Qneepah 11

Mquri Yerusalem Smneru Qneepah

1Snkgulan ma mtswai Yudaya mnbahang wada maangal kari Utux Baro ka seediq icil qnlhangan uri. 2Kiya de dehuk Yerusalem ka Petros de pkeekan kari daha tnugsaan mnoda gaya psalak. Rmengo: 3“Isu we mnteme su seediq ini ooda ptgaya smalak ma mnsuupu su dheya mekan di.” 4Kiya de Petros ge, so noda nii we prdingun na pslmeelu tmgesa: 5“Gisu ku dmurun meeniq alang Yapo ciida, mntena ku so nii mkkesa so utux. Niqan 1 ka mntuting mntena so pala paru. Taan mu ka tuutux, ga sbekuy ka 4 muxi na ma pslduyun ptuting bobo dxeral betaq berah papak mu. 6Tgleus su mu qmita de taan mu ckceka hiya we niqan ka camac 4 papak, camac bbuyu, kuyi ma qbheni skiya karac baro. 7Kiya de qbhangan mu ka hrenang rmengo kenan: ‘Petros, tutuy. Phuqil ma ekan!’ 8Rmengo ku: ‘Bukung! Ini tduwa ka nii. Ado so nii uxe malu ma mrutiq we uxe mu pnuqan ani texal quwaq mu.’ 9Mn2 niqan ka hrenang peeyah baro: ‘Pnsbgurah Utux Baro we iya kesi uxe malu.’ 10Mn3 ka so nii de wada asi ngali baro kana da. 11Ciida asi lux mheyu berah rhengun sapah niqan mu hiya ka 3 seediq. Dheya we snkgulan daha kenan peeyah Kaisareia. 12Dmurun kenan, iya tiiyax ma osa theyaq dheya mesa ka Bgihur Utux. Msuupu kenan mosa we 6 mtswai nii uri. Mnsuupu nami mremux sapah seediq kiya. 13Rmengo yami, wada huwa mesa mita 1 snkgulan baro mheyu sapah na, rmengo: ‘Skguli Yapo ka seediq, plaani ka Petros kesun ka Simon. 14Niqan kari na mprengo yamu, nii ge tduwa pkuudus isu ma kana tnsapah su.’ 15Prading ku rmengo ciida, asi stenge heyi daha ka Bgihur Utux. Mntena so prading ciida stenge dehuk heyi ta uri. 16Asi ku lmngelung kari rnengo Bukung: ‘Yohane we qsiya ka wada na sptgaya smino. Kiya de yamu we mooda namu ptgaya smino Bgihur Utux.’ 17Mntena bnege Utux Baro ita snhii ta Yesu Kiristo Bukung ciida ka bnege na dheya uri. Maanu so kiya de, ima ku ka yaku ho? Mtduwa ku hmetur Utux Baro ho?” 18Mbahang so kari nii ka dheya de mgmelux duma tmdahu Utux Baro, rmengo: “So kiya de Utux Baro ge, biqan na huwe ka seediq icil qnlhangan uri so maha ppriyux lnglungan aangal daha knuudus.”

Pssliyan Antiokeia

19Ado noda Stepanos mooda paru ba pnqraqil daha wada mkrehak ka dsnheyi seediq we mkkesa betaq Poinike, Kupros ma Antiokeia. Ini garang kari seediq icil, wano seediq Yudaya ka rngagan daha kari Utux Baro. 20Duma ckceka daha we niqan ka seediq Kupros ma seediq Kurenaios. Dheya we meyah Antiokeia ma sgarang daha seediq Hellenis ka malu kari quri Yesu Bukung. 21Msuupu dheya ka beyax Bukung. Kiya de mrana ba ka seediq snhii ma kmtama Bukung. 22Qbhangan birac seediq pssliyan meeniq Yerusalem ka nii de skgulan daha ka Brnabas mkkesa betaq Antiokeia. 23Dehuk hiya ka heya de mita huwe bnege Utux Baro de mqaras, dmudul seediq ma pgdehu lnglungan daha ini setuq kmtama Bukung. 24Brnabas nii we malu seediq, ga stenge Bgihur Utux ma paru snhiyan na. Kiya de hbaro ba seediq we snhii Bukung. 25Bobo na hiya de mosa Tarsos migin Soro ka Brnabas. 26Slayan na de desi na Antiokeia ka heya. Dheya we 1 knkawas msuupu pssliyan msseli ma tmgesa hbaro seediq. Kiya de seediq snhii Kiristo kesun daha tmngayan ka tnugsaan we prading peeyah Antiokeia.

27Ali ciida we peeyah Yerusalem dehuk Antiokeia ka duma mpgeela kari. 28Ckceka daha hiya we niqan 1 kesun daha Agabos, mheyu ka heya ma mnoda Bgihur Utux pgeela rmengo, meeyah kana bobo dxeral ka paru krayan. Bale ba dehuk qnlhangan Klaudios ciida ka so nii. 29Kiya de tnugsaan we prgaani daha so beyax bbege daha knkingal seediq psseli pila ddayo daha mtswai ga meeniq Yudaya. 30Kiya de wada daha kesun mooda. Pnseeli daha pila we pdesun daha Brnabas ma Soro bbege daha rdrudan mpqlahang hiya.

Currently Selected:

Qneepah 11: Stgdaya

Highlight

Copy