Qneepah 15

Msseli Mpprengo Yerusalem

1Peeyah Yudaya meyah ka duma seediq ma tmgesa ita mtswai: “Nasi ini puyu gaya Moseh ptgaya psalak de ini tduwa pkdusun.” 2Kiya de Poro ma Brnabas ma dheya we paru bale ini psdiyal lnglungan daha ma pkeekan kari. Kiya de mtswai we ngalun daha ka Poro ma Brnabas ma duma ckceka daha hiya oosa daha Yerusalem mita snkgulan ma rdrudan mpqlahang quri pnseengan kari nii. 3Maanu so kiya de dheya we srkiun hmaduc pssliyan ma mooda Poinike ma Samareia. Kiya de snhii ka seediq icil qnlhangan we sttratuc daha ba pqbahang. Kiya de tqqaras bale kana mtswai. 4Dehuk Yerusalem de smterung dheya ka pssliyan, snkgulan ma rdrudan mpqlahang. Kiya de srengo daha ka kana qneepah daha ma msuupu dheya ka Utux Baro. 5Wano duma seediq snhii pneeyah pnspuwan Parisay ka mheyu ma rmengo: “Ida asi ka mooda gaya psalak ka seediq icil qnlhangan ma druni ka dheya ppuyu daha gaya pndakar Moseh.”

6Kiya de msseli mprengo nii ka snkgulan ma rdrudan mpqlahang. 7Bobo egu ba pnstrengan daha kari de mheyu ka Petros ma rmengo dheya: “Kana mtswai, klaun namu tena gmao kenan peeyah ckceka yamu cuuxal ka Utux Baro. Kiya we seediq icil qnlhangan ge, mooda quwaq mu qqbahang daha ka elu malu kari ma ssnheyi uri. 8Utux Baro we mkela lnglungan ta ma mpbkeela dheya uri, sbege na dheya ka Bgihur Utux ma mntena so ita. 9Kiya uri we Utux Baro we spooda na snhiyan psbgurah lhebun daha ma ini psaanak dheya ma duita. 10Maanu so kiya de saya we hmuwa, ma namu psseung Utux Baro. Kiya ka ini tgklai mapa rudan ta cbeyo ka kudo we psaun namu nduyung tnugsaan ho? 11Pkdusun tana ka ita we pnooda na huwe Yesu Kiristo Bukung, mntena so dheya. Nii we snhiyun ta kiya.”

12Mgmelux ka kana knhbaro seediq, mbahang pnsgasuc sneru Brnabas ma Poro. Kiya ka quri pnskraya qneepah Utux ma sklwiun ba mnoda dheya Utux Baro qmeepah ckceka seediq icil qnlhangan. 13Mhedu rmengo ka dheya, kiya de rmengo ka Yakobu: “Kana mtswai, qbahang kari mu. 14Rmnengo so nii ka Simon quri Utux Baro huwa mesa qmlahang seediq icil qnlhangan ciida ma peeyah ckceka daha aangal na seediq peeniq toma ngayan na. 15Mntena so nii ka kari dmpgeela kari uri. 16Mntena so kari ga spatis Patis:

‘Bobo na, meeyah ku dungal.

Psbgrahun mu smalu ka mntakur kobu Dawid,

psbrgahun smalu peeyah mnhurah,

brahun mu pheyu.

17-18Kiya de dseediq mnsngari,

kiya ka kana seediq icil qnlhangan mnlawa ngayan mu,

maha migin Bukung kana.

Kari nii we rmnengo Bukung kiya ka pneyah na smnalu bobo dxeral cbeyo pnugkela noda nii.’

19Maanu so kiya de lnglungan mu ge, iya pqrqili lnglungan ka seediq icil qnlhangan mpspgeriq quri Utux Baro. 20Wano paadis patis mdakar dheya iya oda qqeya snrutiq tikung, mmhemuc msuupu, pncguhul tnabu ma dara. 21Ado peeyah cbeyo we ida niqan knkingal alang ka gmarang patis Moseh. Spegun daha sapah pssliyan knkingal sngayan uri.”

Patis Cniyuk Prngagan

22Ciida, snkgulan ma rdrudan mpqlahang msuupu kana seediq pssliyan hiya we lmngelung kmgao seediq peeyah ckceka daha skguli daha Antiokeia msuupu Poro ma Brnabas. Kiya de gneegan daha we Barsabbas kesun daha tmngayan ka Yehudah ma Silas. 2 seediq nii we dheya ka mpdudul ckceka mtswai. 23Pdesun daha dheya ka patis so nii ka kari ckceka: “Snkgulan ma rdrudan mpqlahang ka yami mtswai we paadis miyan patis ita mtswai seediq icil qnlhangan ga meniq Antiokeia ma Suria ma Krikiya, malu namu ho? 24Mnbahang nami duma seediq pneyah ckceka nami, kari daha we prrudu yamu ma mosa pgedang lnglungan namu. Dheya we uxe nami dnurun ka dheya. 25Maanu so kiya de msuupu lnglungan nami gmao duma seediq ma skgulan nami yamu msuupu sgaalu miyan ba ka Brnabas ma Poro mosa yamu hiya. 262 seediq nii we kiya ka ado ngayan Yesu Kiristo Bukung ma ini kraguh knuudus daha. 27Maanu so kiya de skgulun miyan yamu hiya ka Yehudah ma Silas. Dheya we spsneeru rmengo noda nii. 28Ado Bgihur Utux ma dyami uri we lmngelung nami so uxe pcheding napa heyi namu, wano duma ooda nii we asi ka ini srhuqi. 29Kiya de mdakar nami snapuh tikung ma dara, pncguhun tnabu ma mmhemuc msuupu. So mtbale ka lnglungan namu!”

30Wada skgulan ka dheya de kiya ka mosa Antiokeia. Psseli kana dsnheyi ma sbege na ka patis. 31Smepu nii ka hbaro seediq de ado snqaras kari ckceka patis de mqaras ka dheya da. 32Yehudah ma Silas we ida mpgeela kari uri. Kiya de spooda daha egu ba kari dmudul mtswai ma pgdehu snhiyan daha. 33Kiya de bsiyaq hari nniqan daha hiya de sbleqan daha mnswaye posa dungal quri smnkagul dheya. 34Wano Siras we mnoda lnglungan na nanak meniq hiya na. 35Ida ga meeniq Antiokeia ka Poro ma Brnabas, mntheyaq hbaro seediq msuupu tmgesa seediq ma gmarang kari Bukung.

Mswaye ka Poro ma Brnabas

36Bobo yaa mkpiya ali de Poro we rngagan na ka Brnabas: “Nita dungal we sae ta rmigo ka mtswai knkingal alang gnrangan ta kari Bukung, teta yaa ga huwa mesa ka mtswai da ho?” 37Kmmaadis Markos kesun Yohane mosa ka Brnabas. 38Kiya de Poro ge, ado mnalix dheya mneniq Pampulia ma ini osa msuupu meepah ciida de ini sruwa maadis ka heya. 39Kiya de tgdiyal kari ka dheya duma asi pswaye da. Madis Markos ka Brnabas, paapa asu mosa Kupros. 40Poro we geegan na ka Silas ma bobo pstama huwe Bukung dheya ka mtswai de wada mlatac uri. 41Daan na mkkesa kana ka dxeral Suria ma Krikiya pgdehu snhiyan knkingal pssliyan.

Currently Selected:

Qneepah 15: Stgdaya

Highlight

Copy