sunan. Kiya ka so nii, betaq ku rmengo isu quri so ooda nii. 16Nasi rmengo sunan ka heya: ‘Uxe ku mplatac peeyah sapah su’, ado gmaalu sunan ma kuxul na meniq ka sapah su hiya. 17Saani mangal qrequr sndlani rhengun sapah lmihu ka gnbeling birac na. Kiya de mptnqliyan namu ani betaq knuwan ka heya. Pntnaani so nii ka tnqliyan mqedil uri. 18Iya ngali so mqraqil ka ptraguh mlatac peeyah sunan ka heya. Ado tena wada dmayo qmeepah 6 knkawas ka heya di. Mntena ba sntkean na ka wada na msn2 sksadu meepah heya. So kiya de mpbleyaq kana noda su ka Utux Baro Tmninun su.”
Gaya Dapa ma Miric Pnlaale Pntwawa
19“Pnlaale pntwawa ka dapa ma miric we, kana so balas na we, asi namu ka psnakun prtaso mege Utux Tmninun, Utux Baro su. Dapa pnlaale pntwawa we, iya ngali mpqeepah. Miric pnlaale mntuting we, iya tapi ka ubal na. 20Pnlaale mntuting nii we, kn1 knkawas isu ma kana tnsapah su we maha namu nniqan gnao Utux Tmninun, saun namu mekan berah Utux Tmninun, Utux Baro su hiya. 21Nasi ini pttuku hnyegan, mpika ma, mbudu, uxe uri we niqan qnnaqah na we, asi namu ka ini biqi Utux Tmninun, Utux Baro su. 22Ani namu nak uqun lualang namu. Seediq uka rutiq ma mrutiq we ani nak mekan kana. Mntena so mekan heyi rqenux rabang ma rqenux. 23Wano dara daha we, iya bale uqi. Asi namu hrigun dxeral, mntena so hmeruy qsiya.”
Currently Selected:
Mege Gaya 15: Stgdaya
Highlight
Copy
Compare
Share
Want to have your highlights saved across all your devices? Sign up or sign in
The Bible Society in Taiwan, 2020
© 台灣聖經公會版權所有，2020
