Qneepah 21

Mosa Yerusalem ka Poro

1Smwaye nami hbaro seediq de paapa nami asu ma msderux nami mosa Kos. So kusun de dehuk nami Rodos. Peeyah hiya ma mosa nami Patara. 2Sterung nami hiya ka asu mquri Poinike de paapa nami asu peeyah hiya da. 3Taan nami ka Kupros de mquri nami toma hmrinas hiya, mosa nami Suria duma msange Turos. Ado lladu na hiya ka qyqeya ga daha saapa asu. 4Slayan nami ka dsnheyi hiya de mk7 miyan meniq hiya da. Pnoda Bgihur Utux dheya we rmengo Poro: “Iya osa Yerusalem.” 5Wada mnhedu ka ali nniqan miyan hiya de mlatac miyan mosa peeyah hiya. Kana dheya we msuupu mqedil ma laqi hmaduc smraki menan betaq nganguc alang. Tmbqelic miyan dmurun ssiyo rcilung hiya kana ma mswaye miyan da. 6Mremux miyan asu ka yami ma dheya we wada sapah daha da.

7Mnhedu miyan paapa asu peeyah Turos de dehuk miyan Ptolemais. Mqaras nami msterung mdoi baga mtswai hiya duma 1 ali theyaq miyan hiya. 8So kusun de mlatac miyan peeyah hiya ma dehuk miyan Kaisareia. Kiya de mremux miyan sapah Pilipos mpgarang malu kari ma meeniq miyan hiya. Pilipos nii we 7 heyi mqeepah na 1 dheya ka heya. 9Heya we 4 weewa na ini osa seediq na, dheya we mkela rmengo kari mpgeela kana. 10Pkelu miyan meniq bsiyaq hari hiya we peeyah Yudaya ka Agabos kesun mpgeela kari. 11Meyah menan ma ngalun na ka habik Poro, bkean na ka baga na ma papak na nanak, rmengo: “Rmnengo ka Bgihur Utux: ‘Ga meniq Yerusalem ka seediq Yudaya we mpntena so nii bkeun daha ka seediq tpusu habik nii ma bege daha seediq icil qnlhangan ka heya.’” 12Yami ma seediq hiya we mbahang nami so kari nii de msuupu miyan hmeruc Poro uxe na oosa Yerusalem. 13Rmengo ka Poro: “Hmuwa ma namu so nii lmingis pstemaq lhebun mu ho? Ado yaku ge, quri ngayan Yesu Bukung we uxe wano sbekuy dseediq ma ani ku betaq mhuqil Yerusalem uri we mpsruwa ku uri.” 14Uka hhridan ka Poro de mgmelux miyan quwaq duma, wano kari nii ka srengo nami: “So mnuglengu nanak lnglungan Bukung.”

15Meniq miyan hiya yaa piya ali de gmabul nami qyqeya nami ma mosa nami Yerusalem. 16Kiya de msuupu menan mosa ka duma tnugsaan peeyah Kaisareia ma aadis miyan daha ptaqi sapah Mnason kesun, bsiyaq snhiyan na duma heya we seediq Kupros.

Mosa Mita Yakobu ka Poro

17Dehuk miyan Yerusalem de mqaras ba smterung menan ka mtswai. 18So kusun we mtheyaq yami mosa mita Yakobu ka Poro. Meniq hiya uri ka kana rudan mpqlahang pssliyan. 19Kiya de dmoi baga dheya ka Poro, kiya de skngalun na pqbahang dheya ka Utux Baro we dmnoi heya gmarang kari ma qmneepah ckceka seediq icil qnlhangan. 20Mbahang so nii ka dheya de tmdahu Utux Baro. Rngagan daha ka Poro: “Mtswai, ckceka seediq Yudaya we yaa piya mang ka wada snhii Bukung. Kiya we mdrumuc bale mquri gaya pndakar uri. 21Mbahang kari smneeru seediq. Isu ge, ga meniq ckceka seediq icil qnlhangan ka seediq Yudaya we tgsaan su aalix tnugesa Moseh mesa. Iya dai ptgaya psalak ka laqi namu ma iya puyu gaya rudan, mesa su tmgesa dheya. 22Nii su meyah hini saya we ida daha bhangun. Maanu so kiya de huwa kesun da ho? 23Kiya de puyu kari nami moda ka isu! Nii meniq ckceka menan hini ka 4 heyi smndehu Utux Baro. 24Desi ka dheya ma suupu dheya mooda gaya psbgurah rutiq. Biqi heya ka pila bbege kkugus daha tunux. So kiya de mpkela ka hbaro seediq uxe bale ka bnhangan daha kari quri sunan tgberah. Maha mkela uri mnduwa su ba dmoi gaya pndakar. 25Quri seediq icil qnlhangan wada snhii Bukung we wada miyan pdesan patis, mdakar dheya, iya uqi ka snapuh tikung, dara, camac pncguhul ma iya pgsapac.” 26Kiya de Poro we maadis 4 heyi, so kusun de msuupu dheya mooda gaya psbgurah rutiq ma mremux Sapah Thmkuwan. Moda pqbahang sknuwan ka qhedu na ali psbgurah rutiq duma tmara ssapuh quri knkingal heyi daha.

Qrapun Sapah Thmkuwan ka Poro

27Mpqhedu ka 7 ali ciida, pneeyah Asia ka duma seediq Yudaya. Taan daha ga meniq Sapah Thmkuwan ka Poro de ddudul daha ka hbaro seediq ma qrapun daha ka heya. 28Mddiras rmengo ka dheya: “Seediq Israel, Aguh dmayo. Seediq nii we kiya ka tmgesa kana seediq ani inu smeeliq seediq Yudaya ma gaya pndakar ma Sapah Thmkuwan hini. Dungal we dduli na psteme Sapah Thmkuwan ka seediq Hellenis ma wada psrutiq Mrtaso dxeral nii.” 29Ado kari nii we, ntaan daha msuupu Poro mkkesa alang ka Tropimos seediq Epesos. Lnglungan daha ida wada desun Poro psteme Sapah Thmkuwan ka heya da. 30Mlgelu kana ka dseediq alang hiya ma tmalang meyah msseli. Kiya de qrapun daha ka Poro dima tlusi daha nganguc Sapah Thmkuwan. Kiya de asi daha lebi ka rhengun. 31Lmngelung phuqil heya ka dheya ciida we niqan ka seediq mosa rmengo qbhangan qbsuran 10'00 supi. Rmengo: “Gaga mrrudu ka kana alang Yerusalem.” 32Kiya de meyah ka heya duma desi na ka supi ma duma qbsuran 1'00 supi, tmalang mosa dheya. Qmita qbsuran 10.00 supi ma supi ka hbaro seediq de malix beebu Poro. 33Kiya de qbsuran 10.00 supi we meyah qmerac Poro ma dmurun bkei daha 2 bekuy xiluy. Smiling dheya uri, seediq ima ka heya ma maanu ka qneepah na. 34Kiya de hbaro seediq we so nii diras daha ka duma ma so kiya ka diras daha ka duma. Kiya de ado mrrudu squwaq ba ma qbsuran 10.00 supi de uka daha klaan mkela maanu bale. Maanu so kiya de desi na sapah supi ka Poro. 35Dehuk hako sapah ciida de asi phlani supi ka Poro. Ado hbaro seediq we mbeyax ba qmapur mkmangal heya. 36Kiya de smnegul bukuy mddiras ka hbaro seediq: “Asi phqili!”

Lmekuh Rmengo Heya Nanak ka Poro

37Ppstmaun daha sapah supi ka Poro we rngagan na ka qbsuran 10'00 supi: “Mtduwa ku rmengo kari sunan ho?” Rmengo ka qbsuran 10'00 supi: “Klaun su ka kari Hellenis ho? 38Sndure tnbrinah mrrudu ma dmnudul 40'00 mphuqil seediq mpqduriq tadus brenux hiya ka seediq Micrayim we uxe yaa isu ho?” 39Rmengo ka Poro: “Yaku we mntuting ku Tarsos Krikiya ma seediq ku Yudaya. Uxe ku nseediq biciq alang. Srwai ku prengo kana seediq. Braho misu bale.” 40Kiya de srwaan qbsuran 10'00 supi de mheyu hako sapah ma gmkuwak baga quri seediq. Mgmelux bale de mskari Hiburu rmengo dheya ka Poro:

Currently Selected:

Qneepah 21: Stgdaya

Highlight

Copy