Qneepah 6

Geegi 7 Pqlhangun Qpahun

1Mrana bale ciida ka tnugsaan, mskari Hellenis ka seediq Yudaya we snyaxun daha psquri rmengo ka seediq Yudaya mskari Hiburu. Ado bbege klaali we srhuqan daha mege ka mqedil mqrinuc daha. 2Kiya de 12 heyi snkgulan we splawa daha ka kana tnugsaan ma rmengo dheya: “Qmada nami kari Utux Baro ma, mosa nami qmeepah quri mege uqun we ini mnuglengu ka so kiya. 3Maanu so kiya de mtswai, geegi peeyah yamu ka malu qneepah daha, ga stngayan Bgihur Utux ma niqan knkela ka 7 seediq. Dheya ka pqlhangun nami qpahun nii. 4Kiya de pskingal nami moda dmurun ma gmarang kari Utux Baro ka yami.” 5Qrasun daha kari rnengo nii ka kana knhbaro seediq. Kiya de geegan daha ka Stepanos, heya we niqan ba snhiyan na ma ga stngayan Bgihur Utux uri. Kiya uri geegan daha ka Pilipos, Prokoros, Nikanor, Timon, Parmenas ma pneyah Antiokeia ka Nikolaos tnuumal kntmaan Yudaya. 6Phyegun daha berah snkgulan ka dheya. Bobo dmnurun ka snkgulan de psaan daha baga ka tunux daha.

7Mrana mkgarang ka kari Utux Baro. Mrana knhbragan snpegan ka tnugsaan ga meniq Yerusalem. Kiya de snhii kari nii ka hbaro bale msapuh uri.

Ga Qrapun ka Stepanos

8Ga stngayan beyax ma huwe Utux Baro ka Stepanos, paru ba sklwiun ma pnskraya qneepah Utux noda na ckceka seediq. 9Ciida, pneyah sapah pssliyan Libertinos kesun tmngayan ka duma seediq, duma we seediq pneyah Kurenaios, Aleksandria ma, duma we pneyah Krikiya ma Asia, mtutuy ma pkeekan kari daha Stepanos. 10Stepanos we mnoda knkela bnege Bgihur Utux ka rnengo na we uka daha klaan hmetur. 11Kiya de meyah ka seediq dndulan daha pila ma rmengo: “Qnbhangan nami ka kari na smngayan Moseh ma smngayan Utux Baro.” 12Dheya we bburun daha ka kana seediq, rdrudan ma dmptpatis de knssaya meyah mangal heya ma desun daha berah sapah pprngagan. 13Mberiq pgkela qnquwan na: “Seediq nii we ini psetuq smeeliq rmengo quri Sapah Thmkuwan ma gaya pndakar Moseh. 14Mnbahang nami rnengo na: Seediq Najare Yesu nii we sliqun na ka sapah nii ma pryuxun na ka gaya bnege ta na Moseh uri.” 15Kana seediq tnleung sapah pprngagan hiya we tgleesun daha mita ka Stepanos, mntena dqeras snkgulan baro taan ka dqeras na.

Currently Selected:

Qneepah 6: Stgdaya

Highlight

Copy