Qneepah 18

Meniq Korinto Ka Poro

1Bobo so nii de mlatac peeyah Atenay ka Poro ma mosa Korinto. 2Sterung 1 seediq Yudaya mntuting Pontos, Akulas kesun ka ngayan na. Ini qbsiyaq, madis Priska mqedil na peeyah Italia. Ado lmiwaq seediq Yudaya peeyah Roma ka Klaudios. Poro de mosa msuupu dheya qmeepah. 3Ado mntena qpahun daha ma msalu kobu ka dheya, kiya de msuupu dheya meniq hiya qmeepah ka Poro. 4Kiya de Poro we knkingal ali sngayan meniq sapah pssliyan msterung kari mpprengo daha seediq Yudaya ma seediq Hellenis dmudul psnheyi dheya.

5Dehuk pneeyah Makedon ka Silas ma Timoteos de mttilux ba gmarang kari ka Poro, spgkeela na seediq Yudaya ka Yesu we kika Kiristo. 6Tbrinah heya ma smngayan ka dheya de plhelah lukus na ka Poro ma rmengo: “Maha namu nanak ka dara namu! Uka pnugluban mu ka yaku. Peeyah saya de maha ku mquri seediq icil qnlhangan.” 7Kiya de mlatac hiya ma mosa sapah Titos Yostos kesun ngayan na. Kmtama Utux Baro ka seediq nii ma ga ssiyo sapah pssliyan ka sapah na. 8Krispos qbsuran sapah pssliyan ma kana tnsapah na we wada snhii Bukung kana ka dheya. Dungal we mbahang ka hbaro seediq Korinto de snhii ma moda ptgaya psino. 9Keeman ciida, rmengo Poro peeyah ckceka so tuutux ka Bukung: “Iya kiicu, rengo ma iya gmuki quwaq su. 10Niqan yaku ka mptheyaq sunan, kiya de maha uka ka mpqraqil sunan. Ado hbaro seediq mu ka gaga meniq alang nii.” 11Mneniq hiya 1 knkawas ma 6 idas ka Poro ma tmgesa kari Utux Baro dheya.

12Qmlahang Aqaia ka Gallion snkgulan prngagan Ruma ciida, msuupu lnglungan hmetur Poro ka seediq Yudaya ma desun daha berah tlengun psgeegan. 13Rmengo: “Seediq nii we dmudul seediq iya puyu gaya tthmuku Utux Baro!” 14Kmprading mprengo ciida ka Poro, rngagan Gallion ka seediq Yudaya: “Yamu seediq Yudaya, nasi hmili pnrngagan ma uxe uri we qmneepah paru naqah we ani ku knremun mbahang yamu. 15Nasi quri kari so ngayan ma gaya namu nanak dwe lngelung nanak yamu kiya. Uxe mu kuxul yaku ka mpsgeegun so nii.” 16Kiya de lwaqun na peeyah psgeegan ka dheya. 17Kiya de hbaro seediq we ngali daha ka Jostenes qbsuran sapah pssliyan, psrui daha berah tlengun psgeegan. Gallion we ini na psbgrnahi ka kana so nii.

Mbrinah Antiokeia ka Poro

18Bobo na ciida, bsiyaq hari meniq hiya ka Poro de htiyan na smwaye ka mtswai. Mosa paapa asu mquri Suria. Msuupu heya mosa ka Priska ma Akulas. Ado sndhegan kari ka heya, kiya de smaqic snuunux na meniq Kegrei. 19Dehuk Epesos de htiyan Poro hiya ka Priska ma Akulas. Heya nanak we mremux sapah pssliyan ma msterung kari mpprengo daha seediq Yudaya. 20Kmhuric dheya meeniq hiya ka dheya we ini sruwa ka heya. 21Kiya de smwaye dheya ma rmengo: “Nasi ku na srwaun ka Utux Baro we meeyah ku yamu hini dungal.” Kiya de paapa asu mlatac peeyah Epesos. 22Mntaril peeyah asu meeniq Kaisareia ka Poro de mosa tqita pssliyan Yerusalem. Bobo na de mosa Antiokeia. 23Bsiyaq hari meniq hiya de mlatac hiya dungal ma mooda quri Garatia ma Huyrugia pgdehu kntmaan dsnheyi seediq.

Gmarang Kari ka Apollos

24Dehuk Epesos hiya ka 1 seediq Yudaya mntuting Aleksandria ngayan na we Apollos. Heya we mkela bale rmengo ma mkela bale rmengo Patis Mrtaso. 25Seediq nii we pntgesa elu Bukung ma mttilux ba lhebun na ma spnduwa na stratuc rmengo ma tmgesa ka quri Yesu. Kiya de wano ptgaya smino Yohane ka klaun na. 26Mpahung ba rmengo kari meniq sapah pssliyan ka heya. Mbahang ka Priska ma Akulas de splawa daha sapah ka heya ma rnahun daha mnduwa stratuc pgkela ka elu Utux Baro. 27Mkmosa Aqaia ka Apollos de dmudul smbeyax heya ka dmtswai ma spaadis daha patis mtswai hiya ppsteme daha heya. Dehuk hiya de mnoda huwe Utux Baro snhii ka seediq we dyagan na bale. 28Ini na baka rmengo berah kana seediq ka seediq Yudaya. Saangal na kari Patis Mrtaso pgkela Yesu ka Kiristo.

Currently Selected:

Qneepah 18: Stgdaya

Highlight

Copy