Qneepah 27

Paapa Asu Mquri Roma ka Poro

1Qulun so nii pnrngagan daha ka Huystu de dmurun yami paapa asu mosa Italia. Kiya de sbege daha Yolios qbsuran 1'00 supi peeyah pnspuwan supi ka Poro ma duma seediq niqan qnnaqah. 2Meniq hiya ka asu Adramutten, mkmooda ntrilan asu rcilung ssiyo Asia. Paapa miyan asu ma mosa miyan da. Msuupu menan ka pneyah Tesaloniki seediq Makedon Aristarks. 3So kusun de dehuk Cidon. Yolios we ndwaun gmaalu ka Poro ma srwaan na posa psbleyaq dadal na ka heya. 4Kiya de paapa miyan peeyah hiya dungal, ado smterung naqah ka bgihur de mooda miyan tgqeerung bgihur dxeral Kupros. 5Hmrinas nami rcilung berah Krikiya ma Pampulia de dehuk miyan Mura ga Rukia. 6Meeniq nami hiya ciida, Yolios we taan na hiya ka asu pneeyah Aleksandria mquri Italia de mlawa yami paapa asu nii. 7Yaa piya ali mknhuwe miyan mosa ka asu, wano ba dehuk rcilung sipo Knidos. Ado hmnetur menan ka bgihur de moda miyan tgqeerung bgihur dxeral Krete mquri sipo Calmone moda. 8Kiya de moda miyan ssiyo rcilung hiya mosa ma wano ba dehuk dxeral Kaloi. Meniq smdaling hiya ka alang Rasaia.

9Bsiyaq hari ka snliqan miyan ali ma wada hrnasan ka smseman ptgaya ini ekan. Ado so smiicu ooda daha asu ciida de pshuric rmengo dheya ka Poro, 10“Kana ita nii: Taan mu ka so nii ddaun ta asu, uxe wano gnutu ta qyqeya ma asu ka maha paru ba sliqun bgihur, kana knuudus ta uri we maha so nii mpkuuka.” 11Kiya de snhii seediq mdoi asu ma qbsuran asu ka qbsuran 1'00 supi we ini na bhangi ka rnengo Poro. 12Ado uxe malu ka meniq ntrilan asu hiya ka phrinas misan, kiya de hmrinas dmeka ka knhbragan daha meniq asu we rmengo mplatac asu peeyah hiya, uxe uri we mosa phrinas misan alang Poinij. Poinij we ntrilan asu ga Krete. Mquri pryaxan hido quri daya hari ma quri toma hari uri.

Paru Bgihur Rcilung

13Ciida, mnhuwe miyuk ka bgihur peeyah truma. Mqaras lmngelung ka dheya, kiya de ngalun daha baro ka daung pgdehu asu ma mquri ssiyo rcilung Krete mosa.

14Ini qbsiyaq de nii ka paru ba bgihur peeyah dxeral ma Yurakurung kesun daha tmngayan ka bgihur nii. 15Asi hteri mekan bgihur ka asu ma ini baka bgihur de qluli yupan bgihur ka dyami. 16Msdaling nami bukuy dxeral biciq moda ma Kauda kesun daha tmngayan ka biciq dxeral nii. Meniq hiya we wano nami mekuy asu biciq. 17Bobo wada psaun baro ka biciq asu de bkean nami bekuy ka lhebun asu. Kiya de miicu qqada bgihur tlekoh rcilung pnelaq Surtis hiya ma kiya de sladu daha ka pnslawa ma asi pqlii miyuk bgihur. 18Ado sgcuqi bale yupan bgihur ma buun bula rcilung ka asu de so kusun prading qmada gnutu qyqeya daha ckceka asu ka dheya. 19Mk3 we sqada daha ka qyqeya asu. 20Bsiyaq hari ini tai ka hido ma pngerah ma idas, ani kana beyax na ka bgihur nii miyuk de wada asi kuuka kana sntangan miyan kkuudus da.

21Ado bsiyaq ini ekan ani maanu ka dheya ciida, meyah mheyu ckceka dheya ka Poro ma rmengo: “Kana ita nii. Nasi namu qbhangan ka kari mu ini namu latac Krete de kani namu so nii gisu muuka ani maanu ma sliqan. 22Saya we mdudul ku yamu, kbeyax lnglungan namu. Uxe mpkgedang ani 1 ka knuudus namu, wano ba asu ka maha uka. 23Ado Utux Baro nii mu qpahun we snkgulan na mnheyu siyo mu skeeman ma rmnengo: 24‘Poro, iya kiicu. Ida su asi ka mheyu berah Kaisar qbsuran qnlhangan Ruma. Uxe wano kiya, kana msuupu sunan paapa asu uri we sbege na isu uri ka Utux Baro.’ 25Maanu so kiya de kana ita nii, kslokah lnglungan namu. So ka rnengo na kenan we ida maha so kiya mesa ka snhiyan mu Utux Baro. 26Kiya de ida ta tgsebuc bgihur mnkala dxeral biciq ckceka rcilung.”

27Msqluli miyan moda rcilung Adrias mk14 ali. Yaa ceka rabi keeman ciida we ida ta yaa gisu smdaling dxeral mesa lmngelung ka dmpqeepah asu, 28kiya de seengun daha ka knbragan qsiya we 12 sese. Mosa tikuh dungal we seengun daha dungal we 9 sese da. 29Miicu mooda ptgsebuc btunux ckceka rcilung ma posa daha peeyah ngungu asu ka 4 daung pgdehu asu. Kiya de psmeyah mpledax karac. 30Ciida ka dmpqeepah asu we lmngelung qqduriq ma mnnangi posa daung pgdehu asu peeyah tunux asu ma psaun daha rcilung ka asu biciq. 31Kiya de rngagan Poro ka qbsuran 1'00 supi ma dsupi: “Nasi ini tara meniq asu ka dheya we uka kkuudus namu.” 32Ciida ka supi we sqetun daha ka negul asu biciq ma psaun daha pqluli.

33Mpkledax karac ciida, Poro we dmudul eekan daha hnpure ma rmengo: “Muure namu tmara ini ekan ani maanu uqun ma betaq saya de 14 ali di. 34Maanu so kiya de mdudul ku ekan namu uqun. So nii we kkuudus namu. Ado kana namu we uxe mptuting ani 1 ka snuunux namu.” 35Rmnengo so kari nii ka Poro de mangal pang ma mqaras Utux Baro berah daha de gbingun na ma prading mekan. 36Kiya de slokah lnglungan daha kana duma mekan di. 37Kana miyan meeniq asu we 276 heyi. 38Kiya de tngtengi mekan ka dheya de psslkahun daha ka asu. Kiya de sqada daha rcilung ka mugi.

Pqeya ka Asu

39Lmedax ka karac de ini daha klai ka dxeral hiya. Kiya de taan daha hiya ka bnaquy pstreengan rcilung ma mpprengo yaa tduwa psngayun hiya ka asu. 40Kiya de sqetun daha ka negul daung pgdehu asu ma htiyan daha malix rcilung. Ciida uri we slbuyun daha ka negul mpgeriq asu. Kiya de phyegun daha ka pnslawa berah asu ma sbgihur mquri bnaquy. 41Kiya de dehuk pstrengun qsiya de tgdiyal dxeral hiya. Mgdehu mremux dxeral ka muxi asu ma ini klgelu da. Ngungu asu we wada sliqan mbeyax bula rcilung. 42Mpprengo phqilun daha ka seediq ga bkean, ado so uxe mtapaq rcilung qduriq ka dheya. 43Kiya de qbsuran 1'00 supi we hmetur pnrngagan daha. Ado kmpkuudus Poro ka heya. Kiya de rmengo so mkela lmangui na we pstaril rcilung ma plaale mosa dxeral. 44Duma na hiya we tduwa paapa qrtinuh uxe uri we ani paapa ngapih mnugerung asu mntaril dxeral. So kiya de wada muudus kana ka dseediq ma mntaril dxeral kana.

Currently Selected:

Qneepah 27: Stgdaya

Highlight

Copy