Qneepah 19

Meniq Epesos ka Poro

1Meniq Korinto ciida ka Apollos we mnoda dxeral tgdaya mosa Epesos ka Poro Sterung na hiya ka duma tnugsaan. 2Smiling dheya: “Snhii namu Bukung ciida we mnangal namu ka Bgihur Utux ho?” Rmengo ka dheya: “Ini. Uxe nami bnhangan mmeyah ka Bgihur Utux.” 3Rmengo ka Poro: “Maanu so kiya de ptgaya psino maanu ka noda namu ho?” Cmiyuk ka dheya: “Mnoda nami ptgaya psino Yohane.” 4Rmengo ka Poro: “Mnoda Yohane we ptgaya psino priyux lnglungan. Rmnengo seediq asi ka snhii gisu mmeyah bukuy na, kiya ka Yesu.” 5Mbahang so nii ka dheya de mooda ngayan Yesu Bukung ptgaya psino. 6Kiya de smbleyaq posa baga tunux daha ka Poro de yahan psteme Bgihur Utux ka heyi daha. Kiya de rmengo kari icil seediq ma mprengo kari pgeela. 7Kana seediq nii we yaa ba 12 heyi.

8Mremux sapah pssliyan ka Poro ma mk3 idas knseung ba rmengo ma pnstreengan kari quri qnlhangan Utux Baro ma dmudul psnheyi seediq. 9Bobo na, duma seediq we mtkere lhebun daha ma ini snhii. Kiya de rmengo naqah kari quri kari nii ka dheya. So kiya de mlatac dheya ka Poro. Rngagan na platac dheya ka tnugsaan uri. Kiya de klaali msterung kari mprengo meeniq sapah ptasan Turanos. 10So nii we niqan 2 knkawas qmbsiyaq. Kiya de mbahang kari Bukung ka kana seediq meeniq Asia. Kiya de ani seediq Yudaya ma seediq Hellenis uri.

Lqlaqi Skenas

11Utux Baro ge spoda na baga Poro mepah ani kana knparu beyax qneepah. 12Ani galiq sserus mering ma galiq qeerung berah nangal daha peeyah heyi Poro we psaun daha heyi mnarux de tgkaangal ka mnarux daha ma wada mlatac peeyah dheya ka bgihur naqah uri. 13Ciida, niqan ka duma seediq Yudaya mtnooda mkkesa alang ma peeyah kari we niqan beyax daha pqduriq dbgihur naqah. Dheya we seengan daha rmengo quri pnuutux dbgihur naqah ka ngayan Yesu Bukung. Rmengo: “Spooda mu ngayan Yesu gnarang rmengo Poro mposa ku kari yamu, latac, osa!” 14Qmeepah so nii we 7 laqi Skenas pusu msapuh seediq Yudaya. 15Cmiyuk dheya ka bgihur naqah: “Yesu we klaun mu. Poro we klaun mu. Kiya de yamu we ima ho?” 16Kiya de pstaril mosa heyi daha ka dseediq gaga qrapun bgihur naqah ma mepux dheya ma ini na baka. Kiya de pbrasun na ma plqihan na pqduriq peeyah ckceka sapah hiya. 17So nii we klaun kana seediq Yudaya ma Hellenis meniq Epesos de miicu bale. Kiya de spruun daha ka ngayan Yesu Bukung. 18Wada snhii ka seediq we meyah smneeru qneepah daha ka hbaro. 19Hbaro ka dseediq mhuni we pssliun daha ka patis daha ma sqmaun daha berah kana seediq. Spegun daha ka bnaruy patis we 5 mang pila ging. 20Maanu so kiya de kari Bukung we so nii mrana mkgarang ma mkgarang ani inu da.

Mbrebur ka Epesos

21Mnhedu ka so nii de Poro we mkmooda Makedon ma Aqaia mosa Yerusalem ka heya. Kiya de rmengo: “Bobo ku meniq hiya de ida ku asi ka mosa mita Roma uri.” 22Kiya de peeyah duma daha smkagul mpdayo heya we skgulan daha Makedon ka 2 heyi Timoteos ma Erastos. Heya nanak we tmara meniq Asia.

23Ciida, quri elu Bukung ka sprudu daha bale Epesos hiya. 24Ado niqan ka 1 mpqeepah ging Demetrios ka ngayan na. Heya ka smnalu ging sapah thmkuwan biciq psaan utux tikung daha Artemis. Utux tikung nii we biqan na egu rrihan qpahun ma dmpqeepah na. 25Psliyan na ka dmpqeepah mntena qpahun na ma rmengo: “Dangi! Ida namu klaun ita we smtama ta qpahun nii ka rrihan ta. 26Kiya de Poro nii ge, uxe wano meniq Epesos, huwa hari qhedu kana Asia, mooda psridil hbaro seediq, rmengo: ‘Snalu baga seediq we uxe utux.’ Nii we gisu namu taan ma qbhangan. 27So kiya de uxe wano smbiciq qmita qpahun ta nii. Dungal we slkahun daha mita ka sapah thmkuwan Artemis paru utux mqedil uri. Kiya uri ma thmkuwan kana Asia ma kana mtqiri qnlangan ka utux mqedil nii we pgdangun daha ka knpruwan na uri.”

28Mbahang so nii ka kana seediq de sqama seang daha ma mddiras rmengo: “Paru bale! Artemis utux seediq Epesos!” 29Mrrudu bale ka alang duma qrapun daha ka Gaios ma Aristarks seediq Makedon tnheyaq Poro. Kiya de tlusun daha ma asi psuupu tmbenu mremux qtaan tthiqan. 30Satang mpteme ckceka rahul seediq hiya ka Poro we ini srwai posa dsnheyi. 31Dadal Poro ka duma qbsuran mpdudul Asia we smkagul seediq mdakar rmengo heya, iya osa mremux qtaan tthiqan hiya. 32So nii diras daha ka duma ma so kiya diras daha ka duma. Mrrudu ka pnssliyan daha we yaa maanu ka yahan daha msseli we hbaro ba ka ini kela. 33Kiya de duma daha we speeyah daha ckceka mtutuy ka Aleksandria ma seediq Yudaya ka pnosa berah. Kiya de gmkuwak baga na ka heya ma satang mprengo kari dheya. 34Ado klaun daha heya we seediq Yudaya de asi pntena kari daha mlawa rmengo betaq hari 2 toki: “Paru bale! Artemis utux seediq Epesos!” 35Kiya de mptpatis alang we pgmlexun na ka hbaro seediq de rmengo: “Seediq Epesos! Alang Epesos we kika kesun mpqlahang sapah paru thmkuwan Artemis ma tikung mntuting peeyah baro we ima ka ini kela ho? 36Maanu so kiya de uka hteran rmengo ka nii dwe ida namu asi ka mgmelux ma iya rinah mtaaguh qmeepah so nii. 37Ado ani ini geeguy qyqeya sapah thmkuwan ma ini sngayan utux ta mqedil ka seediq nii we desun namu hini ka dseediq nii. 38Maanu so kiya de Demetrios ma dseediq msuupu heya ka niqan kari quri prngagan de ida maha niqan ka ali pssengan. Ida niqan ka qbsuran snkgulan Ruma meyah pprengo. 39Nasi namu smiling quri duma kari we saani pooda gaya psseli ma pssiling. 40Wada so nii mrrudu ali saya we uka ka pusu na. Maha ita ka sslingun daha pprengo da. So nii ka pnssliyan ta we uka klaan rmengo ka pusu na.” 41Mnhedu rmengo kari so nii de wada na lwaqun ka pnssliyan daha.

Currently Selected:

Qneepah 19: Stgdaya

Highlight

Copy