Qneepah 16

Tqene Qmeepah Poro ma Siras ka Timoteos

1Poro we dehuk Derbe ma Rustra uri. Meniq hiya ka 1 snhii seediq, ngayan na we Timoteos. Lqlaqi mqedil Yudaya ma snhii Bukung. Tama na we seediq Hellenis. 2Mtswai meeniq Rustra ma Ikonion Timoteos we tndhuun daha ka heya. 3Kmmaadis heya msuupu mosa ka Poro, ado dseediq Yudaya hiya we klaun daha kana ka tama na we seediq Hellenis. Kiya de soosa daha ptgaya psalak ka heya. 4Moda lualang ka dheya. Kiya ka gaya pnrngagan snkgulan ma rdrudan mpqlahang ga Yerusalem we sgarang daha mtswai ppyugun daha. 5Maanu so kiya de kana pssliyan we mrana mgdehu snhiyan daha, klaali mrana knhbragan heyi daha.

Qmita Teutux Seediq Makedon ka Poro

6Kiya de Bgihur Utux we hmetur dheya gmarang kari meniq Asia. Kiya we dheya de mooda dxeral Huyrugia ma Garatia. 7Dehuk ayus Musia de mkmoda Bitunia ka dheya. Ini sruwa ka Bgihur Yesu. 8Kiya de hmrinas Musia ma mosa Troas. 9Keeman ciida mita so tuutux ka Poro. Niqan 1 seediq Makedon mheyu ma mesa heya rmengo: “Braho su eyah ba Makedon yahi nami dmayo.” 10Mnita so nii tuutux ka Poro de mkmosa Makedon ka lnglungan nami, ida pnlawa Utux Baro ka yami so gmarang ma pqbahang malu kari dseediq hiya.

Snhii Bukung ka Rudia

11Maanu so kiya de paapa asu peeyah Troas msderux mosa Calmotrake. So kusun de dehuk Neapolis. 12Peeyah hiya mosa Pilipi. Nii we plaale ba alang ckceka dxeral Makedon. Kiya uri we alang ga niqan supi Roma uri. Yaa mkpiya ali nniqan miyan alang hiya. 13Ali sngayan ciida de mlatac miyan alang ma mosa ssiyo yayung. Klaun nami niqan 1 ssaan daha dmurun ka hiya. Kiya de tleung nami ma rngagan nami kari ka mmqedil msseli hiya. 14Meniq hiya ka 1 mqedil mbaruy galiq mtgdiyuc ka mqedil nii ma Rudia kesun ka ngayan na, kmtama Utux Baro pneeyah Tuateira. Mbahang kari miyan ka heya de sraguh Bukung ka lhebun na ma spqlahang na pqbahang hiya ka rnengo Poro. 15Mqedil nii we msuupu kana sapah na moda ptgaya psino de mesa rmengo yami: “Nasi namu ngalun bale ba snhii ku Bukung ka yaku de teme sapah mu ma eniq hiya.” Kiya de hridun nami na bale.

Shetur Sapah Kuung Pilipi

16Bobo na, mosa nami ssaan dmurun, smterung menan ka 1 mqedil ma tnqliyan gaga sdooyan bgihur naqah psbunul. Heya we dmoi mpsbunul na ma saangal na egu ba rrihan ka dmpqlahang heya. 17Mqedil nii we smnegul Poro ma yami ma mdiras rmengo: “Seediq dnii we tnqliyan Utux Baro Tgpusu Ba Baro ma gmarang elu kkuudus yamu.” 18Wada egu ali so nii mlawa. Kiya de Poro we khrngasun na lmngelung de msspgeriq rmengo bgihur naqah: “Pooda ku ngayan Yesu Kiristo mpdudul ku sunan, latac peeyah heyi na!” Kiya de wada asi latac nganguc ka bgihur naqah. 19Dmpqlahang heya we qmita wada pkuuka ka rrihan ngngalun daha de qrapi daha ka Poro ma Silas, tlusun daha mosa berah dqbsuran mpqlahang meniq pssliyan seediq hiya. 20Kiya de sbege daha berah qbsuran alang hiya ma rmengo: “Seediq Yudaya ka seediq nii ma prrudu bale alang ta. 21Gisu gmarang gaya ini tduwa ngalun ita seediq Roma.” 22Kiya de meyah msuupu kmremux heya ka kana knhbaro seediq. Kiya de dqbsuran alang we ini daha plkusi lukus ma bbeun daha qhuni. 23Bobo mneegu bneebu qhuni de psaun daha sapah kuung, dmurun bale mpqlahang sapah kuung pgdehu qmlahang dheya. 24Mpqlahang sapah kuung we mbahang kari rnengo so nii de psai na ckceka truma sapah kuung ka dheya. Tgdhegi na rmuhu ka 2 papak daha.

25Yaa dungus ckceka rabi, Poro ma Silas we dmurun ma muyas uyas tmdahu Utux Baro, qmbahang birac daha ka seediq ga shetur uri. 26Kiya de asi lux paru ba ka runu betaq mlgelu ka pusu sapah kuung. Asi ptraguh kana ka neluk sapah kuung ma wada tkaangal ka kana xiluy bnekuy seediq ga shetur. 27Tmtgkela ka mpqlahang sapah kuung we taan na ga mtraguh kana ka neluk sapah kuung. Ida ba wada qduriq ka kana hnetur mesa lnglungan na de hmgeluq hlmadac na satang mphuqil heya nanak. 28Poro we paru quwaq na mlawa: “Iya pqraqil heyi su. Nii nami meniq hini ka kana nami.” 29Mesa camo ka mpqlahang sapah kuung ma pstaril mremux ma pkrkerang tgtemaq berah Poro ma Silas. 30Desun na mlatac ka dheya uri ma rmengo: “2 mtgesa, mphuwa ku mesa ka yaku kiya ka ptduwa pkuudus ho?” 31Rmengo ka dheya: “Snhii Yesu Bukung. Kiya de isu ma kana sapah su we mpkuudus da.” 32Kiya de srengo na heya ma kana tnsapah na ka kari Bukung. 33Ida keeman ciida, mpqlahang sapah kuung we desun na ka dheya ma trmaan na hiya ka luqah daha. Heya ma kana tnsapah na we asi oda ptgaya psino. 34Kiya de desun na sapah na nanak ka dheya ma shpure na. Ado wada snhii Utux Baro ka heya ma kana tnsapah na de mqaras kana daha.

35Lmedax de dqbsuran alang we skgulan daha mlawa ka mpqlahang: “Rwhaani ka 2 seediq gaga.” 36Kiya de mpqlahang sapah kuung we ssneeru na Poro ka kari nii ma rmengo: “Dqbsuran alang we smkagul seediq rraguh na yamu. Kiya de tduwa namu mlatac sapah kuung duma psbleyaq lnglungan namu mosa da.” 37Kiya de rmengo dheya ka Poro: “Yami we seediq Roma ma ini nami daha kesi niqan qnquwan na ma psrui nami daha berah kana seediq ma qdaani nami daha posa sapah kuung. Kiya de saya ka dheya we satang gnruus platac menan ho? Ini tduwa ka so nii! Plaani dheya nanak ka meyah maadis yami mlatac!” 38Dmqlahang we ssneeru daha dqbsuran alang ka kari nii. Kiya de mnbahang mesa dseediq Roma ka dheya de miicu da. 39Kiya de meyah lmabu dheya ma madis platac dheya, sbleqan daha platac peeyah alang daha. 40Poro ma Siras we mlatac peeyah sapah kuung ma mremux sapah Rudia. Taan daha ka dmtswai de smbeyax dheya ma mosa da.

Currently Selected:

Qneepah 16: Stgdaya

Highlight

Copy