2 Samuel 2
2
Ngalan Qbsuran Paru Yehudah ka Dawid
1Bobo na nii, smiling Utux Tmninun ka Dawid: “Ya ini huwa mosa ku 1 alang Yehudah ho?” Cmiyuk ka Utux Tmninun: “Ani su nanak mosa.” Rmengo ka Dawid: “Mosa ku alang tgiinu ho?” Cmiyuk ka Utux Tmninun: “Xebron.” 2Kiya de Dawid we desun na hiya ka 2 mqedil na. Kingal we Axinoam seediq Yijreel ma kingal we Abigayil nmqedil Nabal meniq Karmel. 3Dawid we desun na msuupu mosa hiya kana ka dseediq tnheyaq heya ma kana tnsapah daha. So nii meniq lualang Xebron hiya ka dheya. 4Meyah hiya ka dseediq Yehudah ma, hrigan daha abura, ngalan daha qbsuran paru tnsapah Yehudah ka Dawid.
Rmengo Dawid ka duma seediq: “Wada smeku Soro ka dseediq Yabes gaga Gilad.” 5Kiya de Dawid we smkagul snkgulan betaq seediq Yabes gaga Gilad hiya ma, rmengo dheya: “Tai so mpsbleyaq yamu ka Utux Tmninun! Ado wada namu smbleyaq smeku Soro pusu tnsapah namu. 6So nii ka ndaan namu de, tai so khwayun ma pkbale yamu ka Utux Tmninun. Mciyuk ku qneepah namu so nii ka yaku uri. 7Saya, mhuqil ka Soro pusu tnsapah namu. Wada hmeruy abura kenan mqbsuran paru tnsapah Yehudah daha ka yaku. Knbeyax ka baga namu ma kseediq niqan pahung.”
Ngalan Qbsuran Paru Israel ka Isboset
8Abner laqi Ner qbsuran supi Soro we desun na mtaril yayung betaq Maxanayim ka Isboset laqi Soro. 9Phyegan daha qbsuran paru ma, mpqlahang Gilad, Asuri, Yijreel, Eprayim ma Binyamin, kiya de kana seediq Israel. 10Isboset laqi Soro we 40 knkawas na ngalan qbsuran paru Israel. Kiya de smnegul Dawid ka tnsapah Yehudah. 11Ngalan qbsuran paru tnsapah Yehudah Xebron hiya ka Dawid we 7 knkawas dmeka.
Mccebu ka Tnsapah Soro ma Dawid
12Abner laqi Ner ma dtnqliyan Isboset laqi Soro we, peeyah Maxanayim mosa Gibon. 13Yoab laqi Ceruyah ma dtnqliyan Dawid uri we mosa ssiyo rcilung Gibon ma, smterung dheya. Tleung rcilung hini ka 1 qpuruh ma, tleung rcilung hiya ka 1 qpuruh. 14Rmengo Yoab ka Abner: “Pttuyo ta ka driso ma, dai ptgdiyal berah ta!” Rmengo ka Yoab: “Pttui ta ka dheya.” 15Kiya de mtutuy ka dheya ma, moda smepu seediq ma meyah: Quri Isboset seediq Binyamin lqlaqi Soro we 12 heyi ma, tnqliyan Dawid we 12 heyi uri. 16Mddoi tunux, mllihu hlmadac hwiras ka dheya ma wada asi pntena mhuqil kana. Kiya de Hikac Hsuring kesun daha tmngayan ka dxeral kiya ma gaga Gibon hiya. 17Mrana paru mccebu ka ali ciida. Ini baka berah tnqliyan Dawid ka Abner ma dseediq Israel. 18Meeniq hiya ka 3 laqi Ceruyah: Kiya ka Yoab, Abisay ma, Asahel. Mntena rqenux rabang gaga breenux knslkagan tmalang ka Asahel. 19Smdurak bukuy Abner ka Asahel we ini kridil narac ma iril asi sderux smdurak heya. 20Mspgeriq bukuy rmengo ka Abner: “Asahel, isu ho?” Rmengo ka heya: “Un, yaku.” 21Rmengo heya ka Abner: “Hmuwa ka sridil mquri su narac uxe duri we mquri su iril qmerac 1 riso ma, gmeeluk su maangal lukus mccebu na peni?” Kiya we ini alix smdurak Abuneru ka Asahel. 22Rmengo Asahel dungal ka Abner: “Psquri icil, iya sdurak kenan da! Hwaun su mu phuqil dxeral ka isu ho? Netun ku phuqil sunan de, mphuwa ku mesa mtqita Yoab qbsuran mtswai su ho?” 23Kiya ma ida ini sruwa mpsquri icil ka Asahel. Kiya de Abner we btaqan na puting smbrangan ka nbuyas Asahel. Tklihu bukuy ka smbrangan ma asi takur mhuqil hiya. Dehuk tnkuran mhuqil Asahel hiya ka kana seediq de mheyu meniq hiya kana da.
24Smdurak Abner ka Yoab ma Abisay. Priyax hido ciida, dehuk ssiyo elu mquri tadus brenux Gibon, dgiyaq Yama sipo Gix. 25Msseli bukuy Abner ka seediq Binyamin, 1 rahul meeniq bobo dgiyaq biciq hiya. 26Mlawa Yoab ka Abner: “Maha betaq knuwan mpphuqil ka hlmadac di? Ini su kela mnnihur bale ka qnhdean na nii peni? Mpknuwan ka pbrinah su dseediq su ma, uxe su mpsdurak mtswai daha ho?” 27Rmengo ka Yoab: “Mpsdehu ku Utux Baro muudus ani knuwan: Nasi su ini so nii rmengo de, mmaha nanak smdurak mtswai betaq mgrebu kusun ka dheya.” 28Kiya de miyuk iyuk urung ka Yoab de, mheyu ka kana seediq ma, malix smdurak seediq Israel ma ini pccebu di.
29Abner ma dseediq na we pksrabi mooda mkkesa Arabah ma, mntaril yayung Yarden. Hrnasun na ka Pirung betaq Maxanayim. 30Mpbrinah peeyah bnhragan na Abner ka Yoab we psseli kana seediq. Wada uka 19 heyi ma Asahel ka tnqliyan Dawid. 31Kiya de tnqliyan Dawid we 3'60 heyi ka wada daha phqilun dseediq Binyamin ma Abner. 32Dheya we desun daha Betlexem ka Asahel ma saan daha smeku habung tama na hiya. Yoab ma dseediq na we pksrabi mkkesa ma lmedax ciida de hani dehuk Xebron.
Currently Selected:
2 Samuel 2: Stgdaya
Highlight
Share
Copy
Want to have your highlights saved across all your devices? Sign up or sign in
The Bible Society in Taiwan, 2020
© 台灣聖經公會版權所有，2020
