Qneepah 7

Ini Deqo Rmengo ka Stepanos

1Smiling ka pusu paru msapuh: “Bale ba niqan ka so nii ho?” 2Rmengo ka Stepanos: “Mtswai ma rdrudan, qbahang! Meniq Mesopotamia ma ini theruy Xaran ka rudan ta Abraham berah na ciida, mtqita heya ka Utux Baro lmedax. 3Kiya de rmengo heya: ‘Htii malix ka dxeral su ma llutuc su, osa dxeral tniyu mu sunan.’ 4Kiya de mlatac peeyah dxeral Krdiya ma meyah meniq Xaran ka Abraham. Bobo wada mhuqil ka tama na de Utux Baro we ptheruy heya peeyah hiya betaq dxeral nii namu niqan saya. 5Meniq dxeral hini, ini biqi dxeral Utux Baro ka Abraham. Ani dxeral qqahan papak na we uka uri. Kiya de sntangan bbege ddooyun na heya ma lqlaqi ltlutuc na ka dxeral nii. Ciida uka laqi nana ka Abraham. 6Rmengo ka Utux Baro: ‘Llqlaqi ltlutuc na mooda meniq dxeral icil ma, dseediq hiya we ngalun daha tnqliyan ma pqrqilun daha 4'00 knkawas ka dheya. 7Rmengo dungal ka Utux Baro: Mnangal tnqliyan dheya ka seediq nii we pkdraun mu. Kiya de bobo na ciida du we mplatac peeyah hiya ka dheya ma mpthmuku kenan dxeral hini.’ 8Dungal we Utux Baro ge sbege na heya ka pnsdhegan moda gaya smalak. Kiya de tnlaqi Yijxaq ka Abraham ma mk8 ali de ptgaya psalak heya. Kiya de Yijxaq we tnlaqi Yakobu, Yakobu we tnlaqi 12 heyi pusu rudan cbeyo.”

9“Snhuur Yosehu ka rudan cbeyo ma bbrigun daha Micrayim ka heya. Msuupu meniq heya ka Utux Baro, 10dmoi baga heya peeyah kana pnqrqilan na. Kiya uri we biqan na qrasun qbsuran paru ma kkela lmngelung berah Paroh qbsuran paru Micrayim. Kiya de ngalun Paroh mpdudul kana Micrayim ma kana sapah na ka Yosehu. 11Ciida, kana Micrayim ma Kenaan we daan krayan ka dxeral ma paru ba qnraqil, kiya de uka uqun daha ka rudan ta. 12Mnbahang niqan uqun ka Micrayim ka Yakobu de skgulan na ka texal lqlaqi na, kiya we rdrudan ta. 13Mn2 pgkela mqqita dmtswai na ka Yosehu ciida de, klaun Paroh ka tnsapah na uri. 14Kiya de Yosehu we skgulan na ka mtswai na ma, splawa na ka tama na Yakobu ma kana tnsapah na 75 heyi. 15Kiya de mosa Micrayim ka Yakobu, bobo na wada mhuqil dxeral hiya ka heya ma rudan ta uri. 16Dheya we hadun daha Sekem hiya ma, psaun daha habung bnaruy ging Abraham peeyah laqi Xamor Sekem hiya.”

17“Smdaling ka ali sntangan Utux Baro quri Abraham ciida de, mrana hbaro bale heyi daha meniq Micrayim ka seediq Israel, 18betaq mtutuy ka bgurah qbsuran paru Micrayim ini kela Yosehu. 19Qbsuran paru nii we naqah qneepah na quri tnpusu rudan ta cbeyo ma pqrqilun na ka rudan ta. Sqada daha ka laqi ma so uxe daha pkkuudus ka laqi rabu daha. 20Ciida mtuting ka Moseh ma malu bale qtaan. Mk3 idas dnngean meniq sapah tama na. 21Sqada ciida ka heya we ngalun weewa Paroh ma, ngalan na laqi na nanak tmquli. 22Moseh we snluhe kana knkela seediq Micrayim. Kari na ma qneepah na uri we niqan ba beyax.”

23“Kiya de 40 knkawas na ciida ka Moseh we, niqan lnglungan na mosa qmita mtswai na lqlaqi Israel. 24Dehuk hiya de taan na ga pqrqilun ka 1 seediq ndheya. Kiya de qlhangun na ma cyukan na ka pnqraqil seediq ma, wada na phqilun ka seediq Micrayim nii da. 25Hliye na maha mkela mooda heya meyah rmaguh dheya ka Utux Baro mesa lmngelung ka Moseh. Kiya de, ini kela ka dheya. 26So kusun de taan na nii mtgdiyal ka 2 seediq Israel. Satang na psblequn ma kiya de rmengo: ‘Mtswai namu ka yamu. Hmuwa, ma namu mtgdiyal nanak ho?’ 27Seediq bneebu seediq ssiyo na kiya we scikul na ka Moseh ma rmengo: ‘Ima ka pnheyu isu mpqlahang ma mpsgao menan ho? 28Ya su mphuqil kenan, mntena su phuqil seediq Micrayim ciga ho?’ 29Mnbahang kari so nii ka Moseh de qduriq da. Mosa tnooda meniq dxeral Midyan. Tnlaqi 2 laqi ka meniq hiya.”

30“Bobo 40 knkawas na de, meniq tadus brenux dgiyaq Sinay hiya we, mtqita heya peeyah ckceka rana puniq dupi ka 1 snkgulan baro. 31Mita tuutux nii ka Moseh de msklui bale, mosa smdaling mita ciida we niqan ka hrenang Bukung, rmengo: 32‘Yaku we Utux Baro ndrudan su. Kiya de Utux Baro nuAbraham, nuYijxaq ma nuYakobu.’ Pkrkerang miicu ka Moseh ma miicu mita. 33Rmengo heya ka Bukung: ‘Lhelah ramil papak su. Ado dxeral mrtaso ka ga su hyegan. 34Bale ba taan mu ka mqraqil seediq mu ga meniq Micrayim, qbhangan mu ka hrenang sndringan daha uri. Meeyah ku toma mpdoi ku baga dheya. Saya, aguh ka isu! Skgulun su mosa Micrayim.’”

35“Moseh nii we kiya ka nlaxan seediq, rngagan daha: ‘Ima ka pnheyu isu mpqlahang ma mpsgao menan’ ka nii. Kiya de, Utux Baro ge, pnooda baga snkgulan baro, kiya ka tnqita ckceka dupi, snkgulan na mpqlahang ma mpdoi baga ka Moseh nii. 36Seediq nii we dnudul seediq Israel mlatac. Meniq dxeral Micrayim, meniq rcilung Mtanah ma 40 knkawas ka nniqan na tadus brenux uri we, qmeepah pnskraya qneepah ma sklwiun bale. 37Moseh ka seediq nii, kiya ka rmnengo seediq Israel: ‘Utux Baro su we mptutuy 1 mpgeela kari peyah mtswai namu mntena yaku’ na. 38Seediq nii we mneniq pnssliyan seediq Israel sapah thmkuwan tadus brenux, mnsuupu snkgulan baro rmnengo heya dgiyaq Sinay ma, msuupu rdrudan ta ka Moseh. Kiya uri we mnangal uka psteqan mrtaso kari ma sgarang na ita. 39Kiya de ini qbahang heya ka rudan ta. Scikul daha ma kmbrinah Micrayim ka lnglungan daha. 40Kiya we rngagan daha ka Aharon: ‘Slmaani nami utux mdudul mkkesa mpgeela ita. Ado dmnudul ita peeyah Micrayim ka Moseh nii we wada huwa mesa we ini nami klai.’ 41Ciida smmalu daha ka hnyegan wawa dapa ma ngalun daha tikung smapuh. Qrasun daha tmdahu ka snlmean baga daha. 42Kiya de mege bukuy dheya ka Utux Baro ma spooda nanak lnglungan daha pthmuku pngerah baro. Mntena so ga spatis patis dmpgeela kari:

‘Seediq Israel! Meniq namu tadus brenux hiya we 40 knkawas,

bnege namu kenan camac nngalan ma snapuh peni!

43Saapa namu ka kobu Molek,

Raipan utux namu pngerah.

Nii we heyi snmalu namu tthmkuun.

Kiya de pthrigun maku thngali Babirun!’”

44“Rudan ta we niqan ga pniqan gaya kulu kobu meniq tadus brenux hiya. So nii we smnalu na mntena pnosa kari rmnengo na Moseh. 45Kobu nii we pnslutuc daha dmoi rdrudan ta ma Yehosua. Pnqduriq Utux Baro peeyah berah daha ciida ka seediq icil, mntheyaq Yehosua desun daha theruy ddxeral ngngalun daha hiya ka kobu nii. Kiya ma betaq ali Dawid. 46Dawid we khwayun ba Utux Baro ma mesa ssmalu na sapah niqun Utux Baro nuYakobu. 47Kiya de Selomoh ka snmalu sapah Utux Baro. 48Ani si Utux Tgpusu Baro we ini eniq sapah snmalu baga seediq. So nii ka rnengo mpgeela kari:

49‘Rmengo ka Bukung: Karac baro we tluungan mu.

Bobo dxeral we scpilan mu papak.

Mgmaanu ka sapah ssmalu namu kenan ho?

Nniqan mgmaanu ka ssngayan mu?

50Uxe snmalu baga mu ka kana nii peni?’”

51“Yamu seediq nii mkere nduyung ma ini ptgaya psalak lnglungan ma birac, hmetur namu Bgihur Utux klaali! Hmuwa mesa ka rudan namu we so kiya ka yamu uri. 52Dmpgeela kari we ima ka ini oda ptraqil rudan namu ho? Kiya de pgeela rmengo quri eeyah na msderux oda we phqilun daha. Yamu saya ka wada maruy heya ma pnhuqil heya. 53Yamu ge, mnangal namu gaya snkgulan baro ma ini namu pyugi.”

Phqilun Daha Btunux Ka Stepanos

54Mbahang kari so nii ka seediq de mseang ka lhebun daha ma, pgtegic rupun daha mquri Stepanos. 55Kiya de ga stngayan Bgihur Utux ka Stepanos, tgleus mita karac baro ma, taan na ka knledax Utux Baro ma Yesu ga mheyu narac Utux Baro. 56Kiya de rmengo: “Tai, taan mu ga mtraguh ka karac, Laqi seediq ga mheyu narac Utux Baro!” 57Kiya de hbaro seediq we paru ba quwaq daha mddiras, gmemuk birac daha ma asi psuupu tmbenu berah na heya. 58Kiya de sqada daha bukuy harac qnalang alang ma buun daha btunux. Seediq mpgkela na we psaun daha berah papak 1 riso Soro kesun ka lukus daha. 59Buun daha btunux ka Stepanos ciida, mlawa Bukung ka heya: “Yesu Bukung! Angal ka utux bgihur mu!” 60Kiya de tmbqelic ma paru quwaq na mlawa dungal: “Bukung! Qnquwan nii we iya ppai dheya!” Rmnengo nii de mhuqil da.

Currently Selected:

Qneepah 7: Stgdaya

Highlight

Copy