Korosay 3
3
1So kiya de, nasi namu wada msuupu Kiristo mtuutuy peeyah hnqilan de, pgsai ka ga baro. Ga hiya ka Kiristo, ga tleung narac Utux Baro. 2Lnglungi ka oda ga baro, iya lngelung oda bobo dxeral. 3Ado wada namu mhuqil ka yamu da, knuudus namu we gisu pspuun Kiristo ga liingun berah Utux Baro 4Knuudus namu ka Kiristo. Mtqita ciida ka heya we maha namu msuupu heya mtqita knledax uri.
5So kiya de, phqili ka heyi namu ga bobo dxeral. Mntena so mhemuc mngaangal, qnrutiq, qnnaqah ooda, kkraguh naqah ma sqquru lnglungan. Sqquru lnglungan nii we kiya ka thmuku tikung. 6Ado kana ooda nii we, meeyah betaq seediq tbrinah ka seang Utux Baro. 7Mnuudus namu quri so ooda nii cida we, ndaan namu we so nii uri. 8Kiya de saya de lhelah ka kana so nii. Kiya ka qnriqu, seang, naqah lhebun, ssngayan ma peeyah naqah kari quwaq namu. 9Iya pqberiq, ado namu wada lhlahun ka seediq cmucac ma qneepah cmucac seediq. 10Plkusi namu seediq bgurah, seediq bgurah nii we pnooda hnyegan Bukung snmalu heya ini setuq psbgurah meniq gnkela. 11Ooda nii we ini psaanak seediq Hellenis ma seediq Yudaya, pntgaya psalak ma ini ptgaya psalak, seediq mkbbuyu, seediq Skutes, tnqliyan ma, seediq heya nanak. Wano Kiristo ka kana ma, ga meniq ckceka kana nii uri.
12So kiya de, yamu we gneegan Utux Baro, mrtaso, seediq sgaalu. Kiya de plkusi gmhuwe, psbrinah, tlebu lhebun, mhenuk lhebun ma knremun. 13Nasi niqan qnquwan daha ka seediq nii ma seediq kiya de, asi namu ka pkremun ma ppsruwa qnnaqah. Wada huwa mesa smruwa ita ka Bukung de, kesa ta smruwa seediq uri. 14Uxe wano nii, asi namu ka plukus gnaalu, ado gnaalu ka tduwa mlutuc kana malu. 15Pniqi pusu ckceka lhebun namu ka mtbale bnege Kiristo. Ado nii ka pnlawa na yamu ma, wada namu ms1 heyi. Kiya uri we pniqi qnaras ka lhebun namu. 16Pdai klegan knkela, pniqi lhebun namu ka knttuku kari Kiristo. Pdai kari uyas, uyas ttndahu, uyas bgihur pptgesa ma pddudul. Kiya uri we pdai qqaras lhebun tndhui ka Utux Baro. 17Kiya de ani maanu ooda namu, rmengo mmaanu ma mooda mmaanu we, pdai ngayan Yesu Bukung. Pooda ngayan na mqaras Utux Baro Tama ta.
Ddaun Bgurah Kndesan
18Yamu mmqedil we, thei rseno namu. So nii we mndungus meniq Bukung. 19Yamu drseno we, glaani mqedil namu. Iya trqili ka dheya.
20Yamu lqlaqi we, ani maanu we thei tama ma bubu namu. Ado so nii we qqrasun Bukung kiya. 21Yamu dtama ma dbubu, iya psrnahi pkseang ka lqlaqi namu. So uxe mpkuuwic ka lhebun daha.
22Yamu dtnqliyan we, ani maanu we thei tnpusu heyi sapah namu. Iya wano meepah berah seediq, so hari nii psqaras seediq. Pniqi bale ba lhebun, ado miicu su Bukung ka isu. 23Yamu we meepah namu ani maanu, pdai lhebun namu meepah kana. Mntena so nii namu meepah Bukung, uxe seediq ka sqeepah. 24Ado mpkela namu, maangal namu dnoi snadu peeyah Bukung ta hiya. Yamu we mqeepah namu Kiristo Bukung. 25Mpciyuk mangal uxe msderux ooda ka seediq meepah uxe msderux. Ini psaanak mita seediq ka Bukung.
Currently Selected:
Korosay 3: Stgdaya
Highlight
Copy
Compare
Share
Want to have your highlights saved across all your devices? Sign up or sign in
The Bible Society in Taiwan, 2020
© 台灣聖經公會版權所有，2020
