Daniyel 1
1
Quri Daniyel ma Dadal Na (1:1-6:28)
Meeniq Sapah Nebukadnecar Qbsuran Paru ka Daniyel
1Tg3 knkawas qbsranun paru Yehudah ka Yehoyaqim, tmlibu kmremux alang Yerusalem ka Nebukadnecar qbsuran paru Babirun. 2Utux Baro ge, sbege na baga na ka Yehoyaqim qbsuran paru Yehudah ma kana qyqeya sapah thmkuwan Utux Baro. Kiya de desun na dxeral Sinar sapah thmkuwan daha hiya ma, psaun daha repun utux daha hiya.
3Posa kari Aspenaj qbsuran gmbgaxan ka qbsuran paru, kiya de ggao na duma mbbeyax peeyah lqlaqi mslutuc sapah qbsuran paru ma seediq dqbsuran ckceka seediq Israel qnerac. 4Kiya ka driso uka mnarux ma seediq ba, mgleexan kana kkela, egu snlhayan, mgkala txaun ka knkela na we kika mndungus mpqeepah sapah qbsuran. Tgsaun daha ppatis ma kari seediq Krdiya. 5Qbsuran paru we mangal peeyah uqun na ma sino mmahun na sbege na dheya ka uuqun daha klaali. Mpdanga 3 knkawas dheya, kika mtduwa qmeepah berah qbsuran paru. 6Seediq Yehudah ckceka daha we Daniyel, Xananyah, Misael ma Ajaryah. 7Brahan tmngayan qbsuran gmbgaxan ka dheya nii, kiya de Beltesacar ka Daniyel, Sadrak ka Xananyah, Meysak ka Misael ma, Abednego ka Ajaryah.
8Daniyel we niqan lnglungan na ini ba ekan uqun ma tunguh sino qbsuran paru psrutiq heyi na. Kiya de rmengo qbsuran gmbgaxan so uxe psrutiq heyi na. 9Utux Baro we spooda na qbsuran gmbgaxan gmaalu Daniyel. 10Kiya we rmengo Daniyel ka qbsuran gmbgaxan: “Miicu ku tnpusu sapah mu ma qbsuran paru mu, ado tena wada srengo qbsuran paru ka uqun namu, hmuwa ma namu pqtaan knuuwic dqeras namu ini pntena duma mbeyax seediq ho? So kiya de phqilun ku qbsuran paru da.” 11Kiya de rmengo snkgulan qbsuran gmbgaxan mpqlahang Daniyel, Xananyah, Misael ma Ajaryah ka Daniyel: 12“Braho misu, spengi tnqliyan su 10 ali, qdiyal miyan sama ma piimah qsiya. 13Bobo na hiya de pstnaani miyan mnekan uqun sapah qbsuran paru. Kiya de qtai tnqliyan su bobo na hiya!”
14Kiya de mpqlahang we smruwa mk10 ali smeung dheya. 15Bobo mk10 ali, qtaan ka dheya we mgkala kana rsriso mnekan uqun sapah qbsuran mbeyax heyi daha ma mtbeno bale. 16Kiya de wano qdiyal sama ka mpqlahang ma ini ekan uqun bnege qbsuran paru ka dheya.
17Utux Baro we biqan na knkela matis ma pusu slhayan ka 4 heyi riso nii. Dungal we pgklaan na qnita so tuutux ma sepi ka Daniyel.
18Dehuk ali ddesun sapah qbsuran paru ka dheya, kiya de qbsuran gmbgaxan we desun na mtqita Nebukadnecar qbsuran paru ka dheya. 19Mpprengo dheya ka qbsuran paru. Kana rsriso hiya we uka ka mpgkala Daniyel, Xananyah, Misael ma Ajaryah. Kiya de mpqeepah berah qbsuran paru ka dheya. 20Smiling ani maanu uxe uri we ani mmaanu ddaun ka qbsuran paru we knkela daha cmiyuk ge, msn10 pnugklaan knkela mpstuutux ma mhuni. 21Betaq prading knkawas Kores qbsuran paru Paras ciida, ida gaga meeniq hiya ka Daniyel.
Currently Selected:
Daniyel 1: Stgdaya
Highlight
Share
Compare
Copy
Want to have your highlights saved across all your devices? Sign up or sign in
The Bible Society in Taiwan, 2020
© 台灣聖經公會版權所有，2020
