Qneepah 24

Migin Kari Poro ka Seediq Yudaya

1Bobo mk5 ali de meyah ka Ananias paru msapuh ma msuupu duma rdrudan mpqlahang ma 1 ka Tertullos kesun ka mpririh rmengo. Dheya we meyah berah qbsuran mpdudul mpprengo qnqnnaqah Poro ka dheya. 2Splawa daha meyah ka Poro ciida de prading rmengo qnqnnaqah na ka Tertullos, rmengo: “Pelij, paru qbsuran! Ado isu mangal miyan paru ba msbleyaq. Dungal we mnoda malu knkela su wada su brahun kana ka qnnaqah klegan nii. 3Ida nami psramal klaali sunan ka stenge qaras lhebun nami. 4So ka uxe ku mprana rmengo smqeya sunan we srwai nami hiya qbhangi nami biciq ba kari nami. 5Ado taan miyan ka seediq nii we so mntena mnarux kkcugun. Kiya ka tmretun tbrinah kana seediq Yudaya mtqiri qnlangan. Heya uri we 1 pusu mpdudul pnspuwan Najare ka heya. 6Seediq nii we ani Sapah Thmkuwan we satang na prutiq. Kiya de wada miyan qrapun ka heya. 7Satang miyan kmpooda gaya pndakar psgeegan heya. Kiya de meyah ka Rusias qbsuran 10'00 supi ma pskeexan na ba maangal peeyah baga nami ka heya. Kiya de dmurun seediq mprengo qbriqan we meyah berah su hini. 8Slingi nanak isu ka heya, kiya de maha su klaun maanu kana ka gisu nami srengo qnnaqah na.” 9Dseediq Yudaya uri we tuumal heya rmengo qnqnnaqah na: “Bale ba ka kana so nii.”

Lmekuh Rmengo Heya ka Poro

10Kiya de qbsuran mdudul we smruwa prengo Poro de cmiyuk ka Poro: “Klaun mu ka isu we egu knkawas pnsgeegan su meeniq qnlhangan hini, kiya de mpqaras ku ba cmiyuk lmekuh rnengo yaku nanak. 11Nasi su slingan maha su klaun. Peeyah ku mosa Yerusalem thmuku ku Utux Baro betaq saya we ini hrinas 12 ali nana. 12Dheya we ini ku daha qtai ka meniq ku Sapah Thmkuwan, uxe uri we kana sapah pssliyan ma meniq alang we gaga ku pkeekan kari ani ima ma prrudu ku hbaro seediq. 13Rnengo daha qnnaqah kenan saya we uka daha klaan stratuc pgkela sunan quri rnengo daha. 14Kiya de wano 1 ka tgesa mu sunan. Kiya ka kesun daha elu mqnuuqu noda. Yaku we spuyu mu elu kiya ka qmeepah ku Utux Baro nrudan nami. Kiya uri we snhiyun mu ka kana gaya pndakar Moseh ma kari ga spatis patis dmpgeela kari. 15Kiya uri we sntama ku Utux Baro, psmeyah ku mhuqil seediq ani malu ma ani naqah mpkuudus peeyah hnqilan. Kiya ka dheya nanak uri niqan so nii sntangan daha. 16Maanu so kiya de psbeyax ku nanak yaku klaali so uka ttyuan na qnnaqah berah Utux Baro ma berah seediq ka lhebun mu. 17Wada egu knkawas de madis ku pnsseli pila ma qyqeya ssapuh dnayo daha qnlhangan ta. 18Mege ku snapuh ciida we taan ku daha wada ku psbgurah rutiq mu meeniq Sapah Thmkuwan de uka ka hbaro seediq msseli ma uka ka mrrudu squwaq uri. 19Wano duma seediq Yudaya pneyah Asia, dheya we nasi niqan ka qnnaqah srengo daha yaku we kiya ka asi ka meyah rmengo qnnaqah mu berah su hini. 20Uxe uri we dseediq nii we nasi daha slayan ka snrtiqan mu mnheyu ku berah prngagan we naka dheya nanak ka truura mprengo uri. 21Nasi bale ba niqan ka qnnaqah mu, kiya we wano 1 ba kari, kiya ka wada ku mheyu ckceka daha paru hrenang mu rmengo: ‘Yaku saya betaq kmeyah psgeegan prengo berah namu we kiya ka quri mpkuudus ka wada mhuqil.’”

22Pelij we mgkala duma seediq stratuc mkela quri elu kari nii. Kiya de ini asi saqic ma mthuwe rmengo dheya: “Trai ta ka Rusias qbsuran 10'00 supi han, kiya de psgaun mu ka ooda namu.” 23Kiya de druni na ka qbsuran 1'00 supi qmlahang Poro. Kiya ma sbleqan daha ka heya ma ini daha pdkari meyah mege heya ka dadal na.

Hmeruc Poro Meeniq Sapah Kuung ka Pelij

24Bobo yaa piya ali, Pelij we msuupu meyah mqedil na Trosila seediq Yudaya. Splawa na ka Poro ma qbhangan na kari quri snhii Kiristo Yesu. 25Kiya de Poro we psleelu na tmgesa ka kksderux lnglungan, qlahang heyi ma ppsgeegan ali nexal. Miicu bale ka Pelij ma rmengo: “Osa ka saya han. Niqan ka malu ali mu de splawa misu dungal.” 26Kmtara mege pila peeyah Poro ka Pelij. Kiya de mneegu mlawa heya ma mprengo heya. 27Mnhedu ka 2 knkawas de meyah rmirix Pelij ka Porkios Pestos. Kiya de kmpqaras seediq Yudaya ka Pelij de htiyan na peeniq sapah kuung ka Poro.

Currently Selected:

Qneepah 24: Stgdaya

Highlight

Copy