Qneepah 28

Meeniq Dxeral Malite

1Wada miyan muudus de hani miyan klaun biciq dxeral nii we Malite kesun ngayan na. 2Kiya de seediq tndxeral hiya we gmaalu smbleyaq menan. Ado qmuyux ma msekuy bale ka ciida we mtahu ma pplahan miyan na kana. 3Ciida, Poro we mosa lmamu 1 dnngean dupi mdengu qhuni ma psaun na puniq de ado mtilux ma cmriyu peeyah hiya ka quyu mphuqil seediq ma qmiyuc baga na. 4Seediq tndxeral we taan daha sduduy baga na ka quyu we mpprengo: “Seediq nii we ida yaa bale ba pnhuqil seediq. Ani mntaril ma muudus peeyah rcilung we ini sruwa pkuudus heya ka utux.” 5Kiya de Poro we plhlhaani na ptuting ckceka puniq ka quyu ma uka ani maanu pnlqihan heyi na. 6Seediq tndxeral we lmngelung maha mllabu ka baga na. Uxe uri we asi tgtemaq mhuqil. Kiya de ani bsiyaq psmeyah hhuqil na we taan daha ini hhuwa de kmpaux ka lnglungan daha ma rmengo: “Ida ba Utux ka heya!”

7Smdaling hiya we niqan dxeral nPoplios qbsuran alang ckceka rcilung. Heya ka mqaras psteme yami ma mk3 ali bale ba smbleyaq menan. 8Pkelu ciida ka tama Poplios we mnarux mtilux, msnbuyas ma mtaqi. Mremux hiya dmurun heya ka Poro ma posa baga heyi na ma wada pkmalu heya. 9So kiya de meyah kana uri ka seediq mnarux ma wada na pklmeun. 10Dheya we smparu mita menan. Mpaapa miyan peeyah hiya ciida we yahan daha hmaduc asu hiya ka ani maanu ddooyun nami.

Dehuk Roma ka Poro

11Bobo 3 idas de paapa miyan asu pneyah Aleksandria. Asu nii we meniq dxeral ckceka rcilung 1 knmisan. Ngayan na we Utux Mtnrurul. 12Mntaril miyan Surakusai de mk3 miyan meeniq hiya. 13Peeyah hiya moda miyan mtqiri ma dehuk Region. Bobo 1 ali, sbgihur peeyah quri toma ma mk2 ali de mosa miyan Potioloi. 14Msterung miyan hiya ka dsnheyi ma splawa miyan daha msuupu dheya meniq hiya 7 ali. So kiya de dehuk miyan Roma. 15Mbahang quri yami ka mtswai ga Ruma de peeyah hiya meyah smterung menan betaq Appiu Bbrigan ma 3 Sapah Tqiyan hiya. Poro we taan na ka dheya de mqaras Utux Baro ma mnpahung mbeyax lhebun na da.

16Bobo miyan mremux Roma de Poro we srwaan daha peeniq nanak msuupu 1 supi mpqlahang hiya.

Gmarang Kari Meeniq Roma ka Poro

17Bobo 3 ali de splawa na ka dmpdudul seediq Yudaya hiya. Kiya de meyah msseli ka dheya de rngagan na: “Kana mtswai, ani ku ini oda qmepah naqah quri seediq Yudaya ma quri gaya rudan ta we bkean ku daha, aadis ku daha peeyah Yerusalem ma sbege ku daha baga seediq Roma. 18Smniling kenan ka dheya de mkmalix kenan, ado uka mndungus phqilun ka qneepah mu qnnaqah han. 19Kiya de ini qqaras lnglungan daha ka seediq Yudaya de uka mu klaan. Wano ku posa baro psgao Kaisar qbsuran qnlhangan Ruma. Kiya de uka ka bale ba qnqnnaqah rrengo mu dseediq ita nanak. 20Maanu so kiya de so nii ka splawa mu yamu ma msuupu ta mpprengo. Ado Kiristo stangun seediq Israel kika bkean ku daha bnekuy nii.” 21Kiya de rmengo ka dheya: “Ini miyan angal patis quri sunan pneyah Yudaya. Dungal we ini eyah smneru ma rmengo so naqah su ka ani 1 mtswai uri. 22Kiya de kmqbahang miyan ka lnglungan su. Ado klaun nami ka snhii nii we gaga daha skciyuk bale.”

23Smeung ali ka dheya ma dehuk ka ali de meyah mremux ga niqan Poro ka hbaro ba seediq. Kiya de peeyah mgrebu betaq keeman sttratuc na rmengo dheya ka so nii. Kiya de saangal na peeyah gaya pndakar Moseh ma patis dmpgela kari uri we spgkeela na ka qnlhangan Utux Baro ma sdudul na dheya psnheyi quri Yesu. 24Duma we snhii rnengo Poro ma duma we ini snhii. 25Ini psdiyal ka lnglungan daha ma kmptalix ka dheya, ini taalix berah na ciida we rmengo 1 kari dheya ka Poro: “Bale ba ka kari Isaya mpgeela kari rmengo na rdrudan namu mnoda Bgihur Utux. 26Rmengo ka Isaya:

‘Sai rmengo ka seediq nii:

Yamu we mbahang ka mbahang ma uxe namu mpkela.

Mita namu ka mita ma uxe ini sreus mita.

27Ado gisu msgesuy ka lhebun seediq,

spuyan daha ka birac,

mqemi ka doriq,

so maha qmita ka doriq,

maha mbahang ka birac,

mkela ka lhebun daha de mpspgeriq,

kiya ka ppkmalu mu ka dheya.’

28Maanu so kiya de klai. Pkuudus Utux Baro nii we wada sgarang quri seediq icil qnlhangan. Mpqbahang ka dheya uri!” 29Rmnengo kari nii ka Poro de wada pkeekan kari mkleelu ka seediq Yudaya.

30Kiya de Poro we 2 knkawas meniq sapah knbrexan na hiya ma ani ima ka meyah mita heya we pstmaun na kana. 31Mnpahung ba gmarang kari quri qnlhangan Utux Baro ma quri Yesu Kiristo Bukung ka stgesa na. Kiya de uka ka hmetur heya.

Currently Selected:

Qneepah 28: Stgdaya

Highlight

Copy