2 Samuel 5

Mqbsuran Paru Kana Israel ka Dawid

(1 No 11:1-9, 14:1-7)

1Meyah Xebron qmita Dawid ka kana dseediq pnswayan drudan Israel ma rmengo: “Qtai! Tnsapah su ka yami. 2Sndure, ani yaa mqbsuran paru ka Soro we ida isu ka dmnudul seediq Israel mosa mccebu. Rmnengo sunan ka Utux Tmninun: ‘Mdanga su seediq mu Israel ka isu, mpqbsuran su paru seediq mu Israel ka isu.’” 3Kiya de meyah Xebron meyah qmita qbsuran paru ka kana ddrudan Israel. Psdehu dheya meniq berah Utux Tmninun ka Dawid meeniq Xebron. Kiya de hrigi daha abura ma ngalan daha qbsuran paru Israel. 4Mqbsuran paru ciida ka Dawid we 30 knkawas na ma mqbsuran paru 40 knkawas. 5Mqbsuran paru Yehudah nniqan na Xebron we 7 knkawas dmeka ma, mqbsuran paru Israel ma Yehudah nniqan na Yerusalem we 33 knkawas.

6Betaq Yerusalem ka qbsuran paru ma dseediq na. Mccebu dseediq Yebus gaga meniq hiya. Rmengo Dawid ka seediq Yebus: “Uxe su mpremux alang hini ka isu. Ani mbudu ma mpika seediq we, maha su daha pbrnahun.” Nii rmengo: “Uxe mpdehuk mremux alang hini ka Dawid.” 7Kiya de wada ngalun Dawid ka qbrangan Sion. Kiya ka alang Dawid.

8Ali ciida, rmengo ka Dawid: “Ima ka mosa mccebu seediq Yebus we, asi ka moda elu daun qsiya. Osa cmebu dseediq mpika ma mbudu trqilun mu.” Kiya ka niqan seediq rmengo: Seediq mbudu ma seediq mpika we uxe mremux sapah nii. 9Meniq qbrangan hiya ka Dawid ma, alang Dawid kesun na tmngayan ka kiya. Dungal we speeyah na truma Miru we ga na ptqriyan na mharac. 10Mrana klaali ka beyax Dawid, ado msuupu heya ka Utux Tmninun, Utux Baro Mdoi Kana Supi.

11Xiram qbsuran paru Cor we smkagul snkgulan madis qhuni malu sknexan mosa Dawid hiya. Dungal we smkagul mpqeepah btunux ma qhuni mosa smmalu sapah qbsuran paru Dawid. 12Dawid ge, mkela pskere pheyu heya mqbsuran paru Israel ka Utux Tmninun. Dungal we ririh seediq na Israel, mpkbeyax qlhangan na ka Utux Tmninun.

13Bobo theruy peeyah Xebron ka Dawid we mangal hbaro ba mqedil ma dmoi hbaro ba laqi rseno ma mqedil meniq Yerusalem hiya. 14Mntuting Yerusalem ka laqi na we Samua, Sobab, Natan, Selomoh, 15Yibxar, Elisua, Nepeg, Yapia, 16Elisama, Elyada ma Elipelet.

Ini Baka ka Seediq Peliset

(1 No 14:8-17)

17Seediq Peliset we mbahang wada hrigan abura ma wada ngalan qbsuran paru Israel ka Dawid. Kiya de meyah tgbaro migin phuqil Dawid ka kana seediq Peliset. Mbahang ka Dawid de, mosa hmeruc qbrangan. 18Meyah ka seediq Peliset ma tqpurah meniq ayu Ripayim. 19Smiling Utux Tmninun ka Dawid: “Ini huwa mosa ku mccebu seediq Peliset ho? Bbege su baga mu ka dheya ho?” Rmengo Dawid ka Utux Tmninun: “Ini huwa mosa su. Bege mu baga su ka seediq Peliset.”

20Kiya de meyah Baal Peracim ka Dawid ma, wada na ini baka ka seediq Peliset. Rmengo ka heya: “Utux Tmninun we, mntena hmurah qniding qsiya, wada smeeliq pais berah mu ka heya.” Ado Baal Peracim kesun na tmngayan ka hiya. 21Htiyan daha qmada hiya ka tikung dseediq Peliset. Kiya de wada desun Dawid ma dseediq na ka nii.

22Meyah baro dungal ka seediq Peliset ma tqpurah meeniq ayu Ripayim. 23Smiling Utux Tmninun ka Dawid. Rmengo ka Utux Tmninun: “Iya sderux mosa. Osa mtqiri bukuy daha ma, speeyah sipo rnao gaga hrean tdiyuc hiya cmebu dheya. 24Mbahang su hrenang papak ckceka waso qhuni de, asi osa kmremux nhari. Ado tena wada ka Utux Tmninun, gaga tgberah su mccebu supi seediq Peliset.” 25Kiya de Dawid we, muyu rnengo Utux Tmninun mosa mccebu seediq Peliset ka heya ma, speeyah na Geba betaq Gejer.

Currently Selected:

2 Samuel 5: Stgdaya

Highlight

Copy