Qneepah 13

Smkagul Brnabas ma Soro

1Ga pssliyan Antiokeia hiya ka duma mpgeela kari ma mptgesa. Kiya ka Brnabas ma Niger kesun ka Sumeon, Rukios seediq Kurenaios ma Soro. Kiya uri we Manaen tnqliyan Hrodes qbsuran. 2Thmuku Bukung ma ptgaya ini ekan ka dheya ciida, rmengo ka Bgihur Utux: “Psaanak kenan ka Brnabas ma Soro qqeepah daha qpahun pnlawa mu dheya.” 3Kiya de bobo ptgaya ini ekan ma dmurun de posa baga bobo 2 heyi nii ka dheya duma skgulan daha da.

Gmarang Kari Meeniq Kupros

4Skgulan Bgihur Utux ka Brnabas ma Soro. Kiya we mosa Seleukeia de peeyah hiya paapa asu mosa Kupros. 5Dehuk Salamis ciida de sgarang daha kana sapah pssliyan seediq Yudaya hiya ka kari Utux Baro. Nangal daha mdayo dheya ka Yohane Markos we meeniq hiya uri. 6Daan daha mtqiri betaq Papos. Sterung 1 seediq Yudaya mkela mhuni ma mnnangi mpgeela kari. Ngayan na we Bariesus. 7Heya we msuupu Sergios Poro qbsuran snkgulan prngagan Ruma. Sergios Poro we seediq mkela bale tunux. Splawa na ka Brnabas ma Soro we qqbahang na kari Utux Baro. 8Kiya de Elumas mhuni we hmetur snkgulan dheya ma satang na psrdilun ini psnheyi ka qbsuran. Ngayan Iruma we seediq mhuni. 9Soro we Poro ngayan na uri. Heya we ga stenge Bgihur Utux ma tgleus mita heya. 10Kiya de rmengo: “Isu nii stenge kana qqberiq ma kana naqah qneepah, laqi Qbsuran Bgihur Naqah, pais kana malu qneepah. Uxe su maalix psridil msderux elu Bukung ho? 11Saya we, ga meeniq heyi su ka baga Bukung. Mpkbudu su ma uxe su mqita hido han.” Kiya de asi knkuung ma csrumo ka doriq na duma mkkesa migin mdoi baga heya. 12Mita wada so nii ka qbsuran snkgulan prngagan Ruma de mskluwi ba kari Bukung de snhii da.

Meeniq Antiokeia Pisidios

13Kiya de Poro ma tnheyaq heya ka seediq we paapa asu peeyah Papos ma dehuk Perge ga Pampulia. Smwaye dheya ka Yohane Markos ma mbrinah Yerusalem ka heya. 14Paapa peeyah Perge mosa ka dheya ma dehuk Antiokeia Pisidios. Ali sngayan de mremux sapah pssliyan ma tleung hiya. 15Bobo wada mhedu smepu gaya pndakar Moseh ma patis dmpgeela kari, smkagul seediq mquri dheya ka dqbsuran sapah pssliyan. Rmengo heya: “Mtswai, nasi niqan kari ddudul namu seediq we rengo.”

16Kiya de mheyu ka Poro ma gmkuwak baga na ma rmengo: “Seediq Israel ma kana seediq icil qnlhangan ga miicu Utux Baro we qbahang! 17Utux Baro nseediq Israel nii ge, gneegan na ka rudan ta cbeyo. Tnooda meniq dxeral Micrayim ciida ka dseediq Israel we psbyaxan. Spooda na paru beyax baga na dmudul mlatac dheya peeyah hiya. 18Kiya uri we knremun dheya meeniq tadus brenux we yaa 40 knkawas. 19Bobo wada na phqilun ka 7 klegan seediq dxeral Kenaan hiya, saasu na ka dxeral ma ndheya ka dxeral. 20Bobo na de sbege na dheya ka dmpsgeegun we yaa 4'50 knkawas betaq ali Samuel mpgeela kari. 21Bobo na ciida de mesa 1 qbsuran paru ka dheya. Kiya de Utux Baro we sbege na dheya ka laqi Qis Soro Mslutuc peeyah Binyamin. 40 knkawas mqbsuran paru dheya. 22Priyuxun na ka Soro de phyegun na qbsuran paru daha ka Dawid. Heya uri we pgkela na rmengo ka heya: ‘Slayan mu ka Dawid laqi Yisay. Heya we seediq mlengu lhebun mu. Ani maanu heya we mpnduwa muyu lnglungan mu.’ 23Peeyah ckceka lqlaqi mslutuc seediq nii, Utux Baro ge spuyu na sntangan na ma pheyu 1 bukung mdoi baga seediq Israel, kiya ka Yesu. 24Ini eyah tgberah na ciida we tena gmnarang kari ptgaya psino priyux lnglungan kana seediq Israel ka Yohane. 25Mpqhedu tmalang snengan na ka Yohane ciida we rmengo: ‘Yaku we ima kesun ku namu lmngelung ho? Uxe ku heya ka yaku. Gisu bukuy mu ka 1 mmeeyah. Ani llhelah negul ramil papak na we uxe ku mpdehuk.’

26‘Mtswai, lqlaqi Mslutuc Abraham ma yamu seediq ga miicu Utux Baro, quri kari pkuudus nii we sgarang na ita kiya. 27Seediq mneniq Yerusalem ma dmpqlahang daha ge, ado ini daha klai ka Kiristo ma ini daha klai ka snepu daha knkingal ali sngayan ka patis dmpgeela kari. Kiya de wada daha biqan qnquwan phuqil ka Kiristo. Nii we wada bale ba nkari pgeela dmpgeela kari. 28Ani daha ini slai ka pusu qnnaqah pphuqil daha heya we ida daha pgsaun ka Pilatos phuqil na heya. 29Ptkuun daha qmeepah ka kana ga spatis Patis quri heya de sladu daha peeyah bobo qhuni ka heya ma psaun daha habung. 30Kiya de wada pkdusun Utux Baro peeyah hnqilan ka heya. 31Kiya ka seediq pneeyah Galil mntheyaq Yesu mosa Yerusalem we egu ba ali qmnita heya. Dseediq nii we dheya ka mpgkela na berah seediq saya. 32Malu kari nii miyan sgarang yamu uri, kika sntangan Utux Baro rdrudan ta cbeyo. 33Kiya we Utux Baro ge, wada na pkbale ka ita mlaqi na ma pkuudus peeyah hnqilan Yesu.’ Mntena ga spatis patis Uyas tg2 bnkegan hiya:

‘Isu we laqi mu.

Ali saya we yaku ka tmlaqi sunan.’

34Quri so wada pkuudus heya peeyah hnqilan ka Utux Baro we uxe mpsburo kiya di. Kiya de so nii kari na:

‘Sntangan mu Dawid ka mrtaso,

mtduwa stmaan we bege mu yamu.’ 35Rmnengo ka 1 spegan patis dungal:

‘Uxe su srwaun psburo ka mrtaso tnqliyan su.’

36Ado bobo qmneepah lnglungan Utux Baro mknexal ciida ka Dawid de wada mhuqil da. Wada msuupu rdrudan hiya duma wada msburo. 37Wano pnkuudus Utux Baro peeyah hnqilan we ini ksburo. 38Maanu so kiya de, kana ita mtswai, kari ssruwa qnquwan nii we mnoda seediq nii ka gaga sgarang yamu. 39Ani maanu ooda ini psderux we spooda namu gaya pndakar Moseh, snhii namu seediq nii dwe mpsderux kana da. 40Maanu so kiya de qlahang bale ka yamu, so ka uxe meeyah heyi namu ka ga spatis patis dmpgeela kari hiya.

41Rmengo ka Bukung: ‘Seediq yamu nii tmsiiyax, qita ba,

pskluwi ma kuuka!

Ado mneniq ku yamu heya we qneepah ku 1 qpahun,

ani daha srengo yamu we ida ini namu snhii.’”

42Mlatac peeyah sapah pssliyan ciida ka Poro ma Brnabas we rngagan daha eyah texal ali sngayan dungal rmengo kari nii ma pqbahang dheya mesa ka hbaro seediq. 43Bobo mhedu de seediq Yudaya ma seediq ga tuumal kntmaan Yudaya we hbaro ka smnegul Poro ma Brnabas. Rmengo kari dheya ka Poro ma Brnabas, dmurun dheya meeniq ckceka huwe Utux Baro klaali.

44Dehuk ka texal ali sngayan, huwa pqhedu msuupu msseli ka kana seediq alang. Meyah mbahang kari Utux Baro. 45Taan seediq Yudaya ka hbaro seediq de snhuur bale ka lnglungan dheya ma hmetur rnengo Poro ma smngayan. 46Krinah mnpahung rmengo ka Poro ma Brnabas: “Yamu we ida asi ka pllayun rmengo kari Utux Baro. Ado gmnhetur namu kari nii ma uxe namu mnuglengu maangal uka psteqan knuudus mesa lmngelung namu de mquri nami seediq icil qnlhangan. 47Ado rmnengo ka Bukung so nii ka dnurun na:

Gaga misu phyegun ledax seediq icil qnlhangan ka isu,

so su maha meepah ppkuudus betaq nhdean dxeral.”

48Mbahang so kari nii ka seediq icil qnlhangan de mqaras ma tmdahu kari Utux Baro. Kiya de snhii kana ka gneegan Utux Baro maangal uka psteqan knuudus. 49Kiya de mkgarang kana dxeral hiya ka kari Bukung. 50Kiya de seediq Yudaya we pkdudul mmqedil seediq icil qnlhangan kmtama Utux Baro, spruun mita seediq ma niqan ngayan seediq alang, kiya de ttraqil daha Poro ma Brnabas ppqduriq daha peeyah ayus dxeral hiya. 51Kiya de daha heyi nii we mquri dheya plhelah qbulic papak daha ma kiya de mosa Ikonion. 52Mqaras lnglungan tnugsaan ma stenge Bgihur Utux uri.

Currently Selected:

Qneepah 13: Stgdaya

Highlight

Copy