Qneepah 26

Cmiyuk Rnengo Berah Agrippas ka Poro

1Kiya de Agrippas we rngagan na ka Poro: “Srwaun misu prengo isu nanak.” Kiya de Poro we hmkero baga na ma cyukan na rmengo ka rnengo daha qnqnnaqah: 2“Agrippas, qbsuran paru. Maanu ka kana rnengo daha qnnaqah kenan ka dseediq Yudaya, tduwa ku cmiyuk rmengo saya berah namu we malu bale. 3Niqan 1 malu na bale uri we isu ge mkela su kana gaya seediq Yudaya ma kana gaya daha pnkseengan. Maanu so kiya de ani su ba rabang, knremun qmbahang kenan.

4Yaku we peeyah ku laqi prading meniq ku ckceka seediq qlhangan. Kiya uri we meniq ku Yerusalem kndesan mu peeyah laqi we ida mkela kana ka seediq Yudaya. 5Nasi smruwa meyah pgkela rmengo ka dheya we maha namu klaun. Yaku we muyu ku pusu ba uka mhmetan pnspuwan kntmaan miyan meeniq ckceka seediq Parisay. 6Kiya we sntangan Utux Baro rdrudan miyan ka nii mu stangan we kika gisu mheyu hini saya pgao. 7Sntangan nii we kana 12 pnswayan rudan ma ani diyan ma ani keeman mdrumuc miyan qmeepah Utux Baro psmeyah maangal nii. Ah! Qbsuran paru, gisu ku daha biqan qnnaqah ka seediq Yudaya we kiya ka quri sntangan nii. 8Mtduwa pkuudus peeyah hnqilan ka Utux Baro ge, ma namu ngalan uxe snhiyun ka nii?

9Yaku cuxal uri we asi ku ka pqraqil bale seediq Najare Yesu ka ngayan na mnesa ku lmngelung. 10Mnoda ku so nii meepah alang Yerusalem ma mnangal ku pusu beyax peeyah dpusu msapuh de kiya ka shetur mu sapah kuung ka hbaro dsnheyi seediq. Wada phqilun ka dheya we tgimax ku hiya smruwa phuqil uri. 11Mneegu ku pkdira dheya rmengo kari pqrutiq sapah pssliyan. Kiya uri we msqama ku mseang dheya uri ma saan mu tmraqil mhero betaq alang qnlhangan icil.

Smneru Snhiyan Na Bukung ka Poro

12Ciida, mangal ku pusu beyax ma nkari dpusu msapuh ma mosa ku Darmeseq. 13Ah, qbsuran paru! Mkleelu ku ceka naali ciida we taan mu ka ledax hmrinas hido peeyah karac baro, pledax mtqiri kenan ma seediq mnsuupu kenan. 14Kiya de tgtemaq miyan dxeral kana ka yami ma qbhangan mu ka hrenang mskari Hiburu rmengo kenan: ‘Soro, Soro! Ma su tmraqil kenan ho? Qmleqah pako ka papak su we snlayan su mqraqil nanak ka nii!’ 15Rmengo ku: ‘Bukung! Ima su ka isu ho?’ Rmengo ka Bukung: ‘Yaku we kiya ka Yesu gisu su trqilun. 16Tutuy ma heyu. Mtqita ku sunan we mpskagul kmpqeepah sunan ma mpgkela su quri ntaan su kenan ma ppqita mu sunan. 17Dooyun misu baga peeyah seediq Yudaya ma peeyah seediq icil qnlhangan uri. 18Kiya de skgulun misu dheya. Kiya de pptraguh ka doriq daha ma pspgeriq daha peeyah kuung mquri ledax ma peeyah pusu beyax Satang mquri Utux Baro. Kiya uri we ado snhii kenan maangal daha pnsruwa qnquwan ma mangal dnoi msuupu kana seediq mrtaso.’

Rmengo Quri Qneepah Na Icil Qnlhangan Seediq

19Agrippas qbsuran paru! So kiya de ini ku seeliq ntaan mu tuutux peeyah karac baro. 20Plaale han meeniq ku Darmeseq, bobo de meniq ku Yerusalem ma kana dxeral Yudaya ma ani seediq icil qnlhangan uri. Rmengo ku ba dheya asi ka priyux lnglungan ma mquri Utux Baro, kiya uri we pqpahi mndungus pnryuxan namu lnglungan. 21So kiya de qmerac yaku ka seediq Yudaya meniq Sapah Thmkuwan ma satang mphuqil kenan. 22Kiya de wada ku dyagan Utux Baro betaq ku mheyu ali saya. Tduwa ku pgkela seediq pnspruwan ma seediq bcbiciq, ddrudan ma lqlaqi. Kari rnengo mu we kiya ka quri bale ba mpttuku meyah thiti mnesa rmnengo ka dmpgeela kari ma Moseh. 23Nii ge kiya ka Kiristo we asi ka mooda mqraqil, kiya uri we ado muudus peeyah hnqilan, mpgarang kari ledax quri duita ma dseediq icil qnlhangan.”

Snhii Bukung Kesun na ka Agrippas

24So nii cmiyuk rnengo daha ka Poro ciida we paru quwaq na rmengo ka Pestos: “Poro, gisu su mkuni da! Egu knkela patis su ka pkuni sunan!” 25Rmengo ka Poro: “Pestos, qbsuran paru! Uxe ku nii mkuni. Rnengo mu nii we bale ba ma mnnuiyo ku ba ka kari mu. 26Mkela so nii uri ka qbsuran paru. Maanu so kiya de knremun ku msderux rmengo heya. Snhiyun mu kana nii we uka ani 1 tduwa liingun berah qbsuran paru. Ado uxe na qneepah bukuy ka nii. 27Ah! Agrippas qbsuran paru. Snhii su dmpgeela kari ho? Klaun mu ida su snhii ka isu.” 28Rmengo Poro ka Agrippas: “Biciq kari sdudul su tmgesa de maha ku nKiristo da mesa su lmngelung ho?” 29Rmengo ka Poro: “Ani biciq ma egu ka kari su, dnurun mu Utux Baro we uxe wano isu, kiya ka kana seediq nii mbahang kenan we maha mntena yaku. Iya puyu kenan maadis so nii bekuy xiluy.”

30Kiya de mheyu ka qbsuran paru, qbsuran mdudul, Bervike ma seediq msuupu dheya tleung. 31Mlatac ka dheya ma mosa toma de mpprengo: “Seediq nii we uka qnnaqah na mnuglengu phqilun ma bkeun.” 32Rmengo Pestos dungal ka Agrippas: “Seediq nii we nasi ini posa baro psgao berah Kaisar qbsuran Ruma de mtduwa srwaan ka heya da.”

Currently Selected:

Qneepah 26: Stgdaya

Highlight

Copy