2 Samuel 1
1
Lmingis Soro ma Yehonatan ka Dawid
1Bobo wada mhuqil ka Soro, mbrinah mnosa mccebu seediq Amaleq ka Dawid ma, mk2 ali meniq Ciqlag hiya. 2Tg3 ali, qtai! Niqan 1 seediq pneyah kobu Soro. Smgaliq lukus murus qbulic tunux na meyah tgtemaq dxeral berah Dawid thmuku. 3Rmengo heya ka Dawid: “Pneeyah su inu?” Cmiyuk ka heya: “Qnduriq ku peeyah kobu Israel.” 4Rmengo heya dungal ka Dawid: “Gaga hmuwa di? Tgsai ku hiya.” Rmengo ka heya: “Wada qduriq peeyah mccebu hiya ka dsupi ma, hbaro ba ka supi wada spaux mhuqil uri. Kiya ma wada mhuqil ka Soro ma Yehonatan laqi na uri.” 5Smiling riso mneyah pgkela ka Dawid: “Ma su klaun wada mhuqil ka Soro ma Yehonatan laqi na?” 6Rmengo ka riso mpgkeela kari nii: “Pkelu ku ba mnosa dgiyaq Gilboa hiya. Qtai! Gisu sdahar smbrangan na ka Soro. Qtai! Niqan rulu mccebu ma, dsupi paapa dapa dmay ka gisu smdurak heya. 7Mspgeriq bukuy qmita ma mlawa kenan. Rmengo ku: ‘Nii ku hini.’ 8Smiling yaku ka heya: ‘Ima su ka isu?’ Rmengo ku: ‘Seediq ku Amaleq.’ 9Rmengo yaku ka heya: ‘Eyah mheyu kenan hini ma asi ku phqili. Ado ku nii mqraqil riyung ma msngari biciq ba hengak mu di.’ 10Kiya de mheyu ku ssiyo na hiya ma phuqil ku heya. Ado klaun mu mtakur ka heya de, uxe mpkuudus ka heya di. Bobo na de, gisu mu desun pusu tnsapah mu hini ka bunuh qbsuran paru qnbubu na ma cuqi baga na.”
11Dmoi lukus na ka Dawid ma sgliqan na. Kana dseediq smnegul heya we, so nii moda kana. 12Dheya we betaq keeman ini ekan ma tsdamac lmingis naqah kuxul Soro, Yehonatan, seediq Utux Tmninun ma dtnsapah Israel. Ado wada phqilun kana ka dheya. 13Smiling riso pgkela kari ka Dawid: “Pneeyah su inu ka isu?” Cmiyuk ka heya: “Yaku we laqi ku seediq tnooda, seediq ku Amaleq.” 14Rmengo heya ka Dawid: “Hmuwa ma su ini kiicu phuqil hnrigan abura Utux Tmninun?” 15Kiya de mlawa 1 tnqliyan ka Dawid, rmengo: “Aguh, phuqil ka heya!” Tnqliyan we phqilun na ka heya ma mhuqil di. 16Rmengo heya ka Dawid: “Mosa tunux su nanak ka dara su. Ado gisu su rmengo qnnaqah su nanak: ‘Wada ku phuqil hnrigan abura Utux Tmninun.’”
Smalu Uyas Tsdamac Soro ma Yehonatan ka Dawid
17Smnalu uyas tsdamac Soro ma Yehonatan nii ka Dawid. 18Kiya de tgsaan na ka seediq Israel ma ttgesa daha seediq Yehudah ka “Uyas Bheniq” nii. Qtai! Gisu ptasun bobo patis Yasar:
19Israel! Wada phqilun bungu dgiyaq ka paru spruun!
Ma lux mtakur ka dsupi paru pahung!
20Iya rrngaani Gat ka nii,
iya rrngaani Asqelon ka nii.
So uxe mpqaras ka dweewa Peliset,
so uxe mptndahu ka dweewa seediq uxe mnoda ptgaya psalak.
21Dgiyaq Gilboa! Tai so uka quyux ma uxe drmulun!
Tai so uxe mpeeyah uqun ka qnpahan su!
Ado wada tsyaxun meniq hiya ka qeerung heyi ndsupi mnpahung,
ini rcuhi abura ka qeerung heyi Soro.
22Meniq berah dara pnhuqil,
berah heyi dmpahung supi,
ini brinah ka budi na Yehonatan,
ini tduwa ba mpptbrinah ka hlmadac Soro.
23Mggaalu muudus ciida ka Soro ma Yehonatan,
mhuqil ciida we, ini pswaye uri.
Hmrinas knskyaan rehak,
mgkala beyax rkelic.
24Dweewa Israel! Lngsani ka Soro!
Pnlukus lukus purah yamu ka heya,
pndeping king hnaluy yamu ka heya.
25Ma lux mtakur pccbuwan hiya ka dsupi paru pahung!
Wada phqilun bungu dgiyaq ka Yehonatan!
26Mtswai mu Yehonatan! Tsdamac ku sunan!
Smkuxul ku ba isu ka yaku!
Teyal bale ka gnaalu su kenan,
hmrinas pnskxulan mmqedil.
27Ma lux mtakur ka dsupi mnpahung!
Ma lux sqada ka qyqeya mccebu!
Currently Selected:
2 Samuel 1: Stgdaya
Highlight
Share
Copy
Want to have your highlights saved across all your devices? Sign up or sign in
The Bible Society in Taiwan, 2020
© 台灣聖經公會版權所有，2020
