Qneepah 22

1“Mtswai ma rdrudan, braho namu qbahang. Saya mprengo ku kari cniyuk mu.” 2Mskari Hiburu rmengo dheya ka qbhangan daha de krinah mgmelux ka dheya. 3So kiya de rmengo ka Poro: “Yaku we mntuting ku Tarsos Krikiya ma seediq ku Yudaya. Mndakil ku alang hini ma pntgesa ku na Gamliel. Kiya we spuyu ku na uka mhmetan gaya pndakar rudan ta tmgesa. Mntena so kana yamu ali saya uri we mdrumuc ku ba qmeepah Utux Baro uri. 4Tmnraqil ku seediq muyu elu nii betaq phuqil dheya. Kiya de ani rseno ma ani mqedil we bkean mu ma psaun mu sapah kuung. 5Nii we paru msapuh ma ddrudan mpqlahang we tduwa pgkela ndaan mu. Mnangal ka patis paadis daha mtswai ma mosa ku Darmeseq, bbekuy mu ka seediq hiya ddesun mu pkdira Yerusalem.”

Smneru ndaan Na Snhii Bukung ka Poro

6“Mkleelu ku mkkesa smdaling Darmeseq ciida, yaa ba ceka naali we asi lux peeyah baro ka paru ledax ma pledax mtqiri kenan. 7Mtakur ku dxeral ma bhangun mu ka kari rmengo kenan: ‘Soro, Soro! Hmuwa, ma su pqraqil kenan ho?’ 8Kiya de cmiyuk ku rmengo: ‘Bukung! Ima su ka isu ho?’ Rmengo ka heya: ‘Yaku we kiya ka gisu su trqilun seediq Najare Yesu.’ 9So ka tnheyaq kenan ka seediq ge, ani daha taan ka ledax we ini daha truura mbahang ka hrenang rnengo kenan. 10Kiya de rmengo ku: ‘Bukung! Mphuwa ku mesa moda ho?’ Rmengo ka Bukung: ‘Tutuy ma osa Darmeseq. So ka sneengan mu kana qpahun su we rrengo na sunan hiya.’ 11Ado ani knkana knledax na ma ini ku tduwa qmita. Kiya de dooyan ku daha baga tnheyaq kenan ma mosa ku Darmeseq.”

12“Kiya we meniq hiya ka 1 seediq Ananias kesun we mdrumuc ba muyu gaya pndakar ma spruun bale seediq Yudaya hiya. 13Meyah mita yaku ka heya, mnheyu ssiyo mu ma rmengo kenan: ‘Soro, mtswai, qqita da!’ Ciida de mquri ku baro mita ma taan mu ka heya. 14Rmengo dungal ka heya: ‘Utux Baro nrudan ta we wada gmao sunan ma kkela su lnglungan na, qqita su na msderux ooda ma qqbahang su hrenang kari peeyah quwaq na. 15Ado saun su pgkela kana seediq ka quri qntaan su ma qmbhangan su. 16Kiya de saya we ma su nii msgcuqi da ho? Tutuy, druni ngayan na ooda ptgaya psino ma psnawi ka qnquwan su.’”

Pnlwaan Ggarang Kari Seediq Icil

17“Bobo na, mosa ku dungal Yerusalem. Dmurun ku Sapah Thmkuwan hiya ciida, asi ku qita so utux, 18qmnita ku Bukung rmengo kenan: ‘Tgaaguh ma latac nhari peeyah Yerusalem. Ado quri yaku ka spgkela su ma uxe daha ngalun ka seediq hini.’ 19Kiya de rmengo ku: ‘Bukung! Ida daha klaun ka wada mu psaun sapah kuung ma wada mu psruwan knkingal sapah pssliyan ka dsnheyi sunan. 20Kiya uri ma phqilun daha ciida ka Stepanos pgkela sunan we mnheyu ku ssiyo na heya ma mqaras ku ka yaku uri. Kiya uri we qnlhangan mu ka lukus seediq pnhuqil heya.’ 21Rmengo kenan ka Bukung: ‘Isu we osa! Ado skgulun misu dxeral theya seediq icil qnlhangan hiya.’”

Poro ma Qbsuran Mpqlahang Seediq

22Mbahang heya betaq kari nii ka hbaro seediq de pmbaro quwaq daha rmengo: “So nii seediq we pkngati peeyah bobo dxeral! Heya we ini tduwa pkdusun!” 23Mddiras mlawa ka hbaro seediq ma qmada lukus daha ma murus qbulic baro ka dheya. 24Qbsuran 10.00 supi Ruma de smkagul seediq desun daha sapah supi ka Poro ma sbetun daha qraqil ssebuc ma slingun daha. So kiya de kkela daha maanu ba ka gisu daha so nii mdiras heya ka dseediq. 25Hani nii sbekuy qraqil gnsgesan ciida, Poro we rngagan na ka qbsuran 1'00 supi mheyu ssiyo na: “Seediq Roma we ini dai mpprengo mesa niqan qnnaqah na, kiya de asi namu sbeti duma niqan so nii ka gaya ta ho?” 26Mbahang so nii ka qbsuran 1'00 supi de saan na smneeru ka qbsuran 10'00 supi: “Satang su so hwaun ho? Ado seediq nii we seediq Roma han!” 27Meyah smiling Poro ka qbsuran 10'00 supi: “Tgsai ku hiya, seediq su Roma ka isu ho?” Cmiyuk ka Poro: “Un.” 28Rmengo ka qbsuran 10'00 supi: “Egu ba pila bnaruy mu ma seediq ku alang Roma.” Rmengo ka Poro: “Yaku we ida ku peeyah pnttingan.” 29So kiya de, wada mlatac ka seediq ida mpqraqil msiling Poro. Mkela mesa seediq Roma ka Poro de qbsuran 10'00 supi uri we miicu da. Ado mnekuy heya han.

Rmengo Berah Prngagan ka Poro

30So kusun, qbsuran 10'00 supi we kmkela so maanu bale sqberiq daha Poro ka seediq Yudaya, kiya de lhlahun daha ka heya. Pssliun na ka pusu msapuh ma kana seediq prngagan. Desun daha dheya hiya ka Poro ma phyegun daha na berah daha.

Currently Selected:

Qneepah 22: Stgdaya

Highlight

Copy