Qneepah 20

Mosa Makedon ma Hellenis Dungal ka Poro

1Mgmelux ka pnrudu daha de mlawa dsnheyi ka Poro. Kiya de snbyaxan na de smwaye dheya ma mosa Makedon. 2Moda mtqiri hiya smbeyax bale dsnheyi ma meyah Hellenis. 3Wada 3 idas nniqan na hiya de mkmosa paapa asu mquri Suria. Gisu lmngelung pqraqil heya ka seediq Yudaya de asi psquri Makedon mosa ka heya da. 4Tnheyaq heya mosa Asia ka seediq we Sopatros laqi Purros seediq Beroia. Pneyah Tesaloniki we Aristarks ma Jekondos. Pneyah Derbe we Gaios ma Timoteos. Pneeyah Asia we Tukikos ma Tropimos. 5Wada knama ka dseediq nii ma tmara menan meniq Troas. 6Bobo ali smseman mekan pang ini psai tgeda de ppaapa miyan asu peeyah Pilipi ma mk5 ali de dehuk nami Troas. Kiya de mk7 miyan meeniq hiya.

Qnhdean Na Mosa Turuas ka Poro

7Tgkingal ali 1 sngayan, msseli nami ggebin pang ciida, Ado mplatac kusun ka Poro de mpprengo dheya ma betaq ceka rabi. 8Truma mgbaro pssliyan miyan sapah hiya we egu ba pncamo hiya. 9Kiya de Eutukos kesun ka 1 riso we tleung bais ma mslleung bale. Bsiyaq hari rmengo na kari ka Poro de ini tgkela mtaqi ka heya da. Kiya de peeyah sapah 3 tntunan mtuting truma. Kiya de pstoyun daha dmoi de tena mhuqil da. 10Mosa truma ka Poro ma taapa bobo heyi na. Thmkuwan na ma rmengo: “Iya prrudu, nii heyi na ka knuudus na!” 11Kiya de mosa baro dungal ka Poro ma gmebing pang ma mekan. Bsiyaq mpprengo ka dheya betaq lmedax. Kiya de mlatac hiya da. 12Desun daha nganguc ka mnuudus laqi nii ma duma seediq we asi kmalu bale kuxul daha.

Peeyah Turuas Betaq Miletos

13Plaale miyan mosa asu ka yami ma mquri miyan Assos, kmsterung miyan Poro hiya mesa nami. Ado so nii ka pnrngagan ma kmkkesa mesa ka heya nanak. 14Mpsterung nami Assos hiya ka Poro ciida de daun nami maangal ma paapa asu dehuk nami Mitulene. 15Paapa nami asu peeyah hiya ma so kusun de dehuk nami sipo alang Kios. So kusun dungal we mnoda nami msange Camos. Kiya de so kusun na hiya dungal we dehuk miyan Miletos. 16Ado Poro ge, so uxe na sgcuqi meeniq Asia hiya de mphrinas ku Epesos mesa ka lmngelung na. Kiya de mtgaaguh mosa ma so maha mpskela smseman 50 Ali meniq Yerusalem hiya.

Smbeyax Rmengo Rdrudan Mpqlahang

17Peeyah Miletos skgulan na Epesos ka seediq ma mlawa rdrudan mpqlahang pssliyan. 18Dehuk ka dheya de rmengo ka Poro: “Peeyah dhekan mu dxeral Asia we wada ku huwa mesa klaali meeniq ckceka yamu we ida namu klaun. 19Qmeepah ku Bukung, psbiciq ku bale lnglungan mu ma tsrusuq doriq mu. Mnoda ka pnseengan mqraqil ado pnsrmalan pnqraqil seediq Yudaya. 20Ida namu klaun uri. So ka niqan grrihun namu ka wada ku ini deqo pqbahang yamu. Ani berah seediq ani knkingal sapah seediq we ida ku tmgesa yamu. 21Kiya uri we pgkela ku seediq Yudaya ma seediq Hellenis uri so maha priyux lnglungan daha quri Utux Baro ma snhii Yesu Bukung. 22Saya we ado Bgihur Utux mpsquri ku Yerusalem. Mpsterung ku maanu hiya we ini mu klai. 23Kiya de klaun mu ka Bgihur Utux ka pgkela kenan knkingal alang, rmnengo maha niqan ka bnekuy ma mqraqil ka ga tmara menan. 24Ini mu krwahi ka knuudus mu, ini ku sparu mita knuudus mu uri. Wano mhedu ku moda ddaun mu ma mpptuku bale qpahun nangal mu peeyah Yesu Bukung. Kiya ka ppgkela malu kari quri huwe Utux Baro.

25Mneniq ku ckceka namu klaali ma gmarang ku quri qnlhangan Utux Baro. Saya, uxe namu mqita dqeras mu dungal we klaun mu. 26Maanu so kiya de ali saya we pgkela ku yamu. Nasi wada mhuqil ka ani ima ckceka namu we uka ssmereq namu kenan. 27Ado ini mu dqwani pqbahang yamu ka kana lnglungan Utux Baro. 28Pnheyu Bgihur Utux mpqlahang kana rahul ka yamu ge, qlahang nanak ka yamu ma ado rahul ma qlhangi uri. Mptabu namu pssliyan Utux Baro, pssliyan nii we bnaruy na dara na nanak. 29Klaun mu bobo ku mlatac peeyah hini de meeyah mremux ckceka yamu ka mseang ba huling bbuyu ma uxe mpkraguh rahul. 30Ani so ckceka namu uri, mptutuy mprengo smeeliq kari ma mpsridil ddudul daha psnegul dheya ka dsnheyi. 31Maanu so kiya de kiiyo. Lnglungi ka 3 knkawas ani keeman ani diyan ini ku psetuq tsrusuq doriq dmudul knkingal heyi namu. 32Saya we pstmaun maku Utux Baro ma kari quri huwe na. Kari nii we mtduwa psbeyax snhiyan namu, yamu ma kana seediq mrtaso we mpsuupu namu mangal qnbleyaq. 33Ini mu srai ka king, ging ma lukus seediq. 342 baga mu nii we wada mege ba ddooyun mu ma seediq tnheyaq yaku uri. So nii we ida namu klaun nanak. 35Quri ani maanu we wada mu thiqan yamu ka ppyugun. So namu maha klaun asi namu ka so nii qmeepah uri ma dmayo muuwic seediq. Kiya uri we asi namu ka ini chngii kari Yesu Bukung, rmnengo: ‘Mgkala mbleyaq ka mege ma daha ka mangal.’”

36Mnhedu rmengo so kari nii ka Poro de tmbqelic ma msuupu dheya dmurun. 37Lmingis bale ka kana seediq ma tnmmaku Poro ma tmunguh heya. 38Pusu ba sqnaqah daha kuxul we kiya ka rnengo na kari so nii: “Uxe namu mqita dungal dqeras mu.” Kiya de hadun daha smraki betaq paapa asu.

Currently Selected:

Qneepah 20: Stgdaya

Highlight

Copy