Qneepah 9

Priyux Lnglungan ka Soro

1Soro we ida tsseang smiicu rmengo tnugsaan Bukung nana. Kiya de mosa mita paru msapuh, 2mosa mesa patis heya, bbege na kana sapah pssliyan Darmeseq. So kiya de nasi na slayan ka seediq snhii kari nii de ani rseno ma ani mqedil, tduwa na bbkeun ma ddesun na Yerusalem. 3Mkleelu mkkesa smdaling Darmeseq ciida ka Soro we asi lux peeyah baro ka ledax ma pledax mtqiri heya. 4Kiya de mtakur dxeral ka heya ma qbhangan hrenang rmengo heya: “Soro, Soro! Ma su tmraqil kenan ho?” 5Smiling ka Soro: “Bukung! Ima ka isu ho?” Rmengo ka Bukung: “Yaku we kiya ka Yesu gaga su trqilun. 6Tutuy! Osa mremux alang. So ka qpahun su we niqan ka seediq mprengo sunan.” 7Theyaq hiya ka seediq we ini eyah kari daha mheyu hiya. Qbhangan daha ka hrenang ma ini daha qtai ka ani ima. 8Mtutuy peeyah dxeral ka Soro, ani mtraguh ka doriq na we ini tduwa qmita ani maanu. Dooyan baga seediq ka heya ma ddulun daha mosa Darmeseq. 9Kiya de mk3 ali ini qita, ini ekan ma ini imah uri.

10Meeniq Darmeseq hiya ka Ananias kesun 1 tnugsaan. Mita so tuutux ka heya ma rmengo heya ka Bukung: “Ananias!” Cmiyuk ka heya: “Bukung! Nii ku hini.” 11Rmengo heya ka Bukung: “Tutuy! Osa elu msderux kesun, meeniq sapah Yehudah hiya ka 1 seediq Tarsos Soro kesun tmngayan. Ga dmurun ka heya, 12qmnita 1 seediq meniq ckceka tuutux dungal, ngayan na we Ananias. Mremux sapah ma posa baga heyi na so qqita na heya.” 13Cmiyuk ka Ananias: “Bukung! Qnbhangan mu hbaro dseediq ka quri seediq nii we paru bale pnqraqil na mrtaso tnugsaan su meniq Yerusalem hiya. 14Niqan pusu beyax pneyah pusu msapuh bbekuy na kana seediq thmuku sunan.” 15Rmengo heya ka Bukung: “Osa! Seediq nii we qyqeya gneegan mu, mosa gmarang ngayan mu berah ddseediq icil qnlhangan, dqbsuran paru ma dseediq Israel. 16Pgkela mu ka heya, ado ngayan mu ida mooda egu ba mqraqil.” 17Mlatac ka Ananias duma mremux sapah kiya. Psaan na baga ka heyi Soro ma rmengo: “Soro mtswai, tnqita sunan mkleelu su meyah ciida we kiya ka Yesu Bukung we smkagul kenan ma qqita su dungal ma ppstenge na Bgihur Utux.” 18Asi tuting peeyah doriq na ka mntena so krdekac ma qmita ka heya da. Kiya de mtutuy ka Soro ma moda ptgaya psino. 19Mnekan hnpure de mbeyax da.

Gmarang Kari Darmeseq ka Soro

Yaa ba piya ali msuupu tnugsaan meniq Darmeseq hiya ka Poro. 20Kiya de meniq knkingal sapah pssliyan asi garang Yesu, rmengo: Heya ka laqi Utux Baro. 21Mskluwi kana ka mnbahang na ma rmengo: “Pqraqil dsnheyi Yesu meniq Yerusalem hiya we uxe seediq nii peni? Meyah hini uri we meyah mekuy dheya ma ddesun na berah pusu msapuh hiya.” 22Kiya de Soro we krinah mrana mbeyax ma ini na baka rmengo ka seediq Yudaya ga meniq Darmeseq. Pgkela dheya Yesu nii we kika Kiristo.

Qduriq Baga Seediq Yudaya ka Soro

23Bobo na hiya yaa piya ali, dseediq Yudaya we mpprengo kmphuqil Soro. 24Klaun Soro ka pnsrmalan daha. Pphuqil daha Soro we qnlhangan daha ani diyan ma keeman uri ka rhengun alang. 25Kiya de tnugsaan na we pslwilun daha rawa ptuting peeyah harac qnalang alang keeman ka Soro.

Meeniq Yerusalem ka Soro

26Dehuk alang Yerusalem ka Soro, satang so mpsuupu tnugsaan. Ini snhii heya we tnugsaan ma kcugun daha uri. 27Wano Brnabas ka smbleyaq smterung heya ma desun na berah snkgulan. Kiya de so ka qnita na Bukung elu, huwa mesa rmengo heya ka Bukung ma kana mnoda ngayan Yesu mnpahung gmarang kari meeniq Darmeseq we ssneeru na dheya kana. 28Kiya de Soro we mtheyaq snkgulan meyah ma mosa nganguc meeniq Yerusalem. 29Kiya de mnoda ngayan Bukung mnpahung gmarang kari. Kiya de rmengo ma pkeekan kari dseediq Yudaya mskari Hellenis. Kiya de migin phqilan heya ka dheya. 30Klaun mtswai na ka so nii de desun daha Kaisareia ma psaun daha Tarsos.

31Ciida, kana pssliyan ga meeniq Yudaya, Galil ma Samareia we mmsbleyaq duma, daan pgdehu smalu. Kiya miicu Bukung ma psbyaxan Bgihur Utux. Kiya de mrana knhbragan ka seediq da.

Pkmalu Ayneas ka Petros

32Mooda mtqiri kana alang ka Petros ciida, saan na ka dsnheyi ga meeniq Rudda uri. 33Kiya de taan na heya ka 1 seediq, Ayneas kesun ka ngayan na. Mnarux ini pklgelu heyi ma 8 knkawas tnqiyan na qlapo. 34Rmengo heya ka Petros: “Ayneas, Yesu Kiristo ka pkmalu sunan. Tutuy! Tgkemu tnqiyan su.” Kiya de asi tutuy ka heya da. 35Seediq kana ga meeniq Rudda ma Saron we mita heya de snhii Bukung.

Muudus Peeyah Hnqilan ka Dorkas

36Gaga Yapo hiya we niqan 1 mqedil snhiyi. Ngayan na we Tabita, hdilun ka kari we Dorkas. Mqedil nii we egu ba malu qneepah na ma mege quri qrinuc klaali. 37Ciida we mnarux ka heya duma mhuqil da. Kiya de trmaan daha ma psaun daha truma sapah mgbaro. 38Ado smdaling Yapo ka Rudda, bhangan daha ga meeniq hiya ka Petros de skgulan daha tqita heya ka 2 seediq ma mesa rmengo heya: “Iya pscuqi, eyah nhari menan hini.” 39Kiya de mtutuy ka Petros ma theyaq dheya mosa. Dehuk hiya de desun daha truma sapah mgbaro. Mheyu ssiyo Petros lmingis ka kana mqedil mqrinuc. Lukus pstrmaun ma lukus pbragun snmalu Dorkas msuupu meeniq dheya ciida han we spqita daha heya. 40Petros we psaun na nganguc ka kana daha, tmbqelic ma dmurun. Kiya de mspgeriq quri ga mhuqil ka heyi na ma rmengo: “Tabita, tutuy!” Kiya de mtraguh ka doriq na ma taan na ka Petros de tleung da. 41Kiya de Petros we hmkero baga na pstutuy heya. Splawa na ka dsnheyi ma dmqedil mqrinuc mremux hiya ma sbege na dheya ka muudus bale Dorkas. 42Klaun kana seediq Yapo ka so nii de hbaro ka snhii Bukung. 43Bobo na ciida, bsiyaq meeniq sapah Simon mpsmalu qraqil alang Yapo hiya ka Petros.

Currently Selected:

Qneepah 9: Stgdaya

Highlight

Copy