Qneepah 10

Petros ma Kornelios

1Ga meeniq Kaisareia ka Kornelios kesun 1 seediq. Heya we qbsuran 1'00 supi Ruma ckceka rahul kesun rahul supi Italia. 2Heya we kmtama ma kana seediq truma sapah na miicu Utux Baro. Kiya de dmayo bale seediq ma dmurun Utux Baro klaali. 3Niqan 1 ali, yaa 3 toke bobo mnekan ciida, psleexan na ba mita ka so tuutux. Meyah heya ka snkgulan Utux Baro ma rmengo: “Kornelios.” 4Kiya de tgleus mita heya ka doriq Kornelios, miicu ma rmengo: “Bukung, maanu ho?” Rmengo ka snkgulan baro: “Dnurun su ma dnayo su seediq we dehuk berah Utux Baro ma wada na lnglungun da. 5Saya we skguli Yapo ka seediq, plwani ka Petros kesun ka Simon. 6Petros we ga meeniq sapah Simon mpsmalu qraqil. Sapah na we ga ssiyo rcilung.” 7Bobo wada ka snkgulan baro rmnengo heya de splawa na ka 2 tnqliyan sapah na ma 1 mdayo heya klaali ka supi kmtama. 8Srnuwan na kana dheya ka so nii ma skgulan na Yapo ka dheya.

9So kusun, mkleelu smdaling Yapo ka dheya ciida, yaa ceka naali, Petros we mosa dmurun dnamux ka heya. 10Klaun na ka ure na duma mkmekan da. Ga psramal ido ciida ka tnsapah hiya we asi qita so utux ka Petros. 11Taan na ga mtraguh ka karac baro ma niqan 1 ka mntuting mntena so pala paru. Ga sbekuy ka 4 muxi na ma pslduyun ptuting bobo dxeral. 12Ga meniq ckceka na hiya we ani maanu klegan camac 4 papak ma kuyi ma qbheni skiya karac baro. 13Niqan dungal ka hrenang rmengo heya: “Petros, tutuy. Phuqil ma ekan!” 14Rmengo ka Petros: “Bukung, ini tduwa ka nii. Ado so nii uxe malu ma mrutiq we uxe mu pnuqan ani texal.” 15Mn2 meyah ka hrenang rmengo heya: “Pnsbgurah Utux Baro we iya kesi uxe malu.” 16Mn3 ka so nii ma wada asi ngali baro ka kiya di.

17Ga mgedang lnglungan na ciida ka Petros, ini na klai, maanu bale ka ntaan na so tuutux nii. Gisu dehuk sapah Simon ma mheyu nganguc rhengun ka seediq snkgulan Kornelios, 18mlawa ma smiling: “Petros kesun ka Simon we ga meniq hini ho?” 19Ida lmngelung qntaan na so tuutux ciida ka Petros we rmengo heya ka Bgihur Utux: “Tai, ga migin sunan ka 3 seediq. 20Heyu ma osa toma ma iya tiiyax, suupu dheya mosa. Ado yaku ka smnkagul dheya.” 21Kiya de hmeruc mosa seediq hiya ka Petros ma rmengo: “Yaku ka ga namu gimun. Maanu ka seeyah namu hini ho?” 22Rmengo ka dheya: “Msderux seediq ka Kornelios qbsuran 1'00 supi we msderux ooda na ma miicu Utux Baro, spruun daha bale dseediq Yudaya. Mnoda pnugkela mrtaso snkgulan baro pplawa na sunan sapah na ma qqbahang na kari su.” 23Kiya de Petros we pstmaun truma na ka dheya ma ptqiun na hiya 1 rabi.

So kusun de mtutuy ma msuupu dheya mosa ka Petros. Msuupu dheya mosa uri ka duma mtswai pneyah Yapo. 24So kusun dungal de mremux Kaisareia ka dheya. Tena psseli mlawa dlutuc na ma dadal na bale ka Kornelios ma tmara dheya. 25Mremux ka Petros ciida de smterung heya ka Kornelios ma tgtemaq berah papak na thmuku heya. 26Pstutui heya ka Petros ma rmengo: “Tutuy, seediq ku ka yaku uri.” 27Kiya de Petros we mpprengo daha Kornelios mremux truma, mita hbaro seediq tena nii msseli hiya da. 28Rmengo dheya ka Petros: “Ida namu klaun. Mtheyaq ma smdaling seediq icil qnlhangan ka seediq Yudaya we pdkaran gaya pndakar. Kiya de Utux Baro ge, tena pgkela yaku, ani mgmaanu seediq we ini ngali uxe bgurah ma rutiq. 29Maanu so kiya de splawa ku daha ciida dwe ini ku tghetur ma meyah ku. Kiya de slinge maku, maanu ka splawa namu kenan ho?” 30Rmengo ka Kornelios: “Sepac ali tberah na ciida, meeniq ku sapah muyu drunan 3 toke dmurun ku ciida we asi lux mheyu berah mu mlukus lmedax ka 1 seediq. 31Rmengo ka heya: ‘Kornelios, wada qbhangan ka dnurun su ma wada betaq berah Utux Baro ma lnglungun na ka dnayo su. 32Skguli Yapo ka seediq su ma plaani ka Petros kesun Simon. Hiya ge ga meniq sapah Simon mpsmalu qraqil ga meeniq ssiyo rcilung.’ 33Kiya de asi mu skguli mlawa sunan. Meyah su we malu bale. So kiya de saya ka kana ta we gisu ta meniq berah Utux Baro, qqbahang nami kana kari rmnengo Bukung sunan.”

Gmarang Kari Meeniq Sapah Kornelios

34Asi rengo ka Petros: “Bale ba klaun mu, Utux Baro we ini psaanak qmita seediq. 35Kana qnlhangan ge, ani ima ka miicu Utux Baro ma msderux ooda naka qneepah seediq we qrasun Bukung. 36Utux Baro we spooda na Yesu Kiristo Bukung kana ani maanu, heya we gmarang malu kari mpsbale. Sbege na seediq Israel ka kari nii. 37Bobo gmnarang quri ptgaya smino ka Yohane, kari nii we prading peeyah Galil sgarang kana mtqiri qnlhangan Yudaya. 38Utux Baro we wada hmuwa psteme Bgihur Utux ma beyax Yesu seediq Najare, nii we ida namu klaun. Heya we mosa mtqiri alang qmeepah malu ma pkmalu kana ga pretun Qbsuran Bgihur Naqah. Ado msuupu heya ka Utux Baro. 39Kana qneepah na meeniq dxeral Yudaya ma Yerusalem we yami ka mpgkeela na. Kiya de spqeya daha jyujika ma phqilun daha ka heya. 40Mk3 ali ciida, Utux Baro ge, pkdusun na peeyah hnqilan ma sptuura na pqita. 41Uxe na spqita na kana seediq, seediq pnuglaan gmao Utux Baro gmao ma mpgkeela Heya ka pqtaan na. Kiya de yami nii, bobo mnuudus peeyah hnqilan ka Yesu we msuupu nami heya mekan ma mimah. 42Tmgesa yami mesa grangi kari seediq, pgkela heya ka pnheyu Utux Baro, Bukung mpsgeegun muudus seediq ma wada mhuqil seediq. 43Pgkela quri heya ka kana mpgeela kari uri: ‘Kana snhii heya we mooda ngayan na maangal psruwa qnquwan.’”

Maangal Bgihur Utux ka Seediq Icil

44Ida kiya ga rmengo na ka Petros ciida, asi stenge kana seediq qmbahang kari ka Bgihur Utux. 45Mnsuupu Petros meyah ka seediq mnoda ptgaya psalak ma duma seediq snhii Yesu ge, taan daha bnege Bgihur Utux gaga stenge heyi dseediq icil uri de mskluwi bale. 46Ado qmbahang dheya mskari kari seediq icil de tmdahu smparu Utux Baro. Kiya de cmiyuk rmengo ka Petros: 47“Mntena ita maangal Bgihur Utux ka seediq nii de ima ka mtduwa hmetur ptgaya smino qsiya dheya ho?” 48Kiya de rmengo dheya, pooda ngayan Yesu Kiristo ptgaya psino dheya. Kiya de hridun daha meeniq hiya bsiyaq hari ka Petros na.

Currently Selected:

Qneepah 10: Stgdaya

Highlight

Copy