2 Korinto 4
4
Pusu Dnoi Ga Truma Kayu
1Maanu so kiya de ado wada miyan na khwayun mege qpahun so nii ma ini kiicu ka lhebun nami. 2Wada miyan krnahun mqada ka so smsiqa qneepah mnkuung, ini miyan kraki ma ini miyan mhmeti tmgesa ka kari Utux Baro. Wano spkleexan miyan ptuura ka bale ba. So maha ptuura kana lhebun seediq ka dheya nanak meniq berah Utux Baro. 3Ani wada sqeerung ka malu kari miyan we quri seediq mpkuuka ka sqeerung na. 4Quri seediq ini snhii nii, utux bobo dxeral nii ka wada pkbudu doriq lhebun daha. Kiya ka betaq ini qita malu kari knledax Kiristo bale. Hnyegan Utux Baro ka Kiristo. 5Uxe yami ka sgarang nami, gmarang nami Bukung ka Yesu Kiristo. Yami we quri Yesu ka sptnqliyan miyan yamu. 6Posa kari ledax, pkledax peeyah kuung ka Utux Baro we tena wada pledax lhebun ta. Kiya de ppkleexan na pkela ita ka ledax pneeyah knledax Utux Baro we ga truura dqeras Yesu Kiristo.
7Malu dnoi ta nii we psaun ta ckceka rusuq, pptuura ani kana knpruwan beyax pneeyah Utux Baro, uxe pneeyah menan. 8Ani nami moda ani maanu bbekuy we ini nami na bkei. Ani mgedang lhebun nami we ini nami kgedang snluwan. 9Smterung nami pnqraqil we ini nami na laxi. Tgsebu nami dxeral mtakur we ini miyan dehuk mhqili. 10Saapa nami heyi nami klaali ka hnqilan Yesu. Kiya de ptuura knuudus Yesu uri ka heyi nami. 11Ado yami nii muudus we ririh Yesu gisu sbege phqilun klaali. Kiya de pptuura knuudus Yesu meniq heyi miyan mphuqil. 12So kiya de nii qmeepah menan ka hhuqil. Kiya de ga qmeepah yamu ka kkuudus.
13Maanu so kiya de mntena ta pneyah 1 Bgihur Utux ka snhiyan ta de, so ga spatis Patis Mrtaso: “Snhii ku. Maanu so kiya de rmengo ku.” Snhii ta ka ita uri, kiya ka rmengo ta uri. 14Ado klaun ta wada pkuudus Yesu Bukung peeyah hnqilan we pspuun tana Yesu pkuudus uri. Kiya de pspuun miyan yamu mheyu berah na. 15Kana ani maanu we ririh yamu spooda na hbaro seediq prana ka gnhuwe namu, mrana uri ka huwe namu ma, sbege namu Utux Baro ka knledax.
Sntama Snhiyan Muudus
16Maanu so kiya de ini kiicu lhebun nami. Ani gisu dmudul mpsburo ka nganguc heyi miyan we sbgrahun klaali ka truma lhebun nami. 17Ado ndaan miyan tnnais mqraqil nii we paangal knledax menan. Knledax nii we paru ba uka pntnaan knchdilan ma uka psteqan ani betaq knuwan. 18Ado ini miyan qlhangi ka taan. Uka taan ka qlhangun nami. Ado tnnais ka qtaan ma uka psteqan ani betaq knuwan ka ini tai.
Currently Selected:
2 Korinto 4: Stgdaya
Highlight
Copy
Compare
Share
Want to have your highlights saved across all your devices? Sign up or sign in
The Bible Society in Taiwan, 2020
© 台灣聖經公會版權所有，2020
