Qneepah 25

Posa Kari Baro ka Poro

1Dehuk ka Pestos de wada ka mk3 ali. Kiya de peeyah Kaisareia mosa Yerusalem ka heya. 2Dpusu msapuh ma dmpdudul seediq Yudaya we rmengo qnnaqah Poro ka dheya, 3rmengo qnnaqah Poro ma mesa huwe na aadis daha Yerusalem ka Poro. Dheya we mpqburang tmara elu pphuqil heya. 4Kiya de cmiyuk ka Pestos: “Ga shetur Kaisareia ka Poro. Uxe beyo maha ku hiya ka yaku.” 5Rmengo dungal: “Ckceka namu hini we so seediq niqan beyax na we psuupu kenan mosa. Nasi niqan maanu naqah naka seediq nii de tduwa namu srengo ka qnnaqah na.”

6Ini hrinas 8 uxe uri we 10 ali nniqan na ckceka dheya hiya ka Huystu de mosa Kaisareia. So kusun de tleung tluungan psgeegan ma dmurun peeyah berah daha ka Poro. 7Meyah ka Poro de pneyah Yerusalem ka seediq Yudaya we tmlibu mheyu ssiyo na ma egu ba knchedil qnnaqah kari ka sprengo daha heya. Kiya de uka daha klaan stratuc pgkela bale ba kana. 8Cmiyuk rnengo dheya ka Poro: “Ani sun quri gaya pndakar seediq Yudaya, uxe uri we quri Sapah Thmkuwan ma quri Kaisar qbsuran qnlhangan Ruma we ini ku sqnnaqah ani biciq.” 9Kiya de Pestos we ado kmpqaras seediq Yudaya de slingan na ka Poro: “Smruwa su mosa Yerusalem psgao kenan hiya quri so nii ho?” 10Rmengo ka Poro: “Gisu ku mheyu tluungan psgeegan nKaisar qbsuran qnlhangan Ruma, kiya hini ka psgeegan mu kenan. Ini ku pqnaqah ani maanu quri seediq Yudaya we ida su klaun bale ka nii. 11Nasi ku bale ba qmneepah qnnaqah de mqnnaqah mndungus phqilun de bale ku ba phuqil, uxe ku mprengo ani maanu. Nasi uxe bale ka qnnaqah rnengo daha de uka seediq mptduwa mege dheya. Mkmosa ku pprengo psgao Kaisar qbsuran qnlhangan Ruma.” 12Ciida, Pestos we bobo mpprengo daha prngagan na de cmiyuk rmengo: “Mkmosa su pprengo psgao Kaisar qbsuran qnlhangan Ruma ka isu de tduwa su mosa hiya.”

Desun Berah Bervike Agrippas

13Bobo yaa piya ali meyah Kaisareia ka Agrippas qbsuran paru ma Bervike. Smbeyax rmengo Pestos ka heya. 14Bsiyaq hari nniqan daha hiya de Pestos we ssneeru na qbsuran paru ka quri Poro: “Niqan 1 seediq hntiyan malix sapah kuung Pelij. 15Mneniq ku Yerusalem ciida we dpusu msapuh ma rdrudan seediq Yudaya ge, srengo daha kenan ka quri Poro. Kiya de mesa kenan mege qnnaqah heya. 16Kiya de cyukan mu, ani ima we ini oda mtqita mpprengo ka mege qnnaqah ma niqan naqah seediq we maha uka na cyukan mpprengo ka pusu bnege daha qnnaqah. Kiya de asi daha biqi qnnaqah phqilun de ini tduwa so nii ka gaya Roma. 17Maanu so kiya de betaq msuupu meyah msseli hini ka dheya ciida de ini ku kbserux. So kusun de tleung ku tluungun psgeegan ma dmurun madis seediq nii. 18Kiya de mheyu rmengo qnnaqah na ka seediq mege qnnaqah. Bnege na qnnaqah we uka ka bale ba qnnaqah so gaga mu lnglungun. 19Wano duma so quri kntmaan daha utux nanak ma quri 1 seediq Yesu kesun ngayan na. Wada mhuqil ka heya duma, rmengo wada muudus ka Poro. 20Gisu mu ini kklai huwa ta kesun smiling ka so nii da ho, kiya ka smiling ku heya: ‘Mkmosa su Yerusalem psgao hiya quri so nii ho?’ 21Kiya de Poro we mesa kmmeeniq hini ka heya ma mpqbahang psgeegan kari pusu qbsuran. Kiya de dmurun ku heya peeniq hini ma tmara ku psaun mu berah Kaisar qbsuran Ruma ka heya.” 22Kiya de Agrippas we rngagan na ka Pestos: “Mpqbahang ku prrngagan seediq nii ka yaku ku uri.” Rmengo ka Huystu: “Mpqbahang su heya kusun.”

23Maanu so kusun de paru ba pnsthlangan daha meyah ka Agrippas ma Bervike, msuupu dqbsuran 10'00 supi ma dmpdudul seediq alang mremux sapah qbhangan kari. Kiya de dmurun kari ka Pestos de desun daha hiya ka Poro. 24Rmengo ka Pestos: “Agrippas qbsuran paru ma kana nii msuupu ita meniq hini. Tai ka seediq nii, kiya ka kana seediq Yudaya, ani meeniq Yerusalem ma hini uri we mnesa kenan ka dheya ma mdiras rmengo sa: ‘Iya pkdusi ka heya.’ 25Kiya de ini mu slai ani maanu mndungus phqilun ka qnnaqah na. Heya nanak ka mnesa mosa psgao berah pusu qbsuran. Kiya ka psaun mu heya mesa ku lmngelung. 26Quri seediq nii we uka so bale ba qnnaqah ppatis mu pusu qbsuran mu. Kiya ka saadis mu berah namu ma berah Agrippas qbsuran paru. So kiya de bobo snlingan de mmaha niqan ka ppatis mu pusu qbsuran. 27Taan mu nanak we mhaduc ta niqan pusu naqah seediq ma ini pklxani ba ka rnengo daha pusu qnnaqah de ini mnuglengu ooda ka so nii.”

Currently Selected:

Qneepah 25: Stgdaya

Highlight

Copy