Amos 2
2
Quri Moab
1Rmnengo so nii ka Utux Tmninun:
“Asi knteetu niqan qnquwan noda ka Moab,
wada ptnemu psqama buuc qbsuran paru Edom,
uxe mu lixun ka pkdira mu heya.
2Mpeeyah ku rana puniq ckceka Moab,
rqenun mu ka sapah qbsuran paru Qeriyot,
mpkuuka ckceka mrrudu, mddiras ma hrenang urung ka Moab.
3Mpseqic ku dqbsuran mdudul Moab,
pspuun mu phuqil ka kana qbsuran mdudul ma heya.”
Rnengo Utux Tmninun ka nii.
Quri Yehudah
4Rmnengo so nii ka Utux Tmninun:
“Asi knteetu niqan qnquwan noda ka Yehudah,
malix pndakar Utux Tmninun,
ini thei gaya na.
Rdrudan daha we smnegul tikung uka dungus psridil dheya,
uxe mu lixun ka pkdira mu heya.
5Mpeeyah ku rana puniq ckceka Yehudah,
psqmaun mu ka sapah qbsuran paru Yerusalem.”
Psgao Quri Israel ka Utux Baro
6Rmnengo so nii ka Utux Tmninun:
“Asi knteetu niqan qnquwan noda ka Israel,
ririh ging wada maruy seediq msderux noda,
ririh 1 ba ramil wada maruy seediq qrinuc,
uxe mu lixun ka pkdira mu heya.
7Qqahun daha bengux dxeral toma ka tunux dseediq qrinuc,
dungal we hmetur elu seediq mqraqil.
Mmhemuc msuupu 1 weewa ka tama ma laqi,
kiya ka wada smrutiq ngayan mrtaso mu.
8Meeniq ssiyo spuhan ka dheya,
mtaqi bobo lukus knbrexan pila,
dungal we miimah sino pnsdhegan ckceka sapah thmkuwan Utux Baro ka dheya.
9Mpkuuka ku seediq Amori berah daha.
Ani yaa qulic bale knbragan ma mntena raus knkrayan,
mpkuuka ku heyi baro na, mpselaq ku gamil toma na.
10Dnudul mu mnlatac peeyah dxeral Micrayim ka yamu,
dnudul ku yamu 40 knkawas tadus brenux,
wada namu mangal pusu dnoi dxeral Amori ka yamu.
11Mptutui ku mpgeela kari ckceka lqlaqi laqi namu,
mptutui ku seediq Najir ckceka rsriso namu.
Seediq Israel! Uxe so kiya peni?”
Rnengo Utux Tmninun ka nii.
12Kiya de pskyexun namu piimah sino ka seediq Najir,
mdakar namu rmengo dmpgeela kari: Iya rengo geela kari.
13“Qtai! Miirik ku yamu ka yaku,
mptena so rulu gisu mapa stenge uqun moda mirik.
14Msliko tmalang we uxe mpqduriq,
mpkuuka beyax ka mkkere rseno,
uxe mdoi baga heya nanak ka mnpahung supi uri.
15Dmpdoi budi we uxe mpdehuk mheyu,
ini beyo tmalang ka papak we uxe mpqduriq,
paapa dapa dmay we uxe mpdoi baga heya nanak uri.
16Betaq ali ciida, niqan ba pahung ckceka mnpahung supi we,
mpberas qduriq.”
Rnengo so nii ka Utux Tmninun.
Currently Selected:
Amos 2: Stgdaya
Highlight
Share
Compare
Copy
Want to have your highlights saved across all your devices? Sign up or sign in
The Bible Society in Taiwan, 2020
© 台灣聖經公會版權所有，2020
