2 Korinto 5
5
1Ado klaun nami, nasi wada hrahun ka kobu ta nii bobo dxeral ge, niqan ka uxe snmalu baga seediq uka psteqan ani betaq knuwan ga baro ka sapah ta snmalu Utux Baro. 2Tgsdaring ta meniq ckceka kobu nii, kmremux ta bale sapah baro mntena so mlukus lukus. 3Ani ta ini plkusi we ida ta uxe so mpbberas. 4Bale ba meniq ta ckceka kobu nii nana we tgsdaring ta mqraqil. Uxe ta smatang smruwa lmhelah kobu bobo dxeral. Smruwa ta mplukus sapah baro. So maha rqenun knuudus ka mphuqil. 5Psramal ita ooda ta so nii we Utux Baro ka kiya. Spgeela na smpusu mege ita ka Bgihur Utux.
6Maanu so kiya de, mnpahung miyan bale klaali. Kiya uri ma klaun nami, nasi miyan meniq heyi ciida han ge, gisu nami smtheya Bukung ka kiya. 7Ado noda miyan we mnoda snhiyan, uxe mnoda qtaan doriq. 8Ida miyan mnpahung. Knmswaye nami heyi ma smkuxul nami msuupu meniq Bukung. 9Maanu so kiya de, ani miyan meniq ckceka heyi ma meniq nganguc heyi we, ida pqaras Bukung ka dnngusan nami. 10Ado kana ta we ida ta asi ka mheyu berah tluungan psgeegan nKiristo. Kiya de ppuyu na so qneepah txtaxa heyi ta ka aangal ta cniyuk na ani malu ma ani naqah.
Oda Pkmalu Seediq ma Utux Baro
11Maanu so kiya de, klaun nami kkcugun ka Utux Baro de dmudul miyan seediq. Kiya we Utux Baro we mkela ita. Dngusan mu we lhebun namu tai so maha mkela yami uri. 12Uxe yami ka spgkeela nami yamu, kiya we tai so maha niqan tndahu namu yami ka yamu. So kiya de tduwa namu smterung dseediq wano qqita hnyegan nganguc, ini pooda psparu lhebun tmdahu. 13Nasi nami mkuni ka yami de, Utux Baro ka skuni nami. Nasi nami mtkela de, yamu ka stkela nami. 14Gnaalu Kiristo ka wada pkbeyax yami. Ado so nii ka lnglungan nami, ririh kana seediq wada pririh mhuqil ka 1 seediq de, wada mhuqil kana ka seediq da. 15Wada pririh kana seediq mhuqil ka heya de, kiya ka seediq ga muudus de, uxe dheya ka skuudus daha. Bukung wada pririh dheya mhuqil ma muudus dungal ka skuudus daha.
16Maanu so kiya de, peeyah saya de, uxe miyan mpuyu qnita seediq mkela seediq. Ani namu mnoda qnita seediq mkela Kiristo we, peeyah saya de uxe nami mpkeso kiya mkela heya da. 17Maanu so kiya de, nasi ga meniq ckceka Kiristo ka seediq we, wada sbrahun kana di. Wada ka cmucac ma, gisu pryuxan bgurah kana da. 18Kana ani maanu pneeyah Utux Baro kana. Heya we spooda na Kiristo wada pkmalu ita ma heya. Kiya uri we wada na sbege ida ka qqeepah mdudul seediq pkmalu heya. 19Nii we kiya ka, Utux Baro we pkmalu kana seediq bobo dxeral meniq ckceka Kiristo. Ini na psai heyi daha ka qnquwan noda daha. Kiya uri we, wada na sbege ita ka kari pkmalu nii.
20Maanu so kiya de ma, snkgulan Kiristo, mntena so Utux Baro spooda na yami dmudul yamu. Yami uri we, dmurun nami Kiristo, so namu pkmalu Utux Baro. 21Utux Baro we ririh ita wada na ngalan niqan qnquwan noda ka uka qnquwan noda. So ta meniq ckceka na mpknsderux noda Utux Baro.
Currently Selected:
2 Korinto 5: Stgdaya
Highlight
Copy
Compare
Share
Want to have your highlights saved across all your devices? Sign up or sign in
The Bible Society in Taiwan, 2020
© 台灣聖經公會版權所有，2020
