Qneepah 12

Phqilun ka Yakobu, Sbekuy ka Petros

1Ciida posa baga pqraqil duma seediq pssliyan ka Hrodes qbsuran paru. 2Wada na phqilun hlmadac ka Yakobu qbsuran Yohane. 3Taan na mqaras so nii ka seediq Yudaya, kiya de mosa qmerac Petros uri. Ali ciida we ali smseman mekan pang ini psai tgeda. 4Qrapun na ka Petros de psaun na sapah kuung. Sbege na 4 qmpruhan supi qnlahang daha heya. Knkingal qpuruh we 4 heyi. Lnglungan daha we pltadun daha berah seediq bobo smmesung hrnasan. 5Maanu so kiya de qnlhangan daha sapah kuung ka Petros. Kiya de mbeyax bale dmurun Utux Baro ka mtswai ga pssliyan.

Sraguh Snkgulan Baro ka Petros

6Kiya de Hrodes we pltadun daha madis nganguc berah na keeman ciida, Petros we sbekuy daha 2 xiluy ka heya ma mtaqi ckceka 2 heyi supi. Meniq berah rhengun qmlahang sapah kuung ka supi mpqlahang uri. 7Kiya de kela su hiya meyah mheyu ssiyo Petros ka snkgulan Utux Baro ma lmedax toma hiya ka ledax. Sbetan na heyi na ma tmutuy Petros, rmengo: “Tutuy nhari!” Kiya de mtuting peeyah baga na ka xiluy. 8Rmengo heya ka snkgulan baro: “Hbiki habik ma pkkucu.” Kiya de asi nduwa snegul so nii ka Petros. Rmengo heya dungal: “Hlawi pala su ma snegul kenan.” 9Kiya de smnegul heya mlatac hiya ka Petros. Ini na klai yaa bale ka qneepah snkgulan baro. Ngalan na gisu mita so tuutux ka heya. 10Kiya de hrnasan daha ka 1 ma 2 qnlhangan sapah kuung de dehuk rhengun xiluy daling elu alang. Asi traguh nanak ka rhengun. Mlatac nganguc ka dheya ma mnoda mkkesa 1 elu de asi swaye heya ka snkgulan baro da. 11Mtkela ka Petros de rmengo: “Klaun mu bale saya ka Bukung, smnkagul snkgulan baro na, wada ku na ngalun peeyah baga Hrodes ma peeyah kana dnungusan seediq Yudaya.” 12Lmngelung na so nii de mosa sapah Maria. Heya we bubu Yohane Markos. Tena msseli dmurun hiya ka hbaro ba seediq. 13Tmatuk rhengun qnalang ka Petros, meyah qmbahang ka weewa mdayo, Rode ngayan na. 14Mnbahang hrenang de klaun na sa Petros de ado qaras na chngiyan na rmaguh ka rhengun ma tmalang mosa rmengo hbaro seediq, rmengo: “Ga mheyu rhengun nganguc ka Petros.” 15Rmengo ka dheya: “Nii su mkuni da!” Mbeyax bale rmengo ka weewa mdayo nii: “Heya bale wa!” Cmiyuk ka dheya: “Ida ba yaa snkgulan baro nPetros ka kiya.” 16Ini psetuq tmatuk rhengun ka Petros. Rwahan daha de mita heya duma mskluwi bale. 17Kiya de Petros we gmkuwak baga pgseesu dheya, srengo na dheya ka Bukung we hmuwa mesa ddulan Bukung peeyah sapah kuung. Rmengo dungal: “Sai rmengo Yakobu ma ita mtswai ka noda nii.” Kiya de mlatac ma wada quri icil.

18Lmedax ka karac de mrrudu bale ka supi. Ini daha klai wada inu ka Petros. 19Migin heya ka Hrodes, ini na slai. Kiya de slingan na ka supi qmnlahang na ma wada na phqilun da. Bobo na mlatac Yudaya ka Hrodes ma mosa Kaisareia ma meniq hiya da.

Mhuqil ka Hrodes

20Hrodes we kseengun na bale ka seediq Cor ma Cidon. Dseediq dxeral hiya we mangal uqun peeyah dxeral qbsuran paru. Kiya de sdngiyan daha ka Blastos mpqlahang tqiyan qbsuran paru ma mesa psbleyaq daha. 21Ali smseman de mlukus lukus qbsuran ka Hrodes, tleung tluungan qbsuran ma rmengo dheya. 22Mddiras ka seediq: “Hrenang Utux Baro ka nii. Uxe hrenang seediq.” 23Hrodes we ini tndahu Utux Baro ka heya. Kiya de asi psrui snkgulan Utux Baro ka heya. Qyutun kuyi ma msetuq hengak na da.

24Krinah mbeyax mrana ma mkgarang ba ka kari Utux Baro. 25Mnhedu qpahun daha mege pila ka Brnabas ma Soro de peeyah Yerusalem meyah, desun daha mtheyaq dheya ka Markos kesun ka Yohane.

Currently Selected:

Qneepah 12: Stgdaya

Highlight

Copy