Mege Gaya 12
12
Wano Kingal ba Nniqan Thmkuwan
1“Muudus namu bobo dxeral ciida, meniq namu dxeral bnege Utux Tmninun, Utux Baro ndrudan namu. Tlleus muyu kari pndakar ma gaya bneku nii ka yamu:
2Bobo namu wada ngalun ka qnlhangan kiya ka dxeral thmkuwan duutux icil daha de, ani gaga dgiyaq baro, dgiyaq biciq ma, toma qhuni we, asi namu ka hrahun kana. 3Hurah ka spuhan daha, ptnemu ka eruc btunux pnhyegan. Psqmai puniq ka tikung Aserah, pstemaq kana ka tikung duutux hnyegan qnequr daha. 4Iya so kiya tthmuku namu Utux Tmninun, Utux Baro namu. 5Utux Tmninun, Utux Baro namu we, gmao nniqan phyegan na ngayan na meniq knkingal ckceka dxeral pnswayan rudan namu. Maha namu dmurun hiya ka yamu. 6Desi hiya kana ka snapuh psqama, ssapuh, bbege 1 tnugmxalan, snapuh ppheyu, snapuh sndhegan, snapuh pneeyah lhebun ma, kana ddapa ma mmiric tgplaale pnwawa. 7Meniq namu hiya, isu ma kana tnsapah su we, tduwa namu meekan berah Utux Tmninun, Utux Baro namu. Dungal we qneepah baga namu we mpqaras namu smbleqan Utux Tmninun, Utux Baro su. 8Iya qeepah so mntena qneepah nami ali saya. Txtaxa namu we asi ka meepah kana noda malu meniq ckceka doriq namu. 9Ado yamu saya we, ini namu remux dxeral psngayan ngngalun su, bnege Utux Tmninun, Utux Baro su na. 10Bobo namu mntaril yayung Yarden de, mpeeniq namu dxeral ngngalun namu bnege Utux Tmninun. Mptbleyaq namu meniq hiya ma, uxe mprudu yamu ka kana pais ssiyo namu. Mpbleyaq namu meniq hiya. 11Ciida, asi namu ka desun ka snapuh psqmaun, snapuh, bbege 1 tnugmxalan, snapuh ppheyu baga namu ma, snapuh malu sndhegan namu quri Utux Tmninun. Kana nii we desi nniqan pnhyegan ngayan Utux Tmninun, Utux Baro namu hiya. 12Isu ma, lqlaqi, tnqliyan ma dseediq meniq ckceka lualang namu we, uka ka seediq Lewiy mptheyaq yamu maangal dxeral. Dheya we asi ka mqaras meniq berah Utux Tmninun, Utux Baro namu ka dheya. 13Qlahang ka yamu. Mege namu snapuh psqmaun we, iya osa spuhan sneung nanak kuxul namu. 14Wano nniqan gnao Utux Tmninun ka 1 pnswayan pusu rudan peeyah ckceka namu we, kiya ka sai mege snapuh psqama hiya. Pyugi kana rnengo mu isu meniq namu hiya.
15Kiya de, mpuyu namu qnbleyaq bnege Utux Tmninun, Utux Baro su, pooda lnglungan namu phuqil tnbugan ma mekan heyi meniq namu lualang su. Ani seediq uka rutiq ma seediq niqan rutiq ani nak mekan kana. Mntena so mekan heyi rqenux rabang ma rqenux. 16Wano ba dara ka iya bale uqi. Asi su ka sheruy dxeral, mntena so hmeruy qsiya. 17Iya uqi alang su hiya ka pnhgalang, sino nbgurah ma, 1 tnugmxalan abura, ddapa ma mmiric tgplaale pnwawa su. Uxe uri we snapuh sndhegan, snapuh pneeyah lhebun ma, snapuh pnheyu su. 18Asi su ka mekan berah Utux Tmninun, Utux Baro su. Meniq nniqan gnao Utux Tmninun, Utux Baro su. Anak mekan kana ka isu, lqlaqi, tnqliyan ma dseediq Lewiy meniq lualang su. Kiya uri we ririh kana qneepah baga su, qrasi meniq berah Utux Tmninun, Utux Baro su. 19Qlahang bale ka isu. Iya bale lixi ani betaq knuwan ka seediq Lewiy meniq namu dxeral nniqan su.
20So sntangan Utux Tmninun, Utux Baro namu, bobo wada namu na prnaan hiya ka dxeral de mkmekan namu heyi we, rmengo namu: ‘Meekan ku heyi’ de tduwa su nanak pooda lnglungan su mekan heyi. 21Nasi theya sunan ka nniqan gnao Utux Tmninun, Utux Baro su de, tduwa su nak smeeliq mangal dapa ma miric bnege Utux Tmninun, pooda lnglungan su ekan ckceka lualang namu. 22Bale ba we, pntena so mekan namu heyi rqenux rabang ma rqenux, mtduwa spuun mekan kana seediq ini qrutiq ma seediq mrutiq. 23Kiya de, iya bale klgelu ka lhebun namu, wano dara ka iya ba uqi. Ado knuudus ka dara. Iya pspui mekan ka knuudus ma heyi. 24Iya ekan dara ka isu. Asi su ka hrigun dxeral mntena so hmeruy qsiya. 25Iya ekan dara ka isu. So maha mangal qnbleyaq ka isu ma lqlaqi su. Ado malu noda su meniq ckceka doriq Utux Tmninun. 26Wano ba qyqeya pnsnakan su mrtaso ma sndhegan su we, asi su ka desun nniqan gnao Utux Tmninun hiya. 27Snapuh psqmaun we, kana heyi ma dara na we, asi su ka sbege bobo spuhan Utux Tmninun, Utux Baro su hiya. Dara snapuh we, asi su ka sheruy bobo spuhan Utux Tmninun, Utux Baro su. Heyi na we duwa su nak uqun. 28Tleus muyu kana kari rnengo mu ka isu. So maha mangal qnbleyaq ani betaq knuwan ka isu ma lqlaqi su. Ado malu ma msderux ka noda su meniq ckceka doriq Utux Tmninun, Utux Baro su.
Iya Thmuku Utux Icil
29Utux Tmninun, Utux Baro su we, wada na pkuuka mangal ka dqlhangan qmlwaqun su. Kiya ka maangal namu dxeral daha. 30Qlahang bale ka yamu. Bobo wada sqada peeyah berah namu ka dheya de, iya bale psrdili ma smnegul dheya ma, iya bale osa smiling utux daha, betaq rmengo: ‘Hmuwa mesa thmuku utux daha ka dheya we, mpuyu ku so kiya ka yaku uri.’ 31Iya bale pquri Utux Tmninun, Utux Baro su moda so nii. Ado dheya we wada moda kana noda trqilun ma uxe kuxul Utux Tmninun, Utux Baro su mquri utux daha ka dheya. Betaq daha wada psqmaun puniq ka lqlaqi daha ma, sbege daha utux daha. 32Kana rnengo mu ooda namu we, asi namu ka tleus muyu. Iya bale prnai ma iya bale liihi uri.”
Currently Selected:
Mege Gaya 12: Stgdaya
Highlight
Copy
Compare
Share
Want to have your highlights saved across all your devices? Sign up or sign in
The Bible Society in Taiwan, 2020
© 台灣聖經公會版權所有，2020
