Qneepah 8

Pqraqil Pssliyan ka Soro

1Soro nii we smruwa phuqil Stepanos ka heya duri. Peeyah ali ciida, prading paru tnrqilan daha pssliyan Yerusalem, wano duma snkgulan we wada sprehak mquri Yudaya ma Samareia ka kana dsnheyi seediq. 2Duma seediq kmtama we reesun daha ka Stepanos ma lmingis paru heya. 3Kiya de Soro we smeeliq pssliyan. Kmremux knkingal sapah daha ma tlusun na posa sapah kuung ka rseno ma mqedil.

Mkgarang Samareia Ka Malu Kari

4Maanu so kiya de seediq rnehak daha we mosa ani inu gmarang malu kari. 5Pilipos we mosa alang Samareia, sgarang na hiya ka Kiristo. 6Mbahang ma qmita pnskraya qneepah Utux noda Pilipos ka hbaro seediq de msuupu lnglungan daha qmbahang bale kari na. 7Ado hbaro ka ga qrapun bgihur naqah, paru quwaq daha tddiras mlatac peeyah heyi daha ka duutux. Niqan hbaro ka mnarux ini pklgelu ma mrikic na we wada pklmeun. 8Kiya de paru qaras daha ka ckceka alang hiya.

9Niqan ka 1 seediq, ngayan na we Simon. Heya we mnhuni peeyah cuuxal alang hiya ma psparu bale. Kiya de psklwiun na ka seediq Samareia. 10Peeyah laqi biciq betaq rudan ka kana daha we qmbahang bale heya, rmengo: “Seediq nii we kiya ka beyax Utux Baro ma kiya kesun paru beyax Utux Baro tmngayan.” 11Mbahang bale heya ka seediq. Ado bsiyaq dnoi na beyax utux mhuni ma psklui dheya. 12Ani so kiya wada snhii Pilipos gnarang na malu kari quri qnlhangan Utux Baro ma ngayan Yesu Kiristo ka dheya, madis rseno ma mqedil uri moda ptgaya psino. 13Ani Simon uri we snhii, bobo mnoda ptgaya psino de msuupu Pilipos klaali. Taan na ka pnskraya qneepah Utux ma paru bale beyax na de msklui bale.

14Mbahang wada mangal kari Utux Baro ka dseediq Samareia ka snkgulan ga meniq Yerusalem de smkagul Petros ma Yohane mosa dheya hiya. 15Mosa hiya ka 2 seediq nii de sdurun daha ka dsnheyi ma aangal daha Bgihur Utux. 16Ado ani taxa daha we ini stngai Bgihur Utux nana. Dheya we wano mpooda ngayan Yesu Bukung ptgaya psino. 17Kiya de snkgulan we posa baga bobo tunux dheya de mangal Bgihur Utux ka dheya. 18Simon we qmnita pnosa baga snkgulan de meyah ka Bgihur Utux. Kiya de biqan na pila ka dheya, 19rmengo: “Biqi ku beyax nii ka yaku uri, so ka pnsaan mu baga ka ani ima we maangal Bgihur Utux ka dheya.” 20Rmengo ka Petros: “Mpsuupu sunan pkuuka ka pila su! Ado psatang su pila ka aangal su bnege Utux Baro. 21Uka pnugluban su ani maanu ka kari nii. Ado ini ksderux berah Utux Baro ka lnglungan su. 22Pryuxi lnglungan su so qnqnnaqah nii, druni Bukung, so su na ssrwaun hiya ka llngelung ga lhebun su. 23Klaun mu mita ga su ckceka mngihur pahung ka isu ma ga su bkean qnnaqah.” 24Cmiyuk ka Simon: “Braho namu, druni ku hiya Bukung. So uxe meeyah heyi mu ka ani 1 rnengo su.”

25Snkgulan we spgkela daha ka kari Bukung ma grangan daha rmengo uri. Kiya de mosa Yerusalem. Mkleelu we sgarang daha egu alang Samareia ka malu kari.

Pilipos ma Gnbgaxan Icyupiya

26Rmengo Pilipos ka snkgulan Bukung: “Tutuy! Psquri hunac, osa elu oosa peeyah Yerusalem betaq Ajah.” Elu nii we elu tadus brenux. 27Kiya de mtutuy ma mosa ka Pilipos. Tai, meyah ka 1 seediq Icyupiya gnbgaxan. Heya we 1 qbsuran paru gaga qmlahang kana dnoi nKandake. Kandake we qbsuran mqedil paru seediq Icyupiya. Kiya de mneyah Yerusalem thmuku Utux Baro ka heya. 28Mosa sapah ciida we tleung rulu na ma smepu patis Isaya mpgeela kari. 29Rmengo Pilipos ka Bgihur Utux: “Osa! Sai smdaling ka rulu nii.” 30Kiya de tmalang mosa hiya ka Pilipos, qbhangan na nii smepu patis Isaya mpgeela kari ka heya. Kiya de slingan na: “Klaun su ga su spegun?” 31Cmiyuk ka heya: “Uka ka mptgesa na kenan de huwa ta kesun mkela da ho?” Kiya de pyahan na rulu baro ma suupu tleung heya ka Pilipos. 32So nii ka patis ga na spegun, rmengo:

“Heya we mntena so miric rudu ddulun mosa dxeral ssaun gmdara,

mntena so wawa miric rudu mlmelux berah maatak ubal na.

Heya we ini kngaha quwaq na uri.

33Psqaun daha ka heya ciida, ini daha ndwai psderux psgao.

Ima ka mpkela smneeru quri kndesan na?

Ado wada ngalun peeyah bobo dxeral ka knuudus na.”

34Rmengo Pilipos ka gnbgaxan: “Braho misu, kari nii srengo mpgeela kari nii we quri ima ka ga na srengo ho? Heya nanak ho? Uxe uri we taxa heyi ho?” 35Kiya de rmengo ka Pilipos, speeyah na Patis Mrtaso nii sgarang na heya ka Yesu. 36Mtheyaq mkleelu ciida ka dheya we, dehuk niqan qsiya de rmengo ka gnbgaxan: “Tai, nii hini ka qsiya. Ptgaya ku psino we maanu ka mpsqeya na ho?” 37Rmengo ka Pilipos: “Nasi su bale ba ms1 snhiyan su peeyah lhebun de maha malu psino su.” Cmiyuk ka heya: “Snhiyun mu Laqi Utux Baro ka Yesu Kiristo.” 38Kiya de mlawa mladu rulu ka heya, Pilipos ma gnbgaxan we msuupu hmeruc mosa ckceka qsiya. Kiya de ptgaya psino heya ka Pilipos. 39Peeyah ckceka qsiya mtutuy ka dheya de wada asi ngali Bgihur Utux Bukung ka Pilipos. Gmbgaxan we ini na qtai dungal ka heya ma tqqaras mosa ssaan na. 40Kiya de taan daha meniq Asotos ka Pilipos, mtqiri moda kana alang hiya ma gmarang malu kari betaq dehuk Kaisareia.

Currently Selected:

Qneepah 8: Stgdaya

Highlight

Copy