Amos 3
3
1Seediq Israel! Qbhangi ka kari pnseru Utux Tmninun, mseang ku kana tnsapah mnlatac pneeyah dxeral Micrayim, rmengo:
2“Wano yamu ka klaun mu kana seediq bobo dxeral.
Kiya de, mpkdira ku kana qnquwan noda namu.”
Qpahun Mpgeela Kari
3Nasi psuupu lhebun ka 2 seediq,
huwa mesa msuupu mkkesa ho?
4Nasi uka camac ka rkelic rudu,
huwa mesa mdiras mlawa ckceka nrao ho?
Nasi uka ngngalun na ka giyas rkelic rudu,
huwa mesa mdiras ckceka lhengo hiya ho?
5Nasi ini srkii tlenga,
huwa mesa tdiyal durang toma dxeral ka qbheni ho?
Nasi ini angal ka durang,
huwa mesa hmkero peeyah dxeral ho?
6Nasi miyuk iyuk urung,
uxe mpkiicu ka seediq peni?
Nasi meeyah alang ka mqraqil,
uxe pneeyah Utux Tmninun peni?
7Uxe mooda ani manu oda ka Utux Tmninun Bukung,
wano ba dmpgeela kari tnqliyan na ka tmgesa lneing nii.
8Mdiras mlawa ka rkelic rudu we, ima ka ini kiicu ho?
Wada rmengo ka Utux Tmninun Bukung de, ima ka uxe mprengo kari pgeela ho?
Qnhdean Samareia
9Meeniq namu sapah qbsuran paru Asdod ma,
sapah qbsuran paru dxeral Micrayim, mpgarang namu rmengo:
“Osa msseli ddgiyaq Samareia,
qtai knhenu paru mrrudu ma mttraqil ka ckceka alang.”
10“Mbeyax gmeluk ka dheya,
gtuun daha sapah qbsuran paru daha,
kiya we ini kela moda oda msderux.”
Rnengo Utux Tmninun ka nii.
11Kiya de rmengo so nii ka Utux Tmninun Bukung:
“Meeyah tmlibu dxeral nii ka pais,
meeyah pkuuwic beyax su,
meeyah gmeluk sapah qbsuran paru su.”
12Rmnengo so nii ka Utux Tmninun: “Huwa mesa gmeeluk 2 bteriq ma 1 biciq ba birac peeyah quwaq rkelic rudu ka mtabu we, maha so nii doyun baga ka dseediq meeniq Samareia ma seediq Israel. Gisu so gmeluk 1 papak qlapo ma tpuno qlapo ka so nii.”
13Rmengo ka Utux Tmninun Bukung, Utux Baro Mdoi Kana Supi:
“Qbahang kari nii, mdakar tnsapah Yakobu.
14Ali pkdira ku qnquwan noda Israel,
mpkdira ku spuhan Beytel.
Paqun mu ka papak spuhan ma, mptakur dxeral.
15Mphurah ku sapah daun misan ma rbagan,
hrahun ka sapah snmalu waqic dapa bukung,
mpkuuka kana ka malu ba sapah.”
Rnengo Utux Tmninun ka nii.
Currently Selected:
Amos 3: Stgdaya
Highlight
Share
Compare
Copy
Want to have your highlights saved across all your devices? Sign up or sign in
The Bible Society in Taiwan, 2020
© 台灣聖經公會版權所有，2020
