Mege Gaya 10
10
Msnpusal Mangal Gaya Pndakar ka Moseh
(Lnt 34:1-10)
1“Ciida, rmengo kenan ka Utux Tmninun: ‘Osa qmrequr 2 qrtinuh btunux, mntesa so plaale ma, eyah bobo dgiyaq yaku hini. Kiya uri we asi su ka smalu kulu snmalu qhuni uri. 2Pnatis mu plaale bobo btunux wada su stmaqun ka ppatis mu bobo btunux nii. Kiya de skuun su peeniq ckceka kulu nii ka qrtinuh btunux nii.’ 3Kiya de ssmalu mu tgebil ka kulu ma, qmrequr ku 2 qrtinuh btunux mntena so plaale. Dmoi ku 2 qrtinuh btunux nii ma mgkala bobo dgiyaq. 4Utux Tmninun we sptena na pnatis plaale, spatis na bobo qrtinuh btunux nii ka 10 gaya pndakar rnengo na peeyah ckceka puniq ali mnsseli namu ciida. Sbege na kenan ka kiya. 5Mbrinah hmeruc ku peeyah dgiyaq ma, psaun mu kulu snmalu mu. Ani betaq saya, gaga nanak meniq hiya ka qrtinuh btunux nii. Mntena rnengo na kenan ka Utux Tmninun.
6(Mnlatac peeyah Pirobini Yakan ka seediq Israel betaq Moserot. Mnhuqil hiya ka Aharon de, reesun daha hiya. Lmutuc heya mangal qpahan mpsapuh ka Elajar laqi na. 7Mlatac peeyah hiya ka dheya ma meyah betaq Gudgodah. Dungal we peeyah Gudgodah meyah dehuk Yatbatah, dxeral niqan yayung ma qsiya. 8Ciida, Utux Tmninun we ptgaanak pnswayan rudan Lewiy mpheal kulu pnsdhegan Utux Tmninun ka dheya. Dungal we mpqeepah meniq berah Utux Tmninun ma, mdoi ngayan na pbleyaq betaq ali saya. 9Maanu so kiya de, seediq Lewiy we ini pntena so mtswai na niqan pusu dxeral. Utux Tmninun, Utux Baro su ka pusu dnoi daha. Mntena so Utux Tmninun, Utux Baro su sntangan na heya.)
10Mntena ku so plaale 40 ali 40 rabi nniqan mu bobo dgiyaq. Wada ku na srwaun ku nii ka Utux Tmninun. Ini phuqil isu ka heya. 11Rmengo kenan ka Utux Tmninun: ‘Tutuy, osa berah seediq. Dduli mremux dxeral bbege sndhegan mu pusu rdrudan daha.’”
Pgsaun Utux Baro
12“Israel! Maanu ka pgsaun Utux Tmninun, Utux Baro su ho? Wano ba kiicu Utux Tmninun, Utux Baro su, muyu kana elu na ma, gmaalu heya ma, peeyah kana lhebun ma kana lnglungan qmeepah Utux Tmninun, Utux Baro su. 13Tlleus muyu gaya pndakar ma kari pndakar Utux Tmninun. Kiya ka rnengo mu yamu ali saya. Kiya ka angal namu qnbleqan. 14Qtai! NuUtux Tmninun, Utux Baro su ka karac ma karac bobo karac ma, dxeral ma kana nniqan dxeral. 15Kiya de, gmaalu ba pusu rudan su ka Utux Tmninun ma gmaalu dheya ma gmao yamu peeyah kana seediq, kiya ka lqlaqi mnslutuc daha mntena so ali saya. 16Pdai ptgaya psalak ka lhebun namu. Iya kkere ka nduyung namu. 17Ado Utux Tmninun, Utux Baro su we Utux kana uutux, Bukung kana bbukung. Kiya ka Utux Baro tgparu, paru ba beyax, kcugun bale. Ini qita dqeras seediq ma ini kmmhemuc mangal lnabu uri. 18Ptuura uka qnquwan lqlaqi uka tama ma bubu ma, mqedil mqrinuc ka heya. Qmlahang seediq tnooda ma, mege lukus ma uuqun dheya. 19So kiya de, asi namu ka gmaalu seediq tnooda. Ado tnooda namu meniq dxeral Micrayim ka yamu uri. 20Isu we kcugi ka Utux Tmninun, Utux Baro su ma qpahi heya. Stama heya ma pooda ngayan na smdehu. 21Heya ka tndhuun su ma, Utux Baro su. Yamu sqeepah na ooda paru ma sklwiun. Wada su qtaan bale doriq su ka nii. 2270 heyi theruy mosa Micrayim ka pusu rudan namu. Saya de, Utux Tmninun, Utux Baro we wada na pntnaan so pngerah karac baro ka kneegu namu.”
Currently Selected:
Mege Gaya 10: Stgdaya
Highlight
Copy
Compare
Share
Want to have your highlights saved across all your devices? Sign up or sign in
The Bible Society in Taiwan, 2020
© 台灣聖經公會版權所有，2020
