2 Timoteos 4
4
1Yaku we meniq ku berah Utux Baro ma, berah Kiristo Yesu mpsgao seediq muudus ma mnhuqil bobo na, spooda mu pntuura na ma qnlhangan na mdudul ku tmgesa isu: 2Grangi bale kari. Pskingal lhebun su ani mndungus ma uxe mndungus. Pdai lmlamu knlmenan su ma tnugesa su mseang seediq, mdakar seediq, smbeyax seediq. 3Ado mpdehuk ka ali, maha khrngasan seediq ka tnugesa mttuku nii. Mprkerak ka birac daha dima, kmpooda lnglungan daha nanak prana duma mptgesa. 4Kiya uri we bungun daha ka birac ini qbahang bale ba kari, mquri sneeru daha pneyah cbeyo. 5So isu we, qlahang bale ani maanu. Knremun bale mqraqil, qeepah qpahan gmarang kari ma, kdrumuc meepah qpahun su.
6So yaku we, wada ku daha sbege, daling ka ali mplatac ku bobo dxeral da. 7Wada mu daun tmgdiyal ka malu tgdyalan. Wada mu dhekun tmalang kana ka elu ttlaman mu. Kari snhiyun mu we wada mu dhekan qmlahang da. 8Bobo na saya nii de, niqan ka bunuh msderux rrangi na yaku. Nii we kiya ka meeyah ali ciida ka Bukung mpsgao we spooda na msderux noda sbege na yaku. Sbege na yaku ma, sbege na kana seediq gmaalu Heya ka pntuura na.
Nhdean Kari Dnudul
9Eyah nhari yaku hini. 10Ado smkuxul riyung bobo dxeral saya ka Demas, heya we wada malix yaku duma, wada mquri Tesaloniki da. Kreskes we wada Garatia. Titos we wada Dalmatia. 11Wano Ruka nanak ka nii meniq hini. Meyah su ciida we adis ka Markos. Ado mtduwa bale stmaan meepah ka heya. 12Wada mu skgulan Epesos ka Tukikos. 13Lukus hniti mu Karpos meniq Troas hiya we, meyah su de adis. Desi ka dpatis uri, kiya ka dpatis pnatis qraqil miric. 14Mpsmalu xiluy mtanah ka Aleksandria we wada pqraqil bale kenan. Ida mciyuk heya pnooda ndaan na ka Bukung. 15Qlhangi ka heya. Ado hmetur riyung kari nami ka heya.
16Plaale ku cmiyuk rmengo uka qnquwan mu ciida we, uka seediq ka meyah dmayo. Wada asi alix yaku kana ka dheya. Tai so uxe mpndheya ka qnquwan noda so nii. 17Wano Utux Baro mheyu ssiyo mu, prana mege beyax mu ma, dhekun mu ptkuun bale traguh gmarang ka malu kari. Kiya de mnbahang kana ka seediq icil qnlhangan. Yaku uri we sdoi ku daha baga peeyah quwaq rkelic. 18Bukung we ida ku na pqdriqun pneyah kana naqah qneepah, dooyun ku na baga tteme qnlhangan na ga baro. Tai so sbege Heya kana ka ledax betaq ani knuwan. Ameng!
Kmdamac ma Psbeyax
19Malu namu kesi rmengo ka Priska, Akulas ma, tnsapah Onesiporos. 20Erastos we ida ga meniq Korinto. Ga mnarux ka Tropimos da. Ga mu thiqan Miletos. 21Eyah nhari hini tgberah misan. Malu namu mesa rmengo ka Euboulos, Poudes, Rinos, Klaudia ma, kana mtswai.
22Tai so mptheyaq bgihur su ka Bukung! Tai so huwe na we mptheyaq isu!
Currently Selected:
2 Timoteos 4: Stgdaya
Highlight
Copy
Compare
Share
Want to have your highlights saved across all your devices? Sign up or sign in
The Bible Society in Taiwan, 2020
© 台灣聖經公會版權所有，2020
