2 Samuel 7

Rmengo Kari Dawid ka Natan

(1 No 17:1-15)

1Meniq sapah qbsuran paru ka Dawid. Sbleqan Utux Tmninun ka heya ma, ini pyahi prrudu pais ssiyo na. 2Rmengo Natan mpgeela kari ka Dawid: “Tai bino, gisu ku meniq sapah qbsuran paru snmalu qulic bale. Kiya we gaga meniq kobu hiya ka kulu pnsdhegan Utux Baro nana.” 3Rmengo qbsuran paru ka Natan: “Seung nanak lnglungan su moda kndaun su. Ado gaga theyaq sunan ka Utux Tmninun.” 4Keeman ciida, meyah Natan ka kari Utux Tmninun: 5“Sai rmengo ka tnqliyan mu Dawid: ‘So nii ka kari Utux Tmninun, mpsmalu su sapah nniqun mu peni? 6Pneeyah ku dmnudul seediq Israel mlatac Micrayim betaq saya, uxe ku mneniq sapah. Kiya we mnkkesa ku kobu mrtaso ma kobu ka yaku. 7Kana tnhiyan mu mkkesa dseediq Israel ma, ani 1 qbsuran mdudul, kiya ka pndakar mu mosa dmudul seediq mu: Ma namu ini salu sapah thmkuwan snmalu qulic bale kenan ka yamu ho?’ 8Saya, kesa rmengo ka Dawid tnqliyan mu: ‘So nii ka kari Utux Tmninun Mdoi Kana Supi, pnlawa misu pneeyah tibu miric. So su uxe mtabu miric dungal. Pheyu ku sunan mqbsuran paru Israel seediq mu. 9Ani su mnosa ani inu, ida ku mptheyaq sunan ka yaku. Mpseqic ku kana pais su. Biqun su mu paru ngayan, mntena so ngayan dseediq niqan paru ngayan. 10Mpgao ku 1 dxeral nniqun seediq mu Israel. Pkdakil ku dheya ma, pniqun mu dxeral daha nanak uxe daha yahun prrudu. Dlqlaqi seediq naqah we, uxe meyah pqraqil dheya. 11Ini pntena pnosa mu kari mpsgao ali qmnlahang seediq mu Israel ka qbsuran mdudul. Pblequn misu ma, uxe su yahun prrudu pais ani inu. Niqah sntangan na sunan ka Utux Tmninun, Utux Tmninun we mpheyu tnsapah su. 12Bobo mttuku ka knkawas su ma, betaq su mptheyaq mtaqi rdrudan su ciida de, mplutuc sunan ka lqlaqi mslutuc pntingan su nanak. Yaku ka mpskere qnlhangan na. 13Ririh ngayan mu, heya ka mpsmalu sapah thmkuwan mu. Yaku ka mpskere tluungan na mqbsuran paru betaq ani knuwan. 14Yaku we mptama na ma, heya we mplaqi mu. Nasi niqan qnquwan noda na, mpdoi ku hukuc ma sebuc seediq mpseru ku heya. 15Kiya de uxe mplatac heya ka gnaalu mu. Mntena so Soro wada mu sqada meniq berah su. 16Mpgdehu betaq ani knuwan meniq berah su ka sapah su ma qlhangan su. Tluungan qbsuran paru su we, mpgdehu ani betaq knuwan.’” 17Kiya de muyu kana kari nii ma kana tuutux nii ka Natan ma, srengo na Dawid.

Dmurun ma Mqaras ka Dawid

(1 No 17:16-27)

18Kiya de mremux truma ka Dawid qbsuran paru. Mosa tleung berah Utux Tmninun ma rmengo: “Utux Tmninun Bukung! Ima ka yaku, mmaanu ka sapah mu, betaq su so nii dmudul kenan ho? 19Utux Tmninun Bukung! Tgbiciq ba meeniq doriq su ka nii, betaq su rmengo ddaun tnsapah tnqliyan su. Utux Tmninun Bukung! So ooda seediq ka nii peni? 20Maanu dungal ka rrengo Dawid quri sunan peni? Utux Tmninun Bukung! Klaun su nanak ka tnqliyan su. 21Kana ndaan su nii we, betaq su pgkela tnqliyan su. Ado nii we ririh sntangan su ma, pnuyu lhebun su nanak. 22So kiya de, Utux Tmninun Bukung! Paru su riyung ka isu. Bnhangan miyan peeyah birac we, uka ka mntena sunan, wano ba isu, uka ka kesun Utux Baro. 23Ima ka mntena Israel seediq su peni? Utux Baro, isu nanak ka dmnoi baga 1 qlhangan ma, ngalan su seediq su nanak ma, ptuura su ngayan na. Ririh so dxeral su, betaq su moda paru ba sklwiun noda peeyah su ckceka dqlhangan ma duutux daha ma, meniq berah dseediq dnoi su nanak baga mnlatac Micrayim. 24Pnheyu su ma seediq su ani betaq knuwan ka Israel seediq su. Isu, Utux Tmninun we, ma Utux Baro daha uri. 25Saya, Utux Baro Tmninun! Psdhegi betaq ani knuwan ka kari sntangan su tnqliyan su ma sapah tnqliyan su. Braho su puyu so rnengo su moda. 26Tai so smparu ngayan su betaq ani knuwan ka seediq. Mprengo: ‘Utux Tmninun Mdoi Kana Supi ka Utux Baro qmlahang sapah Israel.’ So kiya de, mpsdehu berah su ka sapah Dawid tnqliyan su. 27Utux Tmninun Mdoi Kana Supi, Utux Baro nuIsrael! Ado rmnengo su tnqliyan su: ‘Mpheyu ku tnsapah su.’ Kiya de mnpahung ku ba dmurun sunan ka tnqliyan su. 28Saya de, Utux Tmninun Bukung! Wano isu ka Utux Baro. Kari su we bale ba ma, snbleqan nii we sntangan su bbege su tnqliyan su uri. 29Saya, braho misu bale! Sbleqi ka sapah tnqliyan su, so maha meniq betaq ani knuwan berah su. Utux Tmninun Bukung! Ado sntangan su ka nii. Tai so snbleqan su we maha su sbege sapah tnqliyan su ani betaq knuwan. So mangal snbleqan!”

Currently Selected:

2 Samuel 7: Stgdaya

Highlight

Copy