2 Timoteos 3
3
Qnhdean Kndesan Seediq
1Klai ba ka nii, nhdean ali we meeyah ka ali mqraqil. 2Seediq ciida we dheya nanak ka sgaalu daha, smkuxul riyung pila, mptndahu, mpsparu, mpsngayan seediq, mptbrinah rudan, cmhungi gnhwayan, ini krtaso ka lhebun, 3uka pnugluban tnsapah, hmetur mtbale, smkuxul rmengo kari naqah, ini qlahang, mnpahung bale, ini skuxul malu ooda, 4gmbaruy tnpusu sapah ma dangi, mnhemuc moda, psparu, smkuxul qqrasun ma, ini gaalu Utux Baro. 5Niqan tstuutux bale ka dqeras ma, bale ba gisu malix knstuutux. Seediq so nii we sthyai. 6Ckceka daha hiya we niqan ka Lmeing mremux sapah seediq, qmerac mqedil uka gnkela. Mqedil so nii we ga pexan qnquwan noda ma, ga psrdilun lmlamu kkraguh. 7Ani slluhe klaali we, uxe mpbetaq mkela bale ba kari ka dheya. 8Wada hmuwa mesa hmetur Moseh ka Yannes ma Yambres cbeyo we, dseediq nii wada so nii hnteran daha bale ba kari. Mnaqah ka lhebun daha, uka pseengan ka snhiyan daha. 9Kiya de, ini krana qmeepah noda daha. Ado knngataq daha we mptuura berah kana seediq mntena so 2 seediq nii.
Nhdean Tnugsaan na Timoteos
10Kiya de, isu we wada su muyu tnugsaan mu, noda mu, lnglungan mu, snhiyan mu, traguh lhebun mu ma, knremun mu. 11Kiya we ndaan mu smterung pnqraqil ma qnqihan meniq Antiokeia, Ikonion ma Rustra hiya uri. Teyal ba ndaan mu so nii pnqraqil! Peeyah ckceka pnqrqilan nii, wada ku dooyun baga Bukung! 12Bale ba we, ani ima niqan lnglungan meniq knstuutux Kiristo Yesu we mooda pnqraqil duri. 13Kiya de, maha mrana ka seediq meepah naqah ma seediq mberiq. Meyah psridil seediq ma heya ka wada psrdilun seediq uri. 14So isu we, pstama snlhayan su ma snhiyan su. Ado snlhayan su peeyah ima we klaun su nanak. 15Klaun mu uri, peeyah su lqlaqi ciida de mkela su Patis Mrtaso. Patis Mrtaso nii ka dehuk su maangal knkela ddoi baga meniq snhiyan Kiristo Yesu. 16Pnugkela Utux Baro kana ka Kari Utux Baro, niqan kana ririh na mdakar, mdudul, psderux seediq ma, tmgesa seediq smluhe msderux ooda. 17So maha mttuku riyung ka seediq nuUtux Baro, psramal meepah lnlamu malu ooda.
Currently Selected:
2 Timoteos 3: Stgdaya
Highlight
Copy
Compare
Share
Want to have your highlights saved across all your devices? Sign up or sign in
The Bible Society in Taiwan, 2020
© 台灣聖經公會版權所有，2020
