2 Samuel 22
22
Uyas Dnugdyalan Dawid
(Uyas 18)
1Ali betaq wada platac Dawid quri kana pais na ma baga Soro ciida, dmoi kari uyas nii rmengo Utux Tmninun ka Dawid. 2Rmengo ka heya:
Utux Tmninun we lhengo mu, qbrangan mu, mdoi baga mu,
3Utux Baro mu, qqerung mu, pusu btunux mu, kiya ka stmaan mu.
Heya ka qeerung mu, urung mdoi baga yaku,
paga qbrangan mu, kiya ka qqdriqan mu,
pusu mdoi baga mu, mdoi baga platac peeyah mphuqil.
4Mpdurun ku Utux Tmninun tndhuun,
pkdusun ku na peeyah baga pais.
5Tmlibu kenan ka bula hhuqil,
smiicu kenan ka yayung pqhedu.
6Qmiri kenan ka snuyuk tuxan mnkuung, betaq kenan ka tlenga hhuqil.
7Mlawa ku Utux Tmninun peeyah pngqrqilan,
mdiras ku Utux mu Baro.
Mbahang hrenang mu peeyah sapah thmkuwan na,
dnurun mu we dehuk birac na.
8Ciida, ririh seang na lmgelu ka dxeral.
Lmgelu uri ka pusu karac baro.
9Tbengux qrengul ka beling muhing na,
pcriyu quwaq na ka puniq msqama, ani bagah sqama uri.
10Sladu na ka karac ma meyah.
Stsapil na papak na ka plabu mnkuung.
11Paapa kirubing skiya ka heya,
mtqita bobo palic bgihur ka heya.
12Kuung ma qsiya pnsseli na ma,
plabu karac baro ka nniqan na meniq ssiyo na.
13Ririh heya ka pkledax,
kiya de sqama ka tahuc.
14Pbruwa peeyah baro ka Utux Tmninun,
peeyah hrenang ka Utux Tnpusu Baro.
15Cmebu budi ka heya, wada na grangan ka pais.
Pyahun na ka wilaq, tggarang ka dheya.
16Nasi meyah ka seang Utux Tmninun, meyah ka seang na peeyah muxi de,
ptuura pusu dxeral rcilung ma, qtaan ka pusu dxeral uri.
17Hmkero baga qmeraq yaku peeyah baro ka heya,
bbilun ku na baro peeyah qsiya paru.
18Pkuudus kenan peeyah mbeyax ba pais mu,
pswaye kenan peeyah seediq qnriqu yaku. Ado mgkala kenan mbeyax ka dheya.
19Ali pqrqilan mu meyah kmremux kenan ka dheya.
Kiya de Utux Tmninun ka stmaan mu.
20Ddulun ku na mosa knuglahang nniqan,
dmayo yaku ka heya, ado kuxul ku na ka yaku.
21Cmiyuk kenan knsderux noda mu ka Utux Tmninun,
smadu kenan ka ini qrutiq baga mu.
22Ado muyu ku elu Utux Tmninun,
ini ku ba oda qnnaqah tbrinah Utux Baro mu.
23Meeniq berah mu ka kana gaya bneku na,
ini mu ba lixi ka kari pndakar na.
24Seediq ku mttuku meeniq ku berah na,
qmlahang ku mlatac qnquwan noda uri.
25Kiya de Utux Tmninun we spooda na knsderux noda mu,
spooda na knbhege mu mege snadu meniq berah doriq na.
26Seediq gmaalu we cyukan na gmaalu.
Seediq mttuku we cyukan na mttuku.
27Seediq malu lnglungan we cyukan na malu lnglungan.
Seediq mbiki we cyukan na mbiki.
28Seediq gisu mqraqil we, dooyun su baga.
Kiya de qmita su seediq psparu de, psbiciq su dheya.
29Utux Tmninun! Camo mu ka isu.
Utux Tmninun we mpkledax knkuung mu.
30Spooda mu isu mremux ku supi pais,
spooda Utux mu Baro milo qnalang.
31Utux Baro we mttuku ka elu na.
Kari Utux Tmninun we mrtaso.
Ani ima smtama heya we heya ka qeerung na.
32Wano ba Utux Tmninun, ima ka Utux Baro ho?
Wano ba Utux Baro ta, ima ka pusu btunux ho?
33Pgdehu qbrangan mu ka Utux Baro,
rmaguh elu mttuku mu ka heya.
34Pntnaun ku na knsliko papak draqul ka papak mu,
spgdehu ku na pheyu baro.
35Pslhayan na pccebu ka baga mu,
hiqur baga mu we pkragun na halung limuk.
36Huwe pkuudus su ka ma qeerung mu,
qnlhangan su kenan ka pkparu kenan.
37Pkpruun saku pqango pkkesa ku,
ini ba qsdheriq ka papak mu.
38Sdrapun mu ka pais mu ma phuqil dheya.
Nasi mu ini qhdei phuqil de, uxe ku pbrinah.
39Wada mu phqilun ka dheya,
wada mluqah ka dheya ma, betaq ini ptutuy.
Tgtemaq mtakur papak mu toma ka dheya.
40Biqan saku beyax pskeruc hwinuk mu, dehuk ku mtduwa mccebu.
Pais cnebu yaku we ga mtlebu toma mu.
41Pqdriqun su peeyah berah mu ka pais mu,
tduwa mu phqilun ka dseediq qmnriqu kenan.
42Psmeyah ka dheya we uka ka mdoi baga.
Ani mlawa Utux Tmninun we ini ciyuk ka heya.
43Ptnmeun mu ka dheya, mntena so bengux dxeral.
Gmgamun mu miriq ka dheya, mntena so dengu celaq dxeral.
44Dmnoi su baga kenan peeyah tnuglayan seediq mu,
ngalan saku qbsuran qqlhangan qmlahang su kenan.
Ani mu ini klai ka seediq mu we, ida qmeepah kenan.
45Mpqbahang kenan ka seediq icil,
asi snegul kenan mnbahang ngayan mu.
46Mpkiicu ka seediq qnlhangan icil,
pkrkerang mlatac qbrangan daha.
47Muudus ani betaq knuwan ka Utux Tmninun.
Tai so tndhuun ka pusu btunux mu,
tai so spruun ka Utux Baro, pusu btunux mdoi baga kenan.
48Dmayo rmengo kenan ka Utux Baro nii,
speeniq su toma kenan ka kana seediq qqlhangan.
49Dmoi baga mu peeyah pais mu ka heya,
dungal we, phyegun ku na mgkala kana seediq kmremux yaku,
dmoi baga kenan pqduriq seediq naqah bale.
50Utux Tmninun! Kiya de mptndahu ku sunan meeniq ckceka qqlhangan,
mpqaras ku muyas ngayan su.
51Mege paru ba pnkuudus qbsuran pnheyu Utux Tmninun,
sgaalu na ka qbsuran cnwiqan abura tunux,
kiya ka ga sbege Dawid ma lqlaqi mnslutuc na betaq ani knuwan!
Currently Selected:
2 Samuel 22: Stgdaya
Highlight
Share
Copy
Want to have your highlights saved across all your devices? Sign up or sign in
The Bible Society in Taiwan, 2020
© 台灣聖經公會版權所有，2020
