Qneepah 14

Meeniq Ikonion Gmarang Kari

1Mooda so mntena oda kiya uri ka Ikonion. Mnsuupu mremux sapah pssliyan seediq Yudaya hiya ka dheya ma mbeyax rmengo. Seediq Yudaya ma seediq Hellenis we hbaro bale ka snhii. 2Kiya de so ka ini snhii ka seediq Yudaya we pkddudul daha ka seediq icil qnlhangan pqnaqah daha quri mtswai. 3Daha heyi nii we meeniq hiya bsiyaq ma smtama Bukung mnpahung ba rmengo Kari. Kiya de Bukung we pooda baga daha qmeepah pnskraya qneepah Utux ma sklwiun bale ooda pgkela kari huwe na. 4Seediq alang de mtg2 da: Mquri seediq Yudaya ka duma ma mquri snkgulan ka duma. 5Ciida, Seediq icil ma seediq Yudaya we msuupu mpqlahang daha msuupu meyah kana, satang so mpqsiqa snkgulan ma mpcebu btunux dheya, 6Mkela ka snkgulan de qduriq Rustra ma Derbe dxeral Rukaonia. 7Kiya de gmarang malu kari hiya.

Gmarang Kari Meeniq Rustra

8Kiya de meeniq alang Rustra hiya ka seediq ini kbeyax papak na, mrikic peeyah pnttingan na ma ini bale kkesa na. 9Seediq nii we mbahang kari Poro. Kiya de tgleus mita heya ka Poro, taan na niqan snhiyan na pkkmalu, 10kiya de paru ba quwaq na rmengo: “Tutuy, ksderux pheyu ka papak su!” Kiya de msqugu ma mkkesa uri. 11Qmita qneepah Poro ka hbaro seediq de pmbaro mskari Rukaonia: “Duutux we ma hnyegan seediq ma meyah ckceka ta.” 12Kiya de Brnabas we Jeus kesun daha tmngayan. Poro we Hermes kesun daha tmngayan, ado pusu ba mprengo ka Poro han. 13Madis dapa ka 1 msapuh sapah thmkuwan Jeus gaga nganguc alang. Madis marung phepah ma dehuk berah rhengun, msuupu hbaro seediq satang psapuh dheya. 14Mbahang so nii ka Brnabas ma Poro nii de sgliqan daha ka lukus daha ma asi naaguh mremux ckceka hbaro seediq. Paru quwaq daha rmengo, 15“Seediq, hmuwa, ma namu moda so nii ho? Seediq nami ka yami uri, mntena so yamu. Gmarang nami malu kari yamu. Nii we so aalix namu skbrhuwan so nii ma ppspgeriq namu quri Utux Baro muudus snmalu karac, dxeral, rcilung ma kana ani maanu ckceka na hiya. 16Utux Baro ge, kndesan seediq kndalax cbeyo we spooda nanak lnglungan seediq kana qlhangan, oosa daha elu daha nanak. 17Ani so kiya de uxe ka ini na pniqi ka mpgkela dheya quri qneepah na. Mntena so qmeepah malu, pquyux yamu peeyah baro, mege ali pqyexan yamu, mege uqun pktengi yamu ma pqaras bale lnglungan namu.” 18Mnhedu rmengo so kari nii ka 2 daha de hnteran daha ka hbaro seediq uxe daha ssapuh dheya. 19Kiya we duma seediq Yudaya pneyah Antiokeia ma Ikonion. Qbriqun daha ka hbaro seediq de buun daha btunux ka Poro. Yaa wada mhuqil mesa ka dheya duma tlusun daha nganguc harac qnalang alang. 20Tmlibu mheyu ssiyo na ka dsnheyi ciida, kiya de mtutuy ka Poro ma mremux alang. So kusun de msuupu Brnabas mosa Derbe.

Mosa Antiokeia Suria

21Gmarang malu kari alang seediq hiya ma hbaro seediq wada snhii mseediq tnugsaan. Kiya de mbrinah mosa Rustra, Ikonion ma Antiokeia. 22Moda pgdehu kntmaan dsnheyi ma dmudul iya psetuq snhii kari. Rmengo dungal: “Mremux ta qnlhangan Utux Baro we asi ta ka moda egu mqraqil.” 23Knkingal pssliyan we phyegan daha ka rdrudan mpqlahang ma dmurun ma moda ptgaya ini ekan. Kiya de spstama daha Bukung ga daha snhiyun ka dheya.

24Kiya de moda Pisidios ka 2 heyi ma dehuk Pampulia. 25Bobo rmnengo kari Utux Baro Perge hiya de mosa Ataleia. 26Peeyah hiya paapa asu mosa Antiokeia. Tbberah ciida, hbaro seediq meniq nniqan hini, wada daha pstama huwe Utux Baro ma maha mhedu qmeepah qpahun daha saya. 27Dehuk hiya ka dheya de pssliun daha ka seediq pssliyan. Kiya de so ka qneepah na msuupu dheya ka Utux Baro ma sraguh na rhengun kntmaan ka seediq icil qnlhangan we ssneeru na dheya. 282 heyi we bsiyaq hari msuupu dsnheyi meniq hiya.

Currently Selected:

Qneepah 14: Stgdaya

Highlight

Copy