Qneepah 23

1Tlleus mita seediq prngagan ka Poro, rmengo: “Dmtswai, yaku we mooda ku malu dnudul lhebun mu ka qmeepah ku berah Utux Baro betaq ali saya.” 2Kiya de Ananias paru msapuh we smkagul seediq mheyu ssiyo na smebuc quwaq na. 3Rmengo heya ka Poro: “Qnabil rncuhan bhege, msebuc sunan ka Utux Baro! Tleung su hini mooda gaya pndakar psgeegan kenan ma su tbrinah gaya pndakar smkagul seediq beebu yaku ho?” 4Rmengo ka seediq mheyu ssiyo na: “Gisu su smngayan paru msapuh nuUtux Baro ka isu ho?” 5Rmengo ka Poro: “Mtswai, paru msapuh ka heya we ini mu klai. Mnatis so nii ka Patis: ‘Iya qnqihi rmengo ka mpdudul seediq su.’”

6Poro we qtaan dheya duma we Sadokay ma duma ka Parisay. Kiya de paru ba quwaq na rmengo ckceka prngagan: “Mtswai, yaku we seediq ku Parisay ma dlaqi Parisay uri. Gisu ku daha prrngagun hini saya we ado ku ka psmeyah muudus ka wada mhuqil.” 7Rmnengo so nii kari de pkeekan kari ka Sadokay ma Parisay. Kiya de mtg2 ka hbaro seediq. 8Ado rmengo ka Sadokay we uka ka kkuudus peeyah hnqilan ma uka ka snkgulan baro ma uka ka utux uri. Seediq Parisay de rmengo niqan kana ka daha nii. 9Kiya de so bruwa quwaq daha squwaq. Niqan ka duma mptpatis gaya seediq Parisay we mheyu ma mekan kari dheya rmengo: “Ini nami tai niqan naqah ani maanu ka seediq nii! Nasi rnengo na heya ka niqan utux ma uxe uri we niqan snkgulan baro uri we mphuwa namu ho?” 10Ciida de krinah paru ba pkeekan kari. Qbsuran 10'00 supi we kcugun na sgliqun daha ka Poro de smkagul supi mosa hiya, pskyexi mangal heya peeyah dheya ma desi na sapah supi.

11Keeman ciida we mheyu ssiyo Poro ka Bukung ma rmengo: “Kbeyax! Hmuwa su mesa pgkela yaku meniq su Yerusalem we maha su so kiya pgkela su yaku meniq Roma hiya uri.”

Migin Phqilan Poro

12Lmedax de msuupu lmngelung naqah qpahun ma smdehu ka seediq Yudaya, rmengo: “Nasi ini phqili ka Poro we uxe ta meekan ma mimah.” 13So ka mnsuupu lnglungan daha psdehu hiya we 40 sngari heyi. 14Dheya we meyah mita dpusu msapuh ma rdrudan, rmengo: “Mnhedu nami pheyu paru psdehu, nasi nami ini phqili ka Poro we uxe nami meekan ani maanu. 15Maanu so kiya de saya, yamu ma prngagan we rrngaani ka qbsuran 10'00 supi, ddesun na yamu hini ka Poro ma so nnnangi namu mooda mnduwa smiling quri heya. Mnhedu nami psramal duma phqilun nami ini dehuk berah nana ka heya.”

16Mbahang gaga Lmeing tmara ka laqi mtswai Poro de meyah mremux sapah supi ma smneru Poro. 17Kiya de Poro we splawa na ka 1 qbsuran 1'00 supi ma rmengo: “Adis qbsuran 10'00 supi heya ka riso nii. Ado niqan ssneeru na heya.” 18Maanu so kiya de desun na ma saan na pqita qbsuran 10'00 supi ma rmengo: “Ga shetur ka Poro we mlawa ma rmengo kenan: ‘Braho misu bale, adis qbsuran 10'00 supi ka riso nii’ mesa. Heya we niqan rrengo na sunan.” 19Qbsuran 10'00 supi we dooyan na baga ka riso ma mosa so ssiyo ma gmuruus smiling heya: “Maanu ka ssneeru su kenan ho?” 20Rmengo ka riso: “Seediq Yudaya we mnhedu mpprengo, meyah dmurun isu kusun, ppesa daha maadis Poro mosa prngagan. Maha mnnangi so mnduwa smiling quri heya. 21Isu we iya bale qbahang dheya. Ado 40 sngari ka heyi ckceka daha we ga tgleing qmburang heya. Dheya we mnhedu psdehu rmengo, uxe ta meekan ma miimah betaq phqilun ta ka Poro. Mhedu psramal ka dheya duma gisu tmara nanak ssruwa su da.” 22So kiya de qbsuran 100 supi ge psaun na ka riso de rmengo heya: “Iya sai smneeru seediq ka wada su srengo kenan ka so nii.”

Sbege Daha Pelij ka Poro

23Kiya de splawa na ka 2 qbsuran 1'00 supi ma rngagan na: “Psrmali 2'00 supi mpkkesa ma 70 supi paapa dmay ma 2'00 ka mdoi smbrangan. Kiya de 9 toke keeman kiya de maha ta Kaisareia. 24Psramal dmay ppaun Poro ma nduwa ba madis betaq Pelij qbsuran mpdudul hiya.” 25Kiya uri we matis patis ka qbsuran 10'00 supi, 26So hari nii ka kari na: “Yaku Klaudios Rusias, gisu ku rmengo mbeyax sunan qbsuran mpdudul Pelij. 27Seediq nii we qnerac seediq Yudaya, pphqilun daha ciida we qbhangan mu heya we seediq Roma. Kiya de maadis ku supi dmayo mangal heya. 28Ado kmklaun mu bale maanu ka pusu qnnaqah gaga daha srengo de desun mu berah prngagan daha. 29Kiya de klaun mu ciida, pusu qnnaqah gaga daha srengo heya we quri gaya pndakar daha. Uka bale ka qnnaqah mnuglengu phqilun ma mekuy heya. 30Bobo na de srnuwan ku seediq ka pnsrmalan naqah ooda seediq Yudaya kmphuqil heya. Kiya de asi mu desi berah su hini ka heya. Dmnurun ku seediq mprengo qnnaqah na we maha rmengo berah su.”

31Kiya de muyu kari dnurun qbsuran 10'00 supi ka dheya ma desun daha keeman betaq Antipatris ka Poro. 32So kusun de supi we sbege daha supi mpaapa dapa qqlahang daha dheya ka Poro. Kiya de mbrinah mosa sapah supi daha ka dheya. 33Mremux Kaisareia ka supi mpaapa dapa duma sbege daha qbsuran mpdudul ka patis. Kiya de phyegun daha berah na ka Poro. 34Qmnita patis ka qbsuran mpdudul de slingan na pneyah alang qnlhangan Ruma inu ka Poro. Klaun na pneyah Krikiya ka Poro de, 35rmengo heya: “Tara ta ka seediq mmeyah mprengo qnnaqah su, kiya de srtudul su mu qmbahang ka noda su.” Kiya de dmurun seediq qlhangi peeniq sapah Hrodes hiya ka Poro.

Currently Selected:

Qneepah 23: Stgdaya

Highlight

Copy