2 Samuel 3
3
1Bsiyaq mccebu ka tnsapah Soro dhaka tnsapah Dawid. Dmudul mbeyax ka tnsapah Dawid ma, dmudul muuwic ka tnsapah Soro.
Lqlaqi Dawid
2Mntuting Xebron hiya ka duma lqlaqi Dawid: Tgqbsuran laqi rseno we Amnon, pntingan Axinoam seediq Yijreel. 3Tg2 laqi na rseno we Kilab, pntingan Abigayil mqedil Nabal seediq Karmel. Tg3 laqi rseno we Absalom, pntingan Maakah. Maakah we weewa Talmay qbsuran paru Gesur. 4Tg4 laqi rseno we Adoniyah, pntingan Xagit. Tg5 laqi rseno we Sepatyah, pntingan Abital. 5Tg6 laqi rseno we Yitream, pntingan Eglah mqedil Dawid. 6 laqi Dawid nii we mntuting Xebron.
Mosa Sdahar Dawid ka Abner
6Mccebu ciida ka tnsapah Soro ma tnsapah Dawid we, niqan paru ba beyax na meeniq sapah Soro ka Abner. 7Niqan 1 mqedil Soro, Recpah ka ngayan na ma weewa Ayah. Niqan 1 ali, rmengo Abner ka Isboset: “Ma su mnsuupu mtaqi mqedil tama mu ho?” 8Sqama seang nkari Isboset nii ka Abner ma rmengo: “Ya ku dhuling msquri ku Yehudah ka yaku peni? Betaq saya ka yaku we wada ku mnduwa ba qmeepah tnsapah Soro tama su, mtswai na ma, dangi na. Ini sumu bqani baga Dawid ka isu. Ali saya, betaq su snmqedil nii meyah su mseang kenan? 9Tai so Utux Tmninun maha paru ba pnkdira na Abner! Mpuyu ku sntangan Utux Tmninun quri kari mpttuku Dawid. 10Lixun ka qnlhangan Soro ma, mpheyu tluungan qbsuran paru Dawid. Kiya de so maha mpqlahang Israel ma Yehudah, peeyah Dan betaq Beerseba ka Dawid.” 11Miicu Abner ka Isboset ma ini bale ciyuk ani 1 kari.
12Smkagul snkgulan mosa Dawid hiya ka Abner ma rmengo: “Nnima ka dxeral nii ho?” Rmengo dungal: “Psdehu ta. Qtai! Mpdayo ku sunan ma, so mpheyu sunan kana ka Israel.” 13Rmengo ka Dawid: “Un! Mpsdehu ku sunan! Kiya de niqan 1 ka mpesa ku sunan. Meyah su qmita dqeras mu ciida we, asi su ka desun ka Mikal laqi Soro. Nasi su ini desi de, iya eyah mita kenan.” 14Dawid we, smkagul snkgulan mosa Isboset laqi Soro hiya ma rmengo: “Asi su ka brnahun ka Mikal mqedil mu. Heya we bniqan mu 1'00 qraqil eyu nrseno seediq Peliset kiya.” 15Kiya de Isboset we smkagul seediq saun na mangal peeyah rseno na Paltiyel laqi Layis hiya ka Mikal. 16Tllingis smnegul heya ka rseno na. Mkkesa ma lmingis betaq Baxurim. Rmengo heya ka Abner: “Osa brinah da!” Kiya de brinah ka Paltiyel.
17Mpprengo drdanan Israel ka Abner: “Cuuxal smnalu namu ba Dawid aangal namu qbsuran paru qmlahang dyamu ka heya. 18Saya, tduwa namu moda so nii ka yamu da. Ado rmnengo quri Dawid ka Utux Tmninun: ‘Yaku ge, asi ka spooda mu baga Dawid tnqliyan mu, mdoi baga Israel mlatac seediq Peliset ma baga pais na.’” 19Srengo na dseediq Binyamin uri ka Abner. Dungal Abner we, mosa Xebron. Saun na rmengo Dawid ka lnglungan seediq Israel ma kana tnsapah Binyamin. 20Abner we maadis 20 heyi seediq meyah Dawid Xebron hiya. Kiya de Dawid we sbleqan na qdiyal paru qrasun ka Abner ma dseediq na. 21Rmengo Dawid ka Abner: “Mptutui ku mosa psseli kana Israel. Meyah pusu tnsapah mu ma qbsuran paru mu hini ma, mpsdehu sunan. Kiya de mpuyu so lnglungan su, maha su mqbsuran paru ma mpqlahang kana qlhangan.” Dawid we, sblequn na smraki posa ka Abner. Kiya de mbleyaq mbrinah ka heya.
Phqilun ka Abner
22Qtai! Mbrinah peeyah nsaan daha kmremux ka tnqliyan Dawid ma Yoab. Egu riyung nadis daha gnlekan. Ini eniq Dawid Xebron hiya ka Abner ciida. Ado wada psaun Dawid ka heya ma, wada mbleyaq mbrinah mosa ka heya. 23Dehuk ka Yoab ma kana supi na. Niqan seediq meyah rmengo Yoab: “Mneyah qbsuran paru hini ka Abner laqi Ner. Wada psaun Dawid ma wada msbleyaq mbrinah ka heya di.” 24Mosa qbsuran paru ka Yoab ma rmengo: “Gaga su hmuwa so su nii! Qtai! Mneyah hini ka Abner ma, ma su wada skwayun posa ma, pbrnahun su posa ka heya dungal? 25Klai bale, gisu mberiq sunan ka Abner laqi Ner. Mneyah kmuuruy mbahang sunan ma, klaun na kana ka ooda su.”
26Peeyah Dawid hiya meyah ka Yoab de, smkagul snkgulan na mosa smdurak Abner. Pbrnahun daha peeyah hghugan qsiya Sirah ka heya. Ini kela quri so nii ka Dawid. 27Mpbrinah Xebron hiya ka Abner ma, desun na ckceka rhengun alang hiya ka heya ma, gmuruus rmengo heya. Kiya de asi na btaqi nbuyas ka Abuneru. Mhuqil ka heya di. Ado pnsdara Asahel mtswai Yoab ka heya. 28Bobo nii, mnbahang ka Dawid de rmengo: “Pnsdara Abner laqi Ner ge, yaku ma qlhangan mu we uka ba qnnaqah mu meniq berah Utux Tmninun. 29Tai so mciyuk tunux Yoab ma kana tnsapah na ka dara nii. Dungal we tnsapah Yoab we, so uxe mpsetuq mnarux msdara, mnarux msburo heyi, dmoi hukuc mkkesa, mtakur bobo hlmadac ma, ini ptuku uqun.” 30Wada phuqil Yoab ma Abisay mtswai na ka Abner. Ado mccebu Gibon ciida, wada phqilun Abner ka Asahel mtswai daha.
Smeku Abner
31Rmengo Yoab ma dseediq smnegul heya ka Dawid: “Sgliqi ka lukus namu, plkusi lukus mbasi ma tsdamac lmingis berah Abner.” Smnegul bukuy kulu pnsdhegan uri ka Dawid. 32Dheya ge, saan daha smeku Xebron ka Abner. Lmingis ssiyo habung Abner ka qbsuran paru. Lmingis uri ka kana seediq. 33Tsdamac Abner ka qbsuran paru ma rmengo:
“Abner, ma su so mntena seediq mngataq wada mhuqil ho?
34Ini bkei ka baga su ma, ini psai xiluy ka papak su.
Mntakur su we, mntena su mtakur baga naqah ba seediq.”
Krinah tsdamac lmingis Abner ka kana seediq. 35Diyan nana, meyah pkraki pekan uqun Dawid ka dheya. Kiya we smdehu rmengo ka Dawid: “Nasi ku mnekan ido, uxe uri we mnekan ku ani maanu tgberah priyax hido de, tai so pkdira kenan ka Utux Tmninun!” 36Mkela ka seediq de, malu mesa kana ka dheya. Kana noda qbsuran paru we, malu bale mesa kana ka seediq. 37Ali ciida, hani mkela uxe lnglungan qbsuran paru ka phuqil Abner laqi Ner ka seediq Israel. 38Rmengo qbsuran mdayo ka qbsuran paru: “Ini namu klai peni, wada mtakur ka 1 mndungus ba ngalun qbsuran supi Israel ka ali saya ho? 39Ani ku qbsuran paru hnrigan abura ka yaku we, uka beyax mu ka saya na. 2 laqi rseno Ceruyah we, mgkala kenan ka beyax daha. Tai so Utux Tmninun we mpciyuk noda naqah seediq ka heya.”
Currently Selected:
2 Samuel 3: Stgdaya
Highlight
Share
Copy
Want to have your highlights saved across all your devices? Sign up or sign in
The Bible Society in Taiwan, 2020
© 台灣聖經公會版權所有，2020
