2 Samuel 6
6
Smterung Kulu Pnsdhegan Betaq Yerusalem
(1 No 13:1-14, 15:25-16:6, 43)
1Psseli dseediq gneegan na pneeyah ckceka Israel ka Dawid we 3 mang heyi. 2Mtutuy ka Dawid ma, mtheyaq dseediq na mmaha. Kmpeeyah bale Yehudah hiya moda mangal kulu pnsdhegan Utux Tmninun. Kulu pnsdhegan nii we pntngayan Utux Tmninun Mdoi Kana Supi gaga tleung bobo 2 kirubing hiya. 3Dheya we spheal daha peeyah sapah Abinadab gaga dgiyaq ka kulu pnsdhegan Utux Baro ma, psaun daha bobo bgurah rulu. Uja ma Axyo laqi Abinadab ka dmudul bgurah rulu nii. 4Spapa daha pneeyah sapah Abinadab gaga dgiyaq ka kulu pnsdhegan Utux Baro. Mkkesa berah kulu pnsdhegan ka Axyo. 5Meniq berah Utux Tmninun ka Dawid ma kana seediq Israel we, smnegul lmlamu qyqeya tmubu, tubu mheyu ma tubu 7 urac, tatuk hmuril, sgsedas ma, bngbang kebun kmeeki ka dheya.
6Dehuk nniqan sbetan mugi Nakon, ado skripuc ka tgberah papak dapa de, asi hkero baga na dmoi kulu pnsdhegan Utux Baro ka Uja. 7Seang Utux Tmninun ge mquri Uja. Ririh so nii qnnaqah phuqil heya ka Utux Baro. Kiya de mhuqil ssiyo kulu pnsdhegan hiya ka heya. 8Dawid we, ado wada mseang phuqil Uja ka Utux Tmninun de, Peres Ujah kesun na tmngayan ka dxeral hiya betaq saya.
9Ali ciida, miicu Utux Tmninun ka Dawid ma rmengo: “Huwa mu kesun madis yaku hiya ka kulu pnsdhegan Utux Tmninun nii ho?” 10Kiya de ini daha pstmai alang Dawid dxeral daha nanak ka kulu pnsdhegan Utux Tmninun ma, pqriun daha madis sapah Obed Edom seediq Gat hiya. 113 idas nniqan na sapah Obed Edom seediq Gat ka kulu pnsdhegan Utux Tmninun. Utux Tmninun we sbleqan na ka Obed Edom ma kana tnsapah na.
12Meyah rmengo Dawid ka duma seediq: “Ririh kulu pnsdhegan, Utux Tmninun we smbleyaq tnsapah Obed Edom ma kana dxeral na.” Kiya de, mqaras riyung mheal kulu pnsdhegan Utux Baro peeyah sapah Obed Edom. 136 qango knksaan daha ka seediq mnheal kulu pnsdhegan Utux Tmninun de, asi bege snapuh dapa ma mtbeno tnbugan ka heya. 14Dawid we mlukus lukus tninun malu nuqah kesun ipudi ma mbeyax ba kmeeki berah Utux Tmninun. 15So kiya de, Dawid ma kana Israel we tqqaras miyuk iyuk urung ma, saun daha smterung ka kulu pnsdhegan Utux Tmninun.
16Mremux alang Dawid ciida ka kulu pnsdhegan Utux Tmninun we, qmita peeyah beling sapah ka Mikal weewa Soro ge, qtaan na gisu tqqaras ba kmeeki berah Utux Tmninun ka Dawid qbsuran paru de, smbiciq qmita heya ka lhebun na. 17Smbleyaq premux peeniq nniqan kulu pnsdhegan Utux Tmninun ka kana seediq. Kiya ka ckceka kobu pnheyu Dawid. Mege snapuh psqama na snapuh ptbale meeniq berah Utux Tmninun ka Dawid. 18Mnhedu smapuh snapuh psqama ma snapuh ptbale ka Dawid de, pooda ngayan Utux Tmninun Mdoi Kana Supi smbleyaq seediq. 19Kiya de sugan na pn1 pang, pn1 knretan heyi nuduh ma, pn1 pang lipas ka kana seediq ma seediq Israel. Kiya de mbrinah sapah daha nanak ka txtaxa daha. 20Mbrinah sapah mosa smbleyaq tnsapah na ka Dawid. Meyah smterung heya ka Mikal weewa Soro ma rmengo: “Teyal knledax ka qbsuran paru Israel ali saya! Ali saya we, tgberah berah doriq dtnqliyan mqedil ma dqbsuran mdayo qbsuran paru, mntena so seediq uka dungus gisu mbberas.” 21Rmengo Mikal ka Dawid: “Gisu meniq berah Utux Tmninun ka nii. Gmnao kenan pnbaro ku na meniq bobo tama su ma kana tnsapah tama su ka Utux Tmninun. Phyegan ku na mqbsuran paru Israel seediq Utux Tmninun ka heya. Kiya ka kmeeki ku berah Utux Tmninun. 22Asi ku ka krinah psbiciq ma, smbiciq qmita kenan nanak. Quri so dtnqliyan mqedil rnengo su we, krinah smparu qmita kenan ka dheya.” 23Mikal weewa Soro ida uka laqi na betaq ali mhuqil ciida.
Currently Selected:
2 Samuel 6: Stgdaya
Highlight
Share
Copy
Want to have your highlights saved across all your devices? Sign up or sign in
The Bible Society in Taiwan, 2020
© 台灣聖經公會版權所有，2020
