Daniyel 2
2
1Tg2 knkawas kthlangan na ka Nebukadnecar de msepi egu sepi ka heya. Kiya ka mrudu ka lhebun na betaq ini ptaqi heya. 2Kiya de smkagul seediq mosa mlawa dmpstuutux, dmhuni, dmpsbunur ma, dseediq Krdiya. So meeyah rmengo snepi qbsuran paru ka dheya. Dehuk ka dheya ma mheyu berah qbsuran paru. 3Rmengo dheya ka qbsuran paru: “Mnsepi ku ma prrudu ba lhebun mu, kmklaun mu ba manu ka sepi mu nii.” 4Seediq Krdiya we pskari Aram cmiyuk qbsuran paru: “Tai so mpkuudus ani betaq knuwan ka qbsuran paru! Prnui tnqliyan su ka sepi su, klaan miyan mnduwa pgkela.” 5Rmengo seediq Krdiya ka qbsuran paru: “Oda nii we, so nii ka ooda mu, nasi namu ini tduwa rmengo sepi mu ma pgklai kenan ka sepi nii de, pkdira ku yamu ma, mpkbuyuh ka sapah namu. 6Nasi namu mtduwa srengo ka snepi mu ma spgkeela namu ka elu na we biqun maku snadu ma muumal ku tmdahu yamu. Saya, rrngaani ka snepi mu ma pgklai ku heya ka elu na.” 7Mnpusal cmiyuk qbsuran paru ka dheya ma rmengo: “Braho su qbsuran paru, tgsai tnqliyan su ka sepi, kiya ka tduwan nami pgkela sunan.” 8Rmengo ka qbsuran paru “Tena ku mkela ka yaku, gisu namu thkeso thuwe, ado tena namu mkela mooda ku so nii. 9Nasi namu ini rrngaani ka snepi mu de wano 1 ba ka ppowda mu yamu. Ado mnoda namu mpprengo, mpkmhemuc namu rmengo, tmara pkmpriyux ka ooda. Saya rrngaani nhari ka sepi mu, teta namu bale ba dehuk pgkela sepi mu.”
10Cmiyuk rmengo ka seediq Krdiya: “Seediq bobo dxeral we uka ka mtduwa rmengo noda su. Uka ani ima dqbsuran paru, qbsuran mdudul, dseediq gaga dmoi beyax mpsiling so nii dmpstuutux, dmhuni ma dseediq Krdiya. 11Msriqu bale ka sniling qbsuran paru, wano ba utux uxe so niqan heyi ma dara gaga hini, uka ka mtduwa rmengo berah qbsuran paru.”
12Mseang oda nii ka qbsuran paru, tperuq mseang na posa kari mphuqil kana seediq niqan knkela Babirun. 13Kiya de wada ka pnosa na kari pphuqil na kana seediq niqan knkela. Kiya de meeyah migin Daniyel ma dndangi na pphuqil dheya.
Tnugesa Daniyel ka Utux Baro
14Mphuqil seediq niqan knkela Babirun mnoda nkari qbsuran paru ka Aryok Bukung mpqlahang we, saan mtqita rmengo Daniyel. 15Tqqlahang ba smiling Aryok ka Daniyel: “Hmuwa so nii mseang ba posa kari ka qbsuran paru?” Asi rengo so ndaan ka Aryok. 16Daniyel we asi osa nhari qbsuran paru ssruwa na mlawa tikuh. Kiya de tai so mpnduwa ba pgkela elu sepi na.
17Kiya de mosa sapah na ka Daniyel ma ssneeru na Xananyah, Misael ma Ajaryah dadal na ka noda so nii. 18Rmengo dheya ka heya ddurun daha Utux Baro ppesa gnaalu ma ptuura elu sepi. So uxe spuun phuqil dseediq niqan knkela Babirun ka Daniyel ma dadal na. 19Keeman ciida, ptuura Daniyel meeniq so tuutux hiya ka lnein elu kari nii, asi tndahu Utux Baro gaga karac baro ka heya.
20Rmengo ka Daniyel:
“Tai so tndhuun ani knuwan ka ngayan Utux Baro!
Ado nheya kana ka knkela ma beyax.
21Kmpriyux ali ma ptgaanak karac 1 knkawas ka heya,
paalix qbsuran paru ma maangal qbsuran paru ka heya.
Mege knkela seediq niqan knkela ka heya,
mege gnkela seediq niqan gnkela ka heya.
22Ptuura gaga mgleing ka heya,
klaun na ba ka kana ooda gaga mnkuung,
gaga msuupu heya ka ledax uri.
23Utux Baro npusu rudan mu! Mqaras ku ma tmdahu ku sunan!
Ado mege su knkela kenan,
sniling miyan we gisu su ptrwaun kenan saya da,
noda qbsuran paru we spgkeela su menan.”
Pgkela Sepi Qbsuran Paru ka Daniyel
24Kiya de mosa mtqita Aryok mphuqil sslingan qbsuran paru ka Daniyel ma rngagan na: “Iya phqili ka seediq niqan knkela Babirun, braho misu bale adis ku berah qbsuran paru ma sae mu pgkala heya ka sepi na.”
25Asi desi Aryok berah Nebukadnecar qbsuran paru ka Daniyel ma rngagan na ka qbsuran paru: “Smdiyal ku 1 ckceka seediq Yehudah qnerac ka mtduwa pgkela sepi su.” 26Rmengo Beltesacar, kiya ka Daniyel ka qbsuran paru: “Mtduwa su pgkela sepi mu ma rmengo elu na ho?” 27Cmiyuk qbsuran paru ka Daniyel: “Qbsuran paru, ini dehuk pgkela sunan quri lneing kari nii ka kana ani mhuni, mpspunul, mpstuutux ma dmptkarac. 28Wano ba Utux Baro gaga karac baro ka mtduwa pgkela lneing. Tena na wada spgkeela Nebukadnecar qbsuran paru ka mmeyah hiti. Kiya de qntaan su so tuutux mtaqi su ciida we so nii: 29Isu, qbsuran paru! Mtaqi su ciida we pspiyan su na mmeyah hiti. Utux Baro mpgkeela lneing we spgkeela na qbsuran paru ka mmeyah hiti. 30Yaku uri we pntuura na kenan ka lneing we, uxe mgkala kana dseediq gaga muudus ka knkela mu, pusu na we so su klaun ka elu snepi su ma, mpkeela lnglungan lhebun su.
31Isu, qbsuran paru! Qmnita su, qtai! Niqan 1 paru ba tikung, paru ba ma lmedax ba mheyu berah su. So smicu taan ka tikung na. 32Tunux tikung nii we snmalu malu ba king, berah ma hiqur baga we snmalu ging, hwinuk ma lnguyan we limuk, 33bteriq we xiluy, papak we snmalu pnugmaxan xiluy ma celaq. 34Qmita su ba hiya ciida, tgdoruy peeyah tasil dgiyaq ka paru ba btunux uxe sneyax seediq, buun na ka papak snmalu gnmaxan xiluy ma celaq de, asi khurah. 35Wada asi pknemu ka dxeral, xiluy, limuk, ging ma king, mntena so qbulic bobo sbetan rbagan ma yupan bgihur de asi pkrehak uka ani biciq bengux. Btunux cnebu tikung nii we ma paru ba dgiyaq mubung kana dxeral.
36So nii ka snpiyan su. Pgkela misu heya sunan saya ka sepi kiya. 37Isu, qbsuran paru! Tgqango ba ka tluungan su paru kana ckceka dqbsuran paru. Utux Baro gaga baro we wada na sbege sunan ka qnlahang, beyax qmlahang, beyax ma, knpruwan. 38Kana seediq qnlangan, camac ma qbheni, ani gaga meeniq inu we wada na sbege baga su kana. Isu ka mpqlahang kana nii, isu ka kesun tunux tikung snmalu king gaga. 39Bukuy su hiya de mpniqun 1 ka qlhangan mmeyah, uxe mpgkala sunan. Dungal we tg3 qlhangan we kiya ka kesun qlhangan limuk, heya ka mpqlahang kana qnlangan. 40Tg4 qlhangan we so xiluy mkere ma ptnemu ani maanu. Mntena so xiluy ptnemu kana ani manu. Hmuwa mesa ptnemu ka xiluy we, maha so nii ptnemu dqlhangan ka qnlhangan kiya uri. 41So qntaan su ka papak ma tluding papak pnugmaxan xiluy ma celaq we nii tmiyu rmengo mpniqun ka 1 qlhangan mptg2. So xiluy ka beyax na, ado pnugmaxan xiluy ma celaq. 42Tluding papak pnugmaxan xiluy ma celaq we nii rmengo qlhangan niqun ka mpkbeyax na ma niqun ka mpkuuwic na uri. 43Qntaan su ka pnugmaxan xiluy ma celaq nii we rmengo mpgimax ka lqlaqi mslutuc daha ma uxe mpskingal ka dheya, mntena so xiluy ma celaq ini psuupu. 44Mqbsuran paru dqbsuran paru ciida, Utux Baro ga baro we mpheyu 1 qlhangan uka qnnaqah ani knuwan. Qlhangan nii we uxe na bege seediq icil, kiya ka meeyah mpkuuka kana qlhangan ma meeniq hiya ani betaq knuwan. 45Qmnita su 1 btunux uxe sneyax seediq tgdoruy peeyah tasil dgiyaq, mooda ptnemu xiluy, limuk, celaq, ging ma, king we Utux Baro Tgparu we nii na spgkeela sunan ka ooda hiti. Bale ba ka sepi nii, ida bale ba ka rnengo mu uri.”
Mege Snadu Daniyel ka Qbsuran Paru
46Nebukadnecar qbsuran paru we asi tgtemaq thmuku Daniyel, posa kari bege ssapuh ma psqama malu sknexan heya. 47Rmengo Daniyel ka qbsuran paru: “Ado wada su pgkela lneing nii, Utux Baro namu we tgkala ba kana duutux ma Bukung kana dqbsuran ma Utux Baro mptuura lneing.” 48Kiya de qbsuran paru ge pgkala na baro ka Daniyel, biqan na egu ba mkere brigan snadu ma maha qbsuran na tgbaro ka heya. Ngalan Bukung mpqlahang kana Babirun ma dungal we ngalan seediq pusu sslingun sapah qbsuran paru ma mpqlahang kana seediq niqan knkela Babirun. 49Mesa qbsuran paru ka Daniyel, kiya de ngalan mpqlahang qpahun alang Babirun ka Sadrak, Meysak ma Abednego. Wano ba Daniyel ka meeniq sapah qbsuran paru hiya.
Currently Selected:
Daniyel 2: Stgdaya
Highlight
Share
Compare
Copy
Want to have your highlights saved across all your devices? Sign up or sign in
The Bible Society in Taiwan, 2020
© 台灣聖經公會版權所有，2020
