Mege Gaya 11
11
Tgparu Bale nuUtux Baro
1“Glaani ka Utux Tmninun, Utux Baro su. Tgleus muyu rnengo na, kari pndakar, gaya bneku ma, gaya pndakar na klaali. 2Kela bale ali saya. Uxe lqlaqi namu. Ado ini kela ka dheya. Uxe qmnita pnseru Utux Baro, tnugparu na bale, paru beyax baga na ma, hnkero hiqur baga Utux Tmninun, Utux Baro su ka dheya. 3Kiya uri we ndaan na so sklwiun noda mquri Paroh qbsuran paru Micrayim ma, kana dxeral na meniq Micrayim. 4Wada hmuwa mesa pquri dsupi Micrayim, dapa dmay ma rulu mccebu. Smndurak yamu ciida ka dheya we, Utux Tmninun we wada hmuwa mesa dmoi qsiya rcilung Mtanah mubung dheya ma, phuqil dheya betaq ali saya. 5Hmuwa mesa pquri yamu meniq namu tadus brenux, kiya ka betaq namu meyah dxeral hini. 6Dungal we hmuwa mesa pquri lqlaqi laqi Reuben ma, Datan ma Abiram laqi Eliyab, dxeral we wada hmuwa mesa mhebil rmaguh ckceka seediq Israel ma, rmequn dheya ma kana tnsapah, kobu ma, kana mnsuupu dheya ka mnuudus. 7Wano ba yamu ka qmnita bale kana paru noda Utux Tmninun.”
Qqbleyaq Dxeral Sntangan
8“Manu so kiya de, asi namu ka tlleus muyu kana gaya pndakar mu yamu ali saya. Kiya de mbeyax namu de, mpremux namu mangal dxeral ngngalun namu. Kiya ka dxeral ngngalun namu mtaril yayung hiya. 9Kiya de mpqbsiyaq namu muudus dxeral psbyeqan nunuh ma walu sndhegan Utux Tmninun bbege na pusu rdrudan namu ma, lqlaqi mnslutuc daha hiti. 10Osa mremux mangal dxeral kiya. Uxe su pntena Micrayim pnlatac su. Meniq su Micrayim we, bobo tmnukuy su rehak de, asi su ka cyuqun qsiya moda papak su. Mntena so cmuwaq qsiya sama pnhmaan. 11Dxeral ssaun namu mangal kiya we, niqan dgiyaq ma ayu. Sqyexan bale quyux peeyah karac baro ka dxeral kiya. 12Kiya ka dxeral qnlhangan Utux Tmninun, Utux Baro su. Peeyah pnrdingan knkawas betaq qnhdean knkawas we, qmlahang dxeral kiya klaali ka Utux Tmninun, Utux Baro su.
13Nasi namu qmlahang muyu gaya pndakar mu ali saya, gmaalu Utux Tmninun, Utux Baro su ma, peeyah kana lhebun ma kana lnglungan namu qmeepah namu heya de, 14mpuyu ku knpryuxan karac pqyexun mu ka dxeral namu. Kiya ka quyux mprbagan ma mpmisan ka dxeral namu. Kiya de mpdehuk namu smeku uuqun, sino bgurah ma, abura bgurah. 15Quri so tnbugan namu we phreun mu speriq ka qnpahan. So kiya de, mpktengi namu bale. 16Qlahang bale! So uxe psrdilun ka lhebun namu ma, pqriun namu na qmeepah tikung icil ma thmuku dheya. 17Kiya de maha mquri yamu mseang ka seang Utux Tmninun de, hterun na ka karac uxe mpeeyah quyux ma, uxe mpeeyah hnrean ka dxeral. Meniq malu dxeral bnege Utux Tmninun hiya we maha namu uxe beyo mpkuuka.
18Pniqi bale lhebun namu ka kari mu nii. Psai bale lnglungan namu ma, pskrai bale baga namu ma, smlei kulu psaun kari ka kduruk namu. 19Asi namu ka tgsaun kari nii ka lqlaqi namu. Ani gaga tleung sapah, mkkesa elu, trqeraq ma, mtutuy we asi su ka rngagun. 20Dungal we ptsani eruc rhengun sapah ma bobo rhengun alang. 21Kiya de, ali kndesan namu ma lqlaqi namu de, maha mrana mntena qnbsiyaq karac ma dxeral meniq namu dxeral sndhegan Utux Tmninun bbege na pusu rdrudan namu. 22Nasi namu qmlahang tlleus muyu mooda kana gaya pndakar rnengo mu yamu, gmaalu namu Utux Tmninun, Utux Baro namu ma muyu kana elu na ma, smneegun bale heya de, 23Utux Tmninun we maha meniq berah namu mpliwaq kana qnlhangan berah namu. Maha namu mangal qnlhangan mgkala knparu ma knbeyax yamu uri. 24Kana dxeral qnlqahan qapal papak namu we maha nnamu kana. Peeyah tadus brenux betaq Lebanon, peeyah yayung paru Euhrates betaq rcilung pryaxan hido. Kana nii we maha dxeral namu. 25Uka ani 1 seediq mpdehuk mheyu berah namu. Utux Tmninun, Utux Baro namu we mpuyu rnengo na, mpeeyah kcugun ma smtali ckceka dxeral qneeqah namu hiya.
26Tai, sptuura mu berah namu ka ssbleyaq ma cmiyus ali saya. 27Nasi namu puyu gaya pndakar Utux Tmninun, Utux Baro namu, kiya ka rnengo mu saya de, mpbleyaq namu. 28Nasi namu ini puyu gaya pndakar Utux Tmninun, Utux Baro namu ma, mkriiril namu mquri elu uxe rnengo mu ali saya de, maha namu mangal snyusan. 29Utux Tmninun, Utux Baro su dmnudul isu mremux dxeral ngngalun namu de, asi namu ka pgkela qnbleyaq meniq dgiyaq Gerijim. Pgkela snyusan meniq dgiyaq Eybal. 302 dgiyaq nii we nuuxe gaga meniq quri pryaxan hido yayung Yarden, ga meniq Arabah dxeral seediq Kenaan, berah Gilgal ma, smdaling raus qhuni Moreh hiya peni? 31Mpntaril namu yayung Yarden, mpremux namu dxeral ngngalun namu bnege Utux Tmninun, Utux Baro namu. Bobo ngalun namu ma, meniq namu hiya de, 32tleus bale muyu kana kari pndakar ma gaya bneku rnengo mu berah namu ali saya.”
Currently Selected:
Mege Gaya 11: Stgdaya
Highlight
Copy
Compare
Share
Want to have your highlights saved across all your devices? Sign up or sign in
The Bible Society in Taiwan, 2020
© 台灣聖經公會版權所有，2020
